2 TIMOTEU 3 - KARÚK-PËRIM KAWALU Nouveau Testament

Unoor tsi uwal utuami

¹ Mean ko wi: tsi ngënu ngëtuami, din ngëwal unoor ka baandi.

² Par, bañaan ka ruka ci baŋal-iyeen bukul, baŋal-uncaam, batsupalar, baguukandar, bakar Nasien-batsi, bamobats tsi përim ban buk biki bukul, barika-baran, barispitaarats ngëyëman,

³ batamb-ngëwaas, bayëkarats ñaan ipës, baja ngëwutsëtsuel tsi uleka ñaan, batsëkats, bapayi, baŋalats-uwar,

⁴ baya ñaan ufets, bacar-uriab, biki mguukandër kuelëtsan biki, baŋal ngëlílal te pë jaa bë ŋal Nasien-batsi;

⁵ bu ka piban unk pi bu lënk Nasien-batsi ank, maa bë bër uyëlan ulënkëniul. Lawani buts bamënts bukun.

⁶ Par bañaan pi bamënts bukun, ka yuemba bukun ba niaj ito, bu kë buets bakaats ban daf biki iyeen a ba ritsan tsi ngëjuban bukul, a kafets ngëkoraar ngëko ngëlílal pe bukul uyëlan;

⁷ tsi ngëwal bëlieng bu kë juk, maa yaas a bu ka yëlan pëtsënkan pëme ucär.

⁸ Bi Janes, ni Jambëres natsara bunk Moises, unk buts di bañaan bamënts bukun ci run tsi puu pok ucär; bu wamandats ngëwejats ngëwar; bu pënana, par bu katse mobi tsi uwak.

⁹ Maa bë ri ka lawan kak, par bañaan bëlieng ka win bëfuur bukul, bi bëfuur Janes ni Jambëres wina bunk.

Katseenda-ibats katuami

¹⁰ Maa wi, m mob uwar tsi bëjukan nji, bëro nji, ko wi n tsaag wi, uwak nji, umiira nji, bëŋal nji, pëtambandar nji,

¹¹ pënoorana pi n noorana pi, unoor wi n noor wi; uwom unoor wi n noorats wun di Antiookia, di Ikooniu, di Listëra? Pënoor-noorana pëwom pi n miiraatsa pun-i? Maa a Ajug bueranin tsi ngul bëlieng.

¹² A te, ba ŋal biki bëlieng puu lënk Nasien-batsi tsi bëciir bukul ni Këristu Yeesu, bu ka ci tsi puu noorana.

¹³ A bajuats-ngëwaas ni bafal-bañaan, ngi bu kë ro ngi koo peelar pëci ngëjuatsal; bu kë fal bañaan, bu kë falaa buts.

¹⁴ Maa wi, moban tsi ko wi m juk wi a m win u ci ucär. Me ban jukanu biki,

¹⁵ a m les, m me Bëpican Bëyëman ki m wam ki napäts. Ngul, a yëlan pëwëlu kameko, pa pëtsëpandu aa uwaku tsi Këristu Yeesu ka bueranu.

¹⁶ Bëpican bëlieng aci Nasien-batsi futsi un bul, a ba ka bëkat pa bëjukan, pa pëpok un ka wi pëpoka, pa pëcikës, pa pëkusa tsi bëmabal.

¹⁷ Unk, ñaan Nasien-batsi ka yecisa uwar, pa puu ro ko un ci wi-ba këci uwar.