2 TIMOTEU 2 - KARÚK-PËRIM KAWALU Nouveau Testament

Nasondaari na mobi tsi Këristu Yeesu

¹ Wi, napäts nji! Bi u ci bank, liincandari tsi bëtseend ban ci bi tsi Këristu Yeesu.

² A ko wi n leents wi tsi bërun bacumal ba maatir biki a m te, tergaari wul bañaan ba mob biki tsi uwak, biki kan yëlan biki buts pëjukan wul balon.

³ Kaan kafau tsi unoor, pi nasondaari na mobi tsi Këristu Yeesu.

⁴ Nasondaari nan ci tsi usirbis, ka ŋal nan tsuuli tsi usirbis pëlilandërul. Wul ka wun, di ka tsu ibatsul tsi ngëko umundu.

⁵ Unk buts, tsi ukam-kampëtar, nakaman di ka wëla bëluk nagaañaar, uci na kamanats bi u tsua bi tsi ukam-kampëtar.

⁶ A najaar na noori tsi kajaar, ka un pëyank bërun kafaul tsi ko wi mleempëna pënani wi.

⁷ Tean ko wi n ci wi tsi pëja, par Ajug ka wëlu bëlipal tsi ko un ci wi-ba këci.

⁸ Lesan Yeesu Këristu, nul na natsee di pëcäts; apënë-ni di kajër Dawid, bi Upetsan nji Uwar ja bi,

⁹ a n ci tsi unoor undo wul, aa n tsënkëne n tanaa mkorente, pi naro-ngëko-kawaraatsa. Maa përim Nasien-batsi tanaatsa.

¹⁰ Wul ka wun n ci tsi puu miira tsi ko un ci wi-ba këci, undo barata, pa bukul buts pëyank pëbuer, pul pan ci pi di Këristu Yeesu; bu ka yankand përëmb pan dits pi ka ba.

¹¹ Përim pi, aci pëcar: Uci ngë cats ni nul, n ja kee kak koo yafënts ni nul;

¹² uci ngë mob tsi pëmiira, n ja kee sien ni nul. Uci ngë wëtanul, nul buts nii wëtan n ja;

¹³ uci ngë mobats tsi uwak, nul në mob tsi uwak, par yëlanats pëwëtan përimul.

Naleemp nawar

¹⁴ Moban tsi puu lesan bukul ngëmënts ngun. Caran leents bukul tsi bërun Nasien-batsi; jaan bukul ba wët mantotëlër tsi irim; mul kaats bëkat, aci mi ka niaman mi biki kan cikëndën biki.

¹⁵ Támbandari kë nats tsi bërun Nasien-batsi pi ñaan na lílandëree, pi naleemp nandootsi ko wi kan tsuul wi mkaw, a nuu jukan uwar përim ucär.

¹⁶ Randan ngëñakan karika-rispitaar Nasien-batsi. Par, ban ci biki tsi ngul, bu koo pe këpe përika-lënk Nasien-batsi.

¹⁷ Bëjukan bukul aci pi ucoontsësa wi ka wiaka wi. Imeneu ni Fileetu, bu bof ni bukul,

¹⁸ bu pën tsi ucär. Par bë ci tsi puu ja, kanatsee-di-pëcäts apar ba. Unk, a bu kë cok balon uwak.

¹⁹ Maa ujuundi uliincal, di Nasien-batsi natsan di, lëg-lëgaats. Tampoŋ dul ci run përim pi: “Ajug ame ban ci biki bayiicul;” ni përim pi buts: “Na n jai ba këja abof ni Ajug, na lawani ngëko-kamabats.”

²⁰ Di kato kawiak, cits iŋi i leempëna yi ni uwëru, ni i leempëna yi ni mtsak uncaam ci yun din, maa aka rul buts yi itagëba, ni yi uni; yi ko un dëmbana wi aci, a yi ko un tienkëtsana wi ci.

²¹ Bi u ci bank, nan pënani bërierul mtsopi mmënts mun tsi ubiiraul, në ci kaŋí karooni ko un dëmbana wi, kan patsanaa, kan ka ki bëkat pa Nawiak, kan yecisa ki pa puu ro ko u wara wi-ba këwara.

²² Túkan ngëko ngi pëtsasa kë rí ngi, kë mob tsi bëmabal, ni tsi uwak, ni tsi bëŋal, ni tsi pëfac, kë bof ni biki kandu biki Ajug ni ngëwaas ngëjëntsal.

²³ Pokan mantotëlër man kaats mi bëkat, mi kalipats, par amea muu tsiji pëŋom.

²⁴ A te, naleemp Ajug kaats puu ŋom ni ñaan, maa aka pëci ñaan nan juabi uwaas tsi uleka bañaan bëlieng, në yël bëjukan, nuu miira,

²⁵ ni kajuab-uwaas nuu cikës bapok bëjukan bi nuu jukan bi; në wats tsi Nasien-batsi pëtseend bukul kayaar-ibats, pa bu ka me ucär,

²⁶ din bu ka kak ba tsij ngëwejats ngëwar, pa bu ka pën tsi igungan Ujabël, wul u mob wi bukul, a u tsu bukul puu ro ko wi u ŋal wi.