2 TESALONIKA 3 - KARÚK-PËRIM KAWALU Nouveau Testament

Katseend-ibats tsi uleka bëñaan, ni uleemp

¹ Pëtuamës, ind batsaar ni wund, nda ñaandëri wund pa përim Ajug pëmob tsi pëya bërun, puu rëmbana, bi u ci bunk tsi pëncuaf ind.

² Ndë ñaandar buts wund pëpënana tsi iñan bajuats-ngëwaas ni baro-ngëko-kawaraatsa; par cits bañaan bëlieng ka bukun uwak.

³ Maa Ajug aci namob tsi përim; ka liincan ind, në waay ind tsi uleka Naro-ngëko-kawaraatsa.

⁴ tsi Ajug, wund awak ind koon tsi ko wi: Ngi wund tsu ind ngi puu ro, nda ci tsi përo ngul, a nduu mob tsi përo ngul.

⁵ Ajug, na mabani ngëwaas ind tsi bëŋal Nasien-batsi, ni tsi mtambandar Këristu.

Pëkat ibats pa përits tsuunk uleemp

⁶ Batsaar ni wund, tsi katim Ajug nja Yeesu Këristu, wund atsu ind puu ro ko wi: Nda lawani nan tsaari ba këtsaar ni nja a na ci ni ubiira katsuunk-uleemp, u mabats wi ni ko un ja wi u roon uu rolaa, wi wund jukanul wi.

⁷ Ind bërier ind, nda me bi nda ka bi puu teenëna tsi wund. Par, uwal wi wund ro wunk ci tsi pëncuaf ind, wund cits ni ubiira katsuunk-uleemp.

⁸ A bariala ñaan, wund reets bul te wund lukats; maa bërëm ni pënak a wund kë leemp uleemp un dits wi, wund kë ciband, pa wund përits sëtsaraan nalon ind.

⁹ A te cits pëjaa wund kaats këka përolaa unk, maa aci wund bërier wund pëci uteenëni wi nduu fets wi.

¹⁰ Par, ŋal uwal wi wund ro wunk ci ni ind, wund atsu ind puu fets përim pi: “Uci ñaan ŋalats uleemp, nul tsuu riala buts.”

¹¹ A wund te bakank u jaka, balon tsi ind bë ci ni ubiira katsuunk-uleemp; bë cits tsi përo ko, maa bu cum ngi ba ciina ngi.

¹² Bañaan pi bamënts bukun, ko wi wund kë tsu wi bukul puu ro, a wund kë ñaan bukul tsi Yeesu Këristu, Ajug, ci wun wi: Ba tsëkan, bu kë leemp, din bu kë rialan iyeen bukul.

¹³ A ind batsaar ni wund, ind tsë noor puu ro uwar.

¹⁴ Uci ñaan fetsats përim pi wund ja pi tsi uletar wi, nda markaariul; ind tsë bof ko ni nul, pa në kawa.

¹⁵ Te ind tsë tsuul pi aci bëñaasar, maa nda leentsariul pi aci ñaan ni nda tsaari.

Kawël-mboos katuamë-ni, ni kaja-ngëwar

¹⁶ Ajug pëfac, nul bërierul na wëlan ind pëfac, pa sandëndën, bi u ci bi ba këci. Ajug na ciin ni ind bëlieng.

¹⁷ Kawël-mboos ki, nji Pol nji n pican un kul ni kañan nji bërierin; aci umarëka uyëkëraani tsi ngëletar nji bëlieng. Unk di nja run n doon koo pican.

¹⁸ Bëtseend Ajug nja Yeesu Këristu, ba ciin ni ind bëlieng.