2 PER 2 - KARÚK-PËRIM KAWALU Nouveau Testament

Bajukan-ngëtsua batsup

¹ Bi bayëlia batsup ro bunk ci tsi pëncuaf bañaan-ucaak, unk buts di bajukan-ngëtsua batsup kii cili run tsi pëncuaf ind. Bu ka niajan bëjukan ban cika bi, bi kan cok bi, te u tsu bukul pëbër Ajug, nul nan buerani bukul; bu ka tsiji kacok kacaral tsi ruets iyeen bukul.

² Bacumal ka fets bëro bukul bëtsopal. A tsi undo bukul, bëga ucär ka karaa.

³ Ni ibats karisan-ko, bu ka raacëna ind irim kanguungu, pëyankëna ind ngëko; kawata-pëleents bukul kan yecisa ki jon, di ka jon pëbaandi, te pëniam bukul di ka ŋooy.

⁴ Par Nasien-batsi jampësaats ngëwaanju bi nga juban bi, maa, atan ngul ni mkorente agutsar nfeernu, di tsëko tsërëmëntsuel, a na yecis ngul pa unu kawat-pëleents.

⁵ A jampësaats umundu ujon, maa a na waay Noe, nul naleents uleka bëmabal, ni bañaan paaj ni nalon; a na wëtani mlik-mfuer tsi umundu bameets-nasien-batsi.

⁶ A na lacan përaasa Sodooma ni Gomoora, a na gar yul aba, awíts ufab; unk, a i ci upiban pa balënkats-Nasien-batsi.

⁷ A na randan Lot, niints namabal, na njai na roon në juatsan, undo ngëñútsanuel ngi bameets-ngëtsua kë ro ngi.

⁸ Par niints namabal namëntsi, atsoar tsi pëncuaf bukul, a na ja kara unu nuu win, nuu te ngi bu kë ro ngi nga mabats ngi, u reanul uwaasul umabal.

⁹ Ko wi, apiban nja Ajug yël përand balënk-nasien-batsi mteenamana, ni pëwët ba mabats biki tsi unoor, te Unu kawat-pëleents.

¹⁰ Unoor umënts wun ka peena ba n ja bukunk ba roon, tsi pëfets uŋal uliaf bukul, bu kë yandaar tsi kari-ngëko ngëtsopal, a bu ri ka tsu pësien ko. Bape-iyeen bukul, baguukandar, bu lënkats pëja ko u waraatsa wi tsi uleka msien man pe mi pëci mwiak.

¹¹ Ngëwaanju pe ngunk pëka uyëlan ni pëyëlan, a di ka kar mul, tsi bërun Ajug;

¹² maa bañaan bamënts biki ci pi ngë n jar, ngan dits ngi ka wejats, nga leempara ngi puu moba ni puu fiŋa; bu ka kar ko wi ba meets wi. Bu ka niam buts tsi kawaraatsa bukul.

¹³ Bu ka yank bëluk kamabats tsi ngëko kamabats ngi bu kë ro ngi; bu win u ci ko u líl wi bukul, bukul puu ro ngëko ngëtsopal tsi pënak ndakaŋ. Bë ci mtsopi ni basal, a bu kë lílan tsi manfalar bukul, uwal wi ba tsoar wi kare ufesta ni ind.

¹⁴ Këkës bukul acum ni mjubi, a bu ri ka paaraar ujuban, bu kë fal ba liincats bukun tsi uwak, a ngëwaas bukul mob tsikariisan-ko; bë ci upäts bëjuats.

¹⁵ Bu wëtan bëga bëmabal, a ba niam bi bu kë fets bukunk bëga Balaam, abuk Bosor, nul nan yecis pëyank bëluk kamabats;

¹⁶ maa, a na leentsara tsi kaguus-koul; ubúuru un dits wi ka ñakan, añakan ni përim ñaan-najin, a u laaŋ nayëlia karo bëfuur.

¹⁷ Bajukan-ngëtsua batsup bamënts biki, bë ci pi ukëpës un kaats wi mlik, ni pi isa i ukëk kë tsëpand yi; karëm síic ayecisa pa bukul.

¹⁸ Bu ka ñakan irim upíc in kaats yi bëkat; tsi uŋal uliaf bukul, ni tsi mtsopi, bu kë raac bandu ka bueri di iñan ban ci biki tsi kaguus-ko.

¹⁹ Bë watsan pëwël bukul pëfac, te bukul bërier bukul bë ci baluek tsi ngëko ngi kan cok ngi; par ñaan nan peai, aci naluek nan peul unk.

²⁰ Bi u ci bank, uci ba bueri di mtsopi umundu, tsi undo ume Yeesu Këristu Ajug nja Nabueran, a uu ba, a ba kaka witsa ka tsopandar tsi mul, a man pe bukul pëyëlan, bëci bukul butuami ka witsa ka pe bucak pëjuats.

²¹ Par, aro mat bukul përoots me bëga bëmabal yaas, ni pëjaa bu me bul a uu ba, a ba ru wëtan utsua uyëman wi ba wëla wi.

²² Unk, a ko un jaka wi tsi katib-përim kacär, rolaa tsi bukul; iink jaka run: “Ubuus awitsara mgac wul;” a u jaka buts: “Unkambe u ñawa wi awitsa lam di bupat.”