2 KORINTU 9 - KARÚK-PËRIM KAWALU Nouveau Testament

¹ Tsi undo bëtsënk pa bayëman, kaats nji pëpicar ind;

² par man me uwar bi nda car bi yecis tsi uŋal ind, a n píc tsi undo ind, tsi bërun bañaan Masedoonia; a nja: “Bañaan Akaaya ayecis ba ki baneki.” A undo bi nda yëkandar bi ko wan, a u liinc-liincan ngëwaas bacumal.

³ Maa, mán yëli batsaar ni inja, pa upíc wund tsi ind përits ci ko ulon un pats wi, par mando ja ba bukul nda yecis ba.

⁴ Uci balon tsi bañaan Masedoonia bi ci ni nji, a bee tsënk nda yecisats, wund ka ci ni mkaw, tsi undo bi wund fiaar ind bi; ind buts ndë kawa.

⁵ Wul ka wun nja ne, batsaar ni nja tsi uwak aka pëyërin bërun pëbi di ind, pii yecis bëtseend bi nda car bi leentsa, pa ba ci ban yecisa bi ni ngëwaas ngan fac ngi, cits ni karísan-ko.

⁶ Nda ka pëme ko wi: “Na wayani ko uties, ka cët ko uties; a na wayani arëmban, ka cët na rëmban.”

⁷ Kara ñaan në wël bi uwaasul ŋal bi, cits pëwël ni uwaas un juats wi, oo atsua ni uyëlan; par Nasien-batsi aŋal ñaan ni ka wëli ko ni ulílan.

⁸ Nasien-batsi aka pëyëlan pëwël ind bëtseend bucumal tsi ngëko bëlieng, pa ind pëka ko wi nda fier wi ngënu bëlieng, ndë ka buts ko un pe wi pa përoona ko uwar ngënu bëlieng;

⁹ bi u picana bi aja: “Nul afa, awël baranj, bëmabalul ka ci pa sandëndën.”

¹⁰ A ni ka wëli bagúur ucapi, a nuu wëland bukul pëpom pa barialaul, ka wël ind buts ucapi në watsës wul, në tsu mbuk bëmabal ind muu wiaka.

¹¹ Nul ka tsu ind un ndë ci barëmb tsi ngëko bëlieng, pa ind përits paaraar puu wël ni ngëwaas ngan fac ngi; unk, bacumal tsi undo wund, bu kë ja Nasien-batsi baran.

¹² Par uleemp bëtsënk wi, di ka ro ufier bayëman din, maa ka tsu bañaan bacumal bu ka baran Nasien-batsi.

¹³ Bu ka pikra tsi bëkat uleemp wi, bacumal ka bundan Nasien-batsi tsi bi nda niiran bi pëpiban ko wi nda ci wi undo Upetsan-uwar Këristu; ni bi ndu wël bi ni ngëwaas ngan fac ngi, tsi bi ndu faar bi ngëko ni bukul ni bañaan bëlieng.

¹⁴ A tsi bëñaan bukul pa ind, ba piban bëŋal bukul pa ind tsi undo bëtseend ban cum bi tsi ind apar-paran, bi Nasien-batsi wël ind bi.

¹⁵ Nasien-batsi na baranaan, tsi undo utseendul unjaakaatsa wi.