2 KORINTU 8 - KARÚK-PËRIM KAWALU Nouveau Testament

Bëtseend pa bafets Yeesu ban ci biki baranj di Judeeya

¹ Batsaar ni wund, wund aŋal pëleents ind uleka bëtseend Nasien-batsi di iriisia in ci yi di Masedoonia.

² Par tsi mteenamana mwiak, tsi unoor wi ba ciina wi, a ulílan bukul pelëk mak. A ba piban bi bu kë wël bi mak ni kajuab-ngëwaas, ŋal bi ba ranj bi mak.

³ Bu wël bi ba yëlan bi pëwël, a te bu wël apar-paran, bu ro ank tsi uŋal bukul.

⁴ A ba buara wund mak, pa wund wët bukul ba bof di pëtsënk bayëman di Judeeya.

⁵ Bukul bu wël apar-paran ko wi wund wejats wi; par ucäk, bu wël iyeen bukul Ajug, a ba ru wël wund tsi uŋal Nasien-batsi.

⁶ Wul ka wun wund buara Tiitu, nan juundi uleemp bëtsënk ni uwaas un fac wi, na bi nee na tuamës wul tsi ind.

⁷ A bi nda ka bunk ngëko bëlieng apelëkan, un ci wi uwak, kayël-uñakan, kameko, kamob tsi ucär, ni bëŋal bi nda yank bi di wund, nda cuman buts ni kajuab-ngëwaas tsi bëtseend bëmënts bi.

⁸ Cits utsua wi n tsu ind wun, maa pëpiban ind uŋal balon; bëŋal ind ka teenëmana ne aci bëcär.

⁹ Ind nda me bëtseend ban ci bi tsi Yeesu Këristu Ajug nja nul nan ci narëmb, a tsi undo ind na ruka ci naranj; pa nda ruka ci barëmb tsi bëranjul.

¹⁰ A tsi uleka ko wan, wi ci wun uwejats nji wi n du n wël wi, par ko wan awara pa ind, cits bi nda cakës bi përo ko wan; maa bi nda ka bi uŋal tsi ko wan, ki baneki.

¹¹ Inkri, nda tuamësi përo uleemp un jota wi, pa ind pëbandan tsi ko wi nda yëlan wi, wi nda ro wi cësara.

¹² Par uci ñaan kë wël ni uwaas u fac wi, në lílandëra tsi ko wi na ka wi; cits tsi ko wi na kaats wi.

¹³ Par tsi uŋal wund, cits pa balon pëtsua tsi pënaakësa, ind ndë ci tsi unoor; maa pëtsu ind nda liing këliing.

¹⁴ A tsi uwal inkri wi, ko un pe wunk tsi bëka ind u kësës ko wi ba katsan wi; pa unu ulon, un pe wunk tsi bëka bukul ka kësës un kats ind wi. Unk u tsu pëliing këliing,

¹⁵ bi u picana bi aja: “Nan kai arëmban, par-paranats; a nan kai ko uties, katsanats.”

¹⁶ Maa Nasien-batsi na baranaan, nan tsui yi uŋal umënts wun di uwaas Tiitu pa ind.

¹⁷ Par nul aniiran karua wund, a na pe pëtsij uŋal, a nul baaraan un pëbi di ind bërierul.

¹⁸ Wund ka yëli nalon nan tsaari ni nja nul ni iriisia bëlieng kë bëndani tsi undo Upetsan-uwar, në ci ni Tiitu.

¹⁹ Cits ko wan din, maa iriisia ratul buts pa nul pëci acints wund tsi bëyaas tsi ko wi kandola wink ni uwaas un fac wi; uleemp wi wund kë ro wi pa përëmb Ajug nul bërierul, ni përo uŋal wund uwar.

²⁰ Wund ka mob tsi përo bëtsaag, bi wund kë leempëna bi bëtsënk ban pelëk bink, pa ñaan përits jaar wund ko.

²¹ Ko wi wund pe wi pëfierand aci përo ko u mab wi, a cits tsi bërun Ajug rin; maa tsi bërun bañaan buts.

²² Wund ka wëtani nalon ni ngë tsaari, në ci ni ba yëlee biki. Nul, wund ateenaman uŋalul ngëyaas ngëcumal ni tsi ngëwal ngëcumal; maa inkri, awama piban na pe pëtsij uŋal, par afiaar ind mak.

²³ Tiitu aci acints nji ni ka leempi ni nji tsi pëncuaf ind; a tsi uleka bacints bukun, batsaar ni nja bë ci biki iriisia yëli biki, bë ci përëmb Këristu.

²⁴ Maa nda pibani tsi bërun iriisia bëŋal ind pa bukul, ni bi wund wak ind bi tsi bërun bukul.