2 KORINTU 7 - KARÚK-PËRIM KAWALU Nouveau Testament

¹ Bamiñ ba ŋal biki, bi ngë ka bink ngëwatsan ngan liing ngink, ngë jëntsandar bërier nja tsi bëtsopal uyamats, ni bi uwejats; ngë tuamës mjëntsandar tsi pëlënk Nasien-batsi.

Ulílan Pol

² Nda waants wund ngëwaas ind; kaats ñaan ni wund roi ko u waraatsa wi, wund cokats ngi ñaan, wund niamëlanats ñaan tsi koul.

³ Nji, injaats ko wan pa pëlacan ind, par man do ja ind ba, nda ci di ngëwaas wund; tsi pëcäts oo ubiira, ngë ci tsëloole.

⁴ Man ka uwats mak tsi ind, upícëni nji mak, aci ind. tsi unoor wund bëlieng, uwaas nji juabuts mak, acum ni ulílan a n par-paran.

⁵ Par ŋal uwal wi wund band wi Masedoonia, nin wund kaats pënaakësa; maa, wund kë ci tsi unoor uwiak tsi ngëko bëlieng: “ngëkam di utsand, bëlal tsi bametsu.”

⁶ Maa Nasien-batsi ni kan juabutsani ngëwaas batienkëtsan iyeen bukul, ajuabutsan wund ngëwaas, bi Tiitu baandi bi;

⁷ cits ubaandariul tsiji wun ko wan din, maa, bi nda juabëtsanul bi uwaas. Nul, aleents wund bi nda rí bi pëwinin. A na aleents wund bi nda juatsan bi, ni bi nda yëkan bi tsi uleka nji; ko wan, atsuin a n lílan mak.

⁸ Par ŋal ngëwaas ind ka juatsan tsi undo uletar wi n picandar ind wi, nji n bërats këbër. Man juatsan uler wi win wi uletar wi juatsan ind ngëwaas ko uties.

⁹ Ulílan nji inkri, cits undo bi nda juatsan bi, maa ko wi pëjuatsan ind kë tsu ind wi, aci kayaar-ibats; par Nasien-batsi tsu ind un nda juatsan, a tsi uleka wund nda rits tsua tsi ulon unoor.

¹⁰ Par pëjuatsan pan pënë-ni pi tsi Nasien-batsi, ka tsiji kayaar-ibats pa pëbuer, kan dits ki ka tsiji pëja, n do me; maa pëjuatsan pan ci pi pi umundu, ka tsiji pëcäts.

¹¹ Par nda teenan-e ko wi pëjuatsan pan pënë-ni pi tsi Nasien-batsi, tsiji ind wi! Ko wi nda tukar wi pëpiban ko wi nda ci wi! Ko wi nda ci wi ban kawarana biki! Ko wi nda ci wi balënk-Nasien-batsi; Ko wi nda tsij wi uŋal! Ko wi nda tsij wi uŋal karo-ko! Ko wi tsij wi uŋal pëtucan naro-ngëwutsëtsuel! Tsi ngëmënts ngan bëlieng, nda piban nda ci ban jënts biki tsi ko wan.

¹² Inkri, uci n picandëri ind, nin cits undo nandoi ko wan, nin nandoee ko wan; maa pa ind pëwin tsi bërun Nasien-batsi bërier ind, uŋal wi nda tsij wi pa wund.

¹³ Ko umënts wi ci wun un juabëtsan wund wi ngëwaas; a tsi wund pe tsi pëlilanaan aci bi Tiitu lílan bi, undo bi nda tsëkanul bi uwaas.

¹⁴ Par uci n du n píc tsi undo ind tsi bërun Tiitu, ind tsë kawundanin; maa bi wund ja bi wund roon wund kë leents ind ucär ngënu bëlieng, unk ko wi wund kë pícëna wi tsi bërun Tiitu, pëwinaa u ci ucär.

¹⁵ Unk, uŋalul tsi uleka ind kë pe këpe përëmb, uwal wi na les wi bi nda niiran bi përimul ind bëlieng, ni bi nda welanul bi uwar, a nduu lënk.

¹⁶ Man ci tsi ulílan mak, a n watsaraan ind tsi ngëko bëlieng.