2 KORINTU 6 - KARÚK-PËRIM KAWALU Nouveau Testament

¹ A wund biki ka leemp biki ni Nasien-batsi, wund abuara ind, ind tsë tienkëtsan bëtseend bi nda yank bi di Nasien-batsi.

² Par nul ja un: “tsi uwal u wara wi, a n te bëñaanu; a tsi unu pëbuer, a n bi pa pëtsënku.” A inkri, wi ci wun uwal u wara wi; inkri, wi ci wun unu pëbuer.

³ Wund ŋalats pëci ko wi ka tsu wi ñaan na yër, pa uleemp wund përits karaa.

⁴ A tsi ngëko ngi wund kë par-na ngi bëlieng, wund ka piban bërier wund, wund ci baleemp Nasien-batsi tsi pëliincandër, ni tsi pëjuatsan, ni tsi unoor,

⁵ ni tsi ilumbaj i wund lumbajaa yi, ni tsi përica, ni tsi pëkuala, ni tsi uleemp uñatsal, ni tsi karika-ŋooy, ni tsi karika-riala,

⁶ ni tsi bëjëntsal, ni tsi kameko, ni tsi umiira, ni tsi kawara-ngëwaas, ni tsi Uwejats-ujënts, ni tsi bëŋal ban kaats bi kanguungu,

⁷ ni tsi përim ucär, ni tsi pëyëlan Nasien-batsi, ni tsi wund pëtsij ikamanaani tsi bëmabal, puu jotëna ukam ni puu waayaraan;

⁸ uci ank tsi wund përispitaara ni përispitaraatsa, uci ank tsi wund pëcokaa itim ni pëwarandana itim, pi wund aci bafalar, wund ban ci biki bacar;

⁹ pi wund aci ba meaatsa biki, maa wund ci aatsum ba mea biki; wund ci pi wund a cäts, a wund ka yafënts bikink; wund tsua tsi unoor, a wund fiŋaatsa;

¹⁰ wund kë juatsana ngëwaas ngënu bëlieng, maa wund ci tsi ulílan; wund ci tsi bëranj, maa wund kë tsu bacumal pëci barëmb; wund ban kaats biki ko, maa wund ka ngëko bëlieng.

¹¹ Ind Bakorintu, wund aleents ind ajëntsan; ngëwaas wund awaantsa mak pa ind.

¹² Wund ricats ngëwaas wund pa ind, aci ind ric bukun ngëwaas ind pa wund.

¹³ Pa pëkakandar tsi ko u mab wi, mán ñakanaan ind pi upäts nji: Nda waantsan ngëwaas ind buts.

Përand mambofëlar ni bafetsats Këristu

¹⁴ Ind tsë bofëlar ni ba uwakats biki; bëmabal ni karika-lënk Nasien-batsi, we wi nga tsok wun? Um bi ufac ni krëm yëlan bun pëbofëlar?

¹⁵ Manteelar moom ci mun tsi Këristu ni Beliar? Oo nafets Yeesu, wee na bofara wun ni nan citsi nafetsul?

¹⁶ Kato-kayëman Nasien-batsi abof we ni icap? Par nja, ngë ci Kato-kayëman Nasien-batsi nayësal, bi nul Nasien-batsi bërierul ja bi: “Mán ciina tsi pëncuaf bukul, koo yandaar, ka ci Nasien-batsi bukul, bukul bu ka ci bañaan nji.”

¹⁷ Wul ka wun Ajug ja: “Ind, nda pëni tsi pëncuaf bukul! Nda patsësaan bukul! Ind tsë kërara ko un tsop wi, din, ka welan ind.

¹⁸ Ka ci Asin ind, ndë ci babuk nji bayënts ni bakaats; unk di nul Ajug Kayëlan-bëlieng, ja run.”