2 KORINTU 5 - KARÚK-PËRIM KAWALU Nouveau Testament

Ban cits biki tsi uliaf, a ba ci ni Ajug

¹ Inkri, nja ngë me uci kato ki ngë ciina kink tsi utsia tsi, un ci wi unkundan wi, ka coka, nja ngë ka kato tsi Nasien-batsi; kato ka leempënaatsa ki iñan, kul kan dits ki ka coka, di batsi.

² Wul ka wun, nja kë ti di bametsu unkundan wi, a ngë fier pëwaa tsëcii ni nja di batsi;

³ uci ngii tsënkaa ngë tiema ko, a ngë ruentats.

⁴ Par nja ba wama biki ci tsi unkundan wi, nja ka ti tsi pëmiepa, cits pëjaa nja ngë ŋal pëwaasar, maa pëwaa; pa ubiira pëyoor uliaf wi kan cats wi.

⁵ A na leempi njai pa ko wan, aci Nasien-batsi, a na wël nja umobanaani Uwejats.

⁶ Unk, nja ngë cum ni uwatsar kara unu, a ngë me ne, uci ngë wama ci ba tsi uliaf wi, nja ka lawan Ajug.

⁷ Par nja ka yandaaraan tsi uwak, cits tsi uwinar.

⁸ Nja ngë cum ni uwatsar, ngë pe pëfier pëpën tsi uliaf wi, pa pii ciina tsi Ajug ci tsi.

⁹ Wul ka wun, nja ngë ka përo uyëlan pa pëci biki Ajug kë lílandër biki; ŋal nja ka wama ci tsi uliaf wi, oo ŋal nja ka pën tsi uliaf wi.

¹⁰ Par nja bëlieng, ngë ka pëband di tsëko Këristu tsi kawat-pëleents, pa nan ci, në yank bëluk ko wi na ro wi, uwal wi na wama wi ci tsi uliaf wi; u ci ank uwar, oo u waraatsa wi.

Uleemp pëtsu manteelar

¹¹ A tsi inkri, wund ame ko un ci wi pëlënk Nasien-batsi, wund ka tsas pëbaar pëtsu bañaan ba fiaar; Nasien-batsi ame wund, a nji a n fiaar, ind tsi ngëwejats ind nda me wund buts.

¹² Wund rutse ka leents ind bëci wund bërier wund, maa, wund ka wët ind ndë bundanaa tsi uleka wund; pa ind pëyëlan pëyankës biki kan tsas biki pëbëndana tsi uwinaraa bukul, a cits tsi ngëwaas.

¹³ A uci wund katse ka uwejats, aci-undo Nasien-batsi; maa uci wund ka uwejats aci pa ind.

¹⁴ Par bëŋal Këristu acum tsi wund; a tsi uwejats wund, bi ñaan naloole cats bunk pa bañaan bëlieng, inkri bañaan a cäts bëlieng.

¹⁵ A nul, a cätsar bañaan bëlieng, pa biki ka yafënts biki, bu katse ka yafëntsar iyeen bukul bërier bukul, maa bu ka yafëntsar nan catsar unk bukul, a na natsee di pëcäts pa bukul.

¹⁶ Unk, pëpën tsi inkri, wund tsi uyamats, wund kaats ñaan ni wund mei. A uci wund ro me Këristu tsi uyamats, tsi inkri, cits unk di wund meul run.

¹⁷ Unk, uci ñaan ci tsi Këristu, nul aci ñaan nawalu; ngëjon apar, a ngëwalu ruka ngink aci.

¹⁸ A ngëko ngan bëlieng, apënë-ni tsi Nasien-batsi, nul nan tsui njai a ngë teelaraan ni nul tsi Këristu; a na wël nja uleemp pëtsu bañaan ba kak ba teelar.

¹⁹ Par Nasien-batsi ci tsi Këristu, a nuu kakan bañaan umundu ba teelar ni nul bërierul; a teenats ngëjuban bukul, maa na wël nja përim pëtsu bañaan ba kak ba teelar.

²⁰ Bi u ci bank, wund aci baciir Këristu, a wund biki Nasien-batsi ruuni ind bukun. tsi katim Këristu, wund abuara ind nda teelari ni Nasien-batsi.

²¹ Nul Këristu nan kaatsi ujuban, Nasien-batsi tsul a na ci ujuban; pa tsi nul, nja ka ci bëmabal Nasien-batsi.