2 KORINTU 4 - KARÚK-PËRIM KAWALU Nouveau Testament

Bëka tsi kagij

¹ Par Nasien-batsi tsi kayëk-ipësul, awël wund uleemp wi, a cätsanats wund ngëwaas.

² Maa wund abër përo ngëko ngan beka ngi, ngan kawaran ngi, wund ri ka yandaar tsi maniamëlan, a wund ri ka cík përim Nasien-batsi. A bi wund kë piban bi ucär, wund kë tsas pëgañaar ngëwejats bañaan bacumal tsi bërun Nasien-batsi.

³ A uci Upetsan-uwar wund wama kunda, akundaa pa biki ka niam biki,

⁴ pa ban fiaarats biki; biki nasien-batsi umundu wi kuelëtsan biki uwejats, pa bukul tsë win ufietsar Upetsan-uwar përëmb Këristu, nul nan ci bënaam Nasien-batsi.

⁵ A cits undo wund bërier wund, wi wund kë leents wun, maa uleka Yeesu Këristu Ajug wi wund kë leents wun. A wund bërier wund, wund aci këci baleemp ind tsi undo Yeesu.

⁶ Par Nasien-batsi na njai: ufac fietsan tsi pëncuaf krëm; a nul bërierul fiets un di ngëwaas nja pa pëwël nja ufac ume përëmb Nasien-batsi tsi urostu Këristu.

⁷ Maa bëka bëmënts bi, ngë tsijëna bul tsi kagíj; a u jëntsi nja pëyëlan pa n jaakaatsa pink aci pi Nasien-batsi, cits píic inja.

⁸ Wund anoorana mak, maa wund juatsaants; wund pikërëna mak, maa wund niamanats uwats.

⁹ Wund kë noor-noorana, maa wund bëraats; wund agutsaa tsi utsia, maa wund catsats,

¹⁰ a ngënu bëlieng, wund tsij tsi ngëliaf wund pëcäts Yeesu, pa ubiira Yeesu pëpibana buts tsi ngëliaf wund.

¹¹ A nja ba wama biki ka yafënts, nja ka tsua tsi pëcäts ngënu bëlieng tsi undo Yeesu; pa ubiira Yeesu pëpibanaa buts tsi ngëliaf nja ngan cats ngi.

¹² Unk, pëcäts ka leemp di wund, a ubiira kë leemp di ind.

¹³ Maa, bi wund bof bi uwejats uloole tsi uwak, bi u picana bi aja: “Nji ma wak, wul ka wun ñakan.” Wund buts, wund awak wul ka wun, wund ñakan.

¹⁴ Par wund ame, na natsani unk Yeesu Ajug di pëcäts, kee natsani wund un buts ni Yeesu; në tsu wund ni ind tsi bërunul.

¹⁵ A ngëko ngi wund kë par-na ngi bëlieng, aci-undo ind; pa bëtseend pëwatsësar, bañaan bacumal ka ruka cum ni pëbaran Nasien-batsi, pa përëmbul.

¹⁶ Wul ka wun, ngëko ngan catsanatsi nja ngë waas; ŋal bëci nja tsi uliaf kë pe këpe pëcoka, maa bëci nja tsi uwejats, kara unu buu kak buwalu.

¹⁷ Par unoor nja urafal inkri, ka tsiji nja përëmb pa n jaakaatsa pi, pan dits pi ka ba; pan pe pi unoor inja.

¹⁸ Nja ngë tsuuts ibatsi njatsi ngëko ngi ka wina ngi, maa tsi ngan dits ngi ka wina; par ngëko ngi ka wina ngi, aci ngan dits ngi ka jon; a ngan dits ngi ka wina, ci ngan dits ngi ka ba.