2 KORINTU 3 - KARÚK-PËRIM KAWALU Nouveau Testament

Uwarara uleemp mak tsi Karo-pëloole kawalu

¹ Ane wund ka kur kak pëpiban ind ko wi wund ci wi bërier wund-a? Oo, ane wund afier pëpiban ind ngëletar ngi kan piban ngi ko wi wund ci wi, oo ngi kan pëni ngi di ind, pi balon fier pi-a?

² Uletar wund aci ind, un picana wi di ngëwaas wund, wi bañaan bëlieng me wi; a bañaan bëlieng kë layir wul.

³ Awina nda ci uletar Këristu wi na tergaar wi tsi uleemp wund. Wul un picanaatsa wi ni untíint, maa ni Uwejats Nasien-batsi nayësal; un picanaatsa wi tsi itagëba ilaak, maa tsi itagëba uyamats, tsi ngëwaas.

⁴ Uwatsar pi umënts wi, Këristu ka un wund ka wël tsi bërun Nasien-batsi.

⁵ Cits pëjaa wund bërier wund ka bukun pëyëlan përo ulon ko, pi apënë-ni tsi wund; maa tsi Nasien-batsi, tsi pëyëlan wund pënë-ni tsun.

⁶ Nul ci-un na wël wundi pëyëlan pëci baleemp tsi Karo-pëloole kawalu. Cits tsi upic, maa tsi Uwejats; par upic ka fiŋ, maa Uwejats ka wël wun ubiira.

⁷ A uleemp wi kan tsiji wunk pëcäts, un jisa wi ngëletar tsi ilaak, uci u tsiji përëmb mak, te babuk Israel yëlanats pëkaŋan urostu Moises këkës, undo përëmb pi kan fiets pi tsi urostuul, pul pan dits pi ka jon,

⁸ um bi uleemp Uwejats dits bun ka pe këpe pëtsiji përëmb?

⁹ A uci ulua wi kan lacan wi ñaan rëmbana, a um bi ulua wi kan tsu wi ñaan na mab, dits run ka pe këpe pëtsiji përëmb?

¹⁰ Par undo wunk ka rëmbana uwal ujon, bi u ci bank, katse rëmbana, undo un pe wi wul përëmbana.

¹¹ A uci wi kan par wi këpar tsij përëmb, wi kan ci wi pa sandëndën ka pe këpe pëtsij përëmb.

¹² A bi wund ka bi uwats wan, wund ka roona bëyeentsal;

¹³ wund ri ka ro pi Moises, nan kundi urostuul ni ulec pa babuk Israel përits win utuami ko wi kan par wi këpar.

¹⁴ Maa ngëwejats bukul atúar. Te unu untsari, aja ngëlibëru Karo-pëloole kajon kë layira, ulec umënts wun ka wama ci, wul pënanaatsa, par tsi Këristu tsi u pënanaana tsun.

¹⁵ Maa te unu untsari, aja ngëlibëru Moises kë layira, ulec umënts wun ka kund ngëwaas bukul.

¹⁶ Maa uwal wi ñaan witsësa wi aniiran Ajug, ulec ka pënanaa.

¹⁷ Te, Ajug ci-un Uwejats, a tsi Uwejats Ajug ci tsi, pëfacana aci tsul.

¹⁸ A nja bëlieng ban kundësa biki ngërostu, nja kë piban përëmb Ajug pi kateenaraani, unk ri ngë ci run ban butana biki bënaam, pa pënaam ni Ajug. A nja kë pën tsi përëmb pëya përëmb pan pe pi; umënts wan apënë-ni tsi Ajug, nul nan ci Uwejats.