2 KORINTU 2 - KARÚK-PËRIM KAWALU Nouveau Testament

¹ Iink ri n baaraandun nji bërierin, pëkatse pëbi di ind ni unjuatsia.

² Par uci n juatsan ind ngëwaas, yën ka tsuin un ka lílan, un cits wi ni n juatsan unk uwaas?

³ Man picari ind ko wi, pa ubaandi nji, in dits n juatsan tsi ban do biki ka pëlilanin uwaas. Ma me uwar uleka ind bëlieng, a me ulílan nji ci buts wiic ind bëlieng;

⁴ par tsi pëncuaf unoor uwiak ni pëjuatsan pëwiak di uwaas, a n picandëri ind, a ndu ŋand mak; cits pa pëjuatsan ind ngëwaas, maa ind pëme ne bëŋal bi n tsij bi pa ind ndu ñëaanarëmb.

Pëjampësa na laci

⁵ Par uci ñaan ka un unjuatsia ci, cits nji ni na juatsan un uwaas, maa ind bëlieng; pa nji përits parëparan aci balon tsi ind.

⁶ Pa namënts un, unoor wi bacumal tsuul wi aliing.

⁷ Wul ka wun, nda rukaan nda jampësaul, ndë juabëtsanul uwaas pa na rits tuamanaan pëjuatsan pan dëmb pi.

⁸ Ko wi ndu ñëaan ind wi, aci ind pëpibanul nda ŋalul.

⁹ Par, ko un ka wi a n picari ind buts, aci pa pëteenaman ind ne nda ci tsi përo ngëko nginja ind ngi bëlieng.

¹⁰ A ni nda jampësee ulon ko, nji buts ma njampësaul. Par tsi ucär, ucnjampësa ñaan ko tsi undo ind, aci tsi bërun Këristu tsi njampësaul tsun;

¹¹ pa n ja tsë ci biki Ujabël kë fal biki, par ngë paaŋats ngëwejats wul.

¹² A bi n band bi Troas pa pëleents Upetsan-uwar Këristu, a Ajug waantsin pëlëman.

¹³ Nji n kaats pëfac tsi uwejats nji, par nji n tsënkats Tiitu, natsaar ni nji; din, a n patsësa bukul a n tsëp Masedoonia.

Pëkuk tsi Yeesu Këristu

¹⁴ Maa Nasien-batsi na baranaan, nul nan tsunjai a ngë kuk tsi Këristu pa sandëndën; a tsi nja na tsu Këristu na meaa tsi tsëko tsan ci tsi ba këci, pi pëñal ulicar garandar pun.

¹⁵ Par tsi Nasien-batsi, ngë ci pëñal Këristu pëlílal; uci ank ban ci biki tsi pëbuer, ŋal ban ci biki tsi pëniam.

¹⁶ Pa ban ci bukun tsi pëniam, aci pëñal pëcäts pi kan fiŋ pi; maa ban ci biki tsi pëbuer, aci pëñal ubiira pi ka wël pi ubiira. Maa, yën kësar un uleemp umënts wan?

¹⁷ Par wund cits pi balon bañaan bacumal, biki kan júlats biki përim Nasien-batsi; maa, tsi Këristu, wund kë ñakan ni ucär tsi bërun Nasien-batsi, bi nul Nasien-batsi yëlii wund bi.