2 KORINTU 13 - KARÚK-PËRIM KAWALU Nouveau Testament

Karuk-ibats, ni kawël-mboos katuamë-ni

¹ Uyaas uwaajantsan ci wun wi, wi ndu n bi wi di ind. Ko un ci wi, aka pëbaaraan pëci ucär, uwal wi bamaatir batëb oo bawaants bof wi përim.

² Mando nja ba ko wan, a nji n kaka ink ka nja wul, bi ndo bi n ja wul uyaas utëbantsan; maa inkri bi n maatirats bink, mánja ko wan bando biki jon ki ba juban ki, ni balon kak; uci n bi rul bëyaas bëcints, in di ka njampësa bukul.

³ Bi nda ŋal bunk pëme uwar bi Këristu kë ñakanaan bi tsi nji, nul nan citsi nan dafi tsi ind, maa apiban pëyëlan tsi ind.

⁴ Par nul arieŋa di kruus tsi undo bërafalul; maa na kak aci nayësal tsi pëyëlan Nasien-batsi. Wund buts wund aci barafal tsi nul, maa wund ka kaana ubiira tsi nul tsi pëyëlan Nasien-batsi, pa përo uleemp pa ind.

⁵ Nda teenamani iyeen ind bërier ind, pa ind pëme ne nda wama ci ank tsi uwak. Nda wejatsari bërier ind. Nda yëkëranats bërier ind Yeesu Këristu ci ri ind-a? Ucits ank, nda ci ba yër biki tsi pëteenamana.

⁶ Maa, man nja ne ndu yëkëran wund cits ba yër biki tsi pëteenamana.

⁷ Wul ka wun, wund aci tsi pëñaan Nasien-batsi pa ind tsë ro ulon ko u waraatsa wi; maa pa ind përo uwar, ŋal bi u naam bi wund ayër. Cits pëjaa wund aci ban par biki tsi pëteenamana,

⁸ par wund kaats pëyëlan pi kan kaman pi ucär, maa aci pa pëkamandër ucär baŋ.

⁹ Wund ka lílan tsi uwal wi wund raf wi a ind nda liinc, umënts wan ci wun ko wi wund kë ñaan wi, bëliincal ind.

¹⁰ Wul ka wun, man pican ngëko ngi uwal wi n cits wi ni ind; pa u ci nji ni ind, in dits ndoon ind uyëlan tsi pëyëlan pi Ajug wëlin pi pa puu liinc-liincanaan bañaan; maa cits pa pëcok.

¹¹ A tsi utuami batsaar ni nji, nda ciin ni ulílan, nda leempari pëci ba band biki, nda liinc-liincandari, nda teelari, nda ciin tsi pëfac. Nasien-batsi bëŋal ni pëfac ka ci ni ind.

¹² Nda wëlari mboos tsi mawunkëlër myëman. Bayëman bëlieng bë leen ind.

¹³ Bëtseend Yeesu Këristu, ni bëŋal Nasien-batsi, ni manteelar tsi Uwejats-ujënts nga ciin ni ind bëlieng.