2 KORINTU 12 - KARÚK-PËRIM KAWALU Nouveau Testament

Bëwinal Pol

¹ Afiera nji pëbëndan been nji, ŋal bi pa kaats bi bëkat. Maa, mán ñakanaan uleka buwinal bi Ajug wëlin bi, ni ngëko ngi na pibanin ngi.

² Ma me nalon ñaan tsi Këristu, wul ro wink ngëwaanu untaaja ni ngëbaakër ki na ro ki waja te di batsi buwaajatsan; uci ank tsi uliaf uu, ane apën tsi uliaf uu, nji n meets; Nasien-batsi me un wul.

³ Uci ank tsi uliaf uu, ane apën tsi uliaf uu, nji n meets, Nasien-batsi me un wul;

⁴ maa, nul ajeja atsëpaanda te di tsëko-ngëlílal, a na te irim i yëlaatsa yi pëja, yi ñaan-najin niiranaatsa yi pëleents.

⁵ tsi uleka ñaan namënts un, man yëlan pëbëndan been nji; maa tsi uleka nji, man bëndanaan been nji tsi bërafal nji baŋ.

⁶ Uci n ŋal pëbëndan been nji, in cits nafuur, par mán leents ucär. Maa mán wët pëbëndan been nji, pa ñaan përits fierandin na pean ko wi nu win wi tsi nji, ni wi nu te wi.

⁷ A nji përits cum ni pëbëndan been nji tsi undo ngëko ngëwar mak ngi Nasien-batsi pibanin ngi, a n tsuaa kayu tsi uyamats nji; ulon uwaanju Useetaani atsua pëwaŋin tsi kambakats, pa nji përits bëndan been nji.

⁸ A tsi undo ko wan, ngëyaas ngëwaants a n ñaan Ajug na pënanin kul;

⁹ maa, nul na jain: “Bëtseend nji aliingu, par pëyëlan nji ka pibandaraan tsi bërafalu.” Unk, mán pe puu pëbëndan been nji tsi bërafal nji, pa pëyëlan Këristu pëci tsi nji.

¹⁰ Wul ka wun n du n lílan tsi bërafal nji, tsi ikar, tsi ngënjuatsia, tsi pënoor-noorana, ni tsi pëtsua tsi unoor undo bëŋal Këristu. Par uwal wi n ci wi tsi bërafal, din, ka ruka ci na liinci.

Pol, awejats bañaan Korintu.

¹¹ Man duka n ci nafuur, maa ind tsuin bukun pëci ank. Ind ro bukun ka pëbëndanin, par ŋal bi n cits bi ko, in kaats ko wi n peena wi pëci naties tsi ba n jaka bukunk bapostolu bawiak mak.

¹² Ngëpibanaani pëci Napostolu arolaa tsi pëncuaf ind, umiira tsi mteenamana man ci mi ba këci, tsi ngëpibanaani tsi ngëko ngan pikra n ngi, ni tsi pëyëlan.

¹³ Par tsi we tsi nda peena tsun pëtiesëtsana tsi bërun ilon iriisia? Ucits ba undo bi n cits bi pëyunts pa ind. Nda jampësain kamabats kamëntsa ki.

¹⁴ Nda teenan-e, nji n yecis ink pëbi di ind uyaas uwaajantsan; a nji, in di ka n ci pëyunts pa ind, par nji n tsasats bëka ind, maa ind bërier ind. Cits upäts ka jukëlën bukun pa basin bukul, maa basin bukul ka jukëlën bukun pa upäts bukul.

¹⁵ Nji tsi uŋal nji, man wël bëka nji ni ulílan, a ndu n wël ubiira nji bëlieng pa undo ngëwaas ind. Uci n ŋal ind mak, ka ŋalaa ko uties a?

¹⁶ A bi uci bank, nji n cits pëyunts pa ind. Maa ŋal bi n ci bi nalipal, man mobunan ind tsi karo-bëlipal.

¹⁷ Ane ma niamëlanaan ind tsi nalon tsi biki n yëli bukunk di ind-a?

¹⁸ Man buara Tiitu a n yëliul ni nalon natsaar ni nja ane Tiitu a bi niamëlan ind-a? Cits bëro bëloole tsi uwejats bi nja kë ro bun-a? Nja, cits iyots iloole imënts yi, nja kë fets yun-a?

¹⁹ Nda jon tsi pëwejats koo ja, wund aŋal pënatsar iyeen wund tsi bërun ind. Wund ka ñakan tsi uŋal Këristu tsi bërun Nasien-batsi. A ngan bëlieng, aci pa pëliincan ind, ind ba ŋala biki.

²⁰ Maa ko wi lënk wi, nji përits tsënk ind bi n ŋal bi, ubaandi nji; a ind buts pëwinin, tsi ko un pats wi ni wi nda ŋal wi. Ko wan ka tsiji pëŋom tsi pëncuaf ind, mankocar, uriab, mankicësar, ka jaar bañaan ngëwutsëtsuel, mankuetar, manguukandër, kangusëlar.

²¹ Man lënkar ubi nji bëyaas bëcints, Nasien-batsi nji përits kawaranin tsi pëncuaf ind ka ci tsi pëkaanar bacumal ban juban biki ki këlum a bë yaarats ibats tsi ngi ba ro ngi: ngëko ngëtsopal, katuk-ufuts, pëwëtandar tsi ngëko katuk-ufuts.