2 KORINTU 1 - KARÚK-PËRIM KAWALU Nouveau Testament

Kawël-mboos kajuudë-ni

¹ Pol, Napostolu Këristu Yeesu tsi uŋal Nasien-batsi; ni Timoteu na tsaar ni nja tsi uwak, pa Ngëriisia Nasien-batsi ngan ci ngi di Korintu, ni bayëman bëlieng ban ci biki di Akaaya bëlieng.

² Nasien-batsi Asin nja ni Yeesu Këristu Ajug, ba wëlan ind bëtseend ni pëfac.

Pol abaran Nasien-batsi

³ Nasien-batsi na bëndanaan, Asin Yeesu Këristu Ajug nja nul nan ci Asin kayëk-ipës kan ci ki ba këci, a na ciind Nasien-batsi kajuabëtsan ngëwaas kan ci ki ba këci.

⁴ Nul ka kajuabëtsan wund un ngëwaas tsi unoor uwiak bëlieng, pa wund pëyëlan buts pëjuabutsan ngëwaas ban ci biki tsi unoor uwiak wi ba ciina wi ba këciina. Wund ka kajuabutsaan bukul ngëwaas, ni kajuabëtsan ngëwaas ki wund yank ki bërier wund di Nasien-batsi.

⁵ A bi unoor Këristu cum bi tsi wund, unk buts di kajuabëtsan ngëwaas wund tsi Këristu cum dun.

⁶ Uci wund ci tsi unoor uwiak, aci-undo kajuabëtsan ngëwaas ind ni pëbuer ind; a uci wund juabëtsana ngëwaas, aci-undo kajuabëtsan ind ngëwaas, ndë yëlan pëmiira ngënoor ngëloole ngi wund par-na ngi buts.

⁷ A uwats wund tsi uleka ind aci u liinc wi. Wund ame, bi nda bofëna bi tsi ngënoor wund, unk buts bi ndu ci bun tsi kajuabëtsana-ngëwaas.

⁸ Batsaar ni wund, wund ŋalats pëwët ind tsi kameets unoor un baandë-ni wund wi di Aasia; pëyunts pan pe wund pi uyëlan, a wund katse watsar pëka ubiira.

⁹ Maa tsi wund bërier wund, wund ate, wund ruka tsuura pëcäts; a wund katse watsaraan iyeen wund bërier wund, maa wund watsaraan Nasien-batsi ni ka natsanii bacäts.

¹⁰ Nul bueran wund un tsi pëcäts pëmënts pi, ka bueran wund un kak; nul ni wund watsaraan un, ka bueran wund un.

¹¹ Ind buts nda tsënk wund ni bëñaan ind, unk bëtseend bi wund kë ka bi tsi bañaan bacumal biki ka ñaanar wund biki, ka ruka ci kabaran Nasien-batsi mak tsi undo wund.

Bëtsaag Pol abut

¹² Par ko wi wund kë pícëna wi, ci wun wi: “Ko wi uwejats wund leents wi, aci pëci tsi umundu ni pëpe pëci ni ind tsi bëjëntsal, ni pëmob tsi ucär un pënë-ni wi di Nasien-batsi; cits tsi kameko ñaan-najin, maa tsi bëtseend Nasien-batsi.”

¹³ Par wund ri ka picari ind ko ulon, ucits ba wi ndu layir wi, ndë me. A n watsar ne, tsi utuami ndii me bëlieng,

¹⁴ bi nda me bink ba ko ulon tsi wund; par wund ci bukun ko wi ndu pícëna wi, nda ci buts wiic wund tsi Unu Yeesu Ajug inja.

¹⁵ tsi uwatsar wi, man wejats pëbi bërun di ind, pa ind pëyank bëtseend uyaas utëbantsan;

¹⁶ a uu ba, ka pën di ind ka tsëp Masedoonia kee pëni di Masedoonia kak ka witsee di ind; pa ind pëyecis bëyaas nji pa Judeeya.

¹⁷ Bi n baar bi uwejats umënts wan, man dafan kërafan wël-a? Oo uwejats nji, aci buwejats ñaan-najin tsuin bun pëja: Eey-e, ka jaand an-a?

¹⁸ Maa Nasien-batsi aci namabal, përim wund pa ind cits pëja Eey-e ni an-a.

¹⁹ Par Abuk Nasien-batsi, un ci wi Yeesu Këristu, cits nan ci Eey-e ni an-a. Maa Eey-e aciina tsi nul! Nul ni wund leents ind un, nji ni Silwaanu, ni Timoteu.

²⁰ Par nul Yeesu ci-un nan ci Eey-e tsi ngëko bëlieng ngi Nasien-batsi watsan ngi bañaan. Wul ka wun, tsi nul nja kë ja Ameen, pa përëmb Nasien-batsi.

²¹ Nasien-batsi ci-un ni ka liincan wundi ni ind tsi Këristu, nul nan datnjai.

²² A nul markaar nja un ni umarëkaul, a na tsu umobanaani Uwejats di ngëwaas inja.

²³ Inkri, nji mán du Nasien-batsi në ci namaatir tsi undo ubiira nji; aci-undo pëjojan ind ka wun n witsaatsee Korintu.

²⁴ Cits pëja ne wund ka yëlanar ind tsi uwak ind, maa wund ka leemp ni ind tsi undo ulílan ind; pa uwak ind pëliinc.