2 JOŊ 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Najëŋal, pa ŋaats nan data unk, nul ni upätsul bukul biki n ŋal biki tsi ucär; te cits nji koorin, maa bañaan bëlieng ba me bukunk ucär buts.

² Par tsi undo ucär un ciina wi tsinja a u ru ci ninja pa sandëndën.

³ Bëtseend ban pënë-ni bi tsi Nasien-batsi Asin, ni tsi Yeesu Këristu, Abuk Asin, ba ciin ni nja ni kayëk-ipës, ni pëfac, tsi ucär ni bëŋal.

ucär ni bëŋal

⁴ Man ci ni ulílan mak bi n tsënk bi balon tsi upätsu kë yandaar tsi ucär, pi utsua wi ngë yank wi di Asin.

⁵ A tsi inkri, ŋaats, man ñaanu nda ju ngë ŋalëlar tsi ngë ci tsi; cits utsua uwalu wi n picariu wun, maa wi ngë ka wi ki ujuundi.

⁶ A bëŋal ci bun bi: Nja pëyandaar bi ngëtsuaul tsu bi. A umënts wi ci wun utsua wi nda te wunk ki ujuundi: Ind pëyandaaraan tsi bëŋal.

⁷ Par bafalar bacumal agara jëk umundu, ba niiranats biki Yeesu Këristu biini uyamats; namëntsan ci-un nafalar ni na Natsara-kandata.

⁸ Ind bërier ind, nda rukan ibats pa ind përits niaman ko wi wund ro wi tsi ind, maa pa ind pëyank bëluk ban kës bi.

⁹ Ñaan nan tsëpi ba këtsëp alawan mak, na mobatsi tsi bëjukan Këristu, kaats Nasien-batsi; maa na mobi tsi bëjukan bëmënts bi, namëntsi aka Asin na kaand Abuk.

¹⁰ Uci ñaan bi tsi ind a na tsijatsi bëjukan bi, ind tsë welanul di kato ind; nin ind tsë jaul: “Baandi uwar!”

¹¹ Par na n jauli baandi uwar, abofëna tsi ngëko ngi nuu ro ngi nga waraatsa ngi.

¹² Man wama ka ngëko ngëcumal pa pëpicandëri ind, maa in ŋalats përo ko wan tsi kakaarta ni untíint; par man wejats pëbi pëwin ind pa nji pëñakanaan ind ni përim, pa ulílani njapëci-un kës wi.

Kawël-mboos katuamë-ni

¹³ Upats ŋaats nan tsaari ni wi, nul nan datee, aleeniu.