1 TIMOTEU 6 - KARÚK-PËRIM KAWALU Nouveau Testament

Ko wi baluek ka wi përo

¹ Ba moba biki bëlieng pëluek, ba moban bawiak bukul ni urispiitu bëlieng, pa katim Nasien-batsi, ni bëjukan tsë karaa.

² A baluek ban ka biki bawiak ba uwak biki, bukul tsë teenëna bi bawiak bukul ci bi batsaar ni bukul, ba rits tsu bukul ko. Maa bu ka puu pe këpe pëleempar bukul uwar, undo bi bawiak bukul ci bi ba uwak biki, ba ŋala biki a ba ka bëkat tsi uleemp baluek bukul uwar. Jukani ngëmënts ngun, kuu tseend bañaan ibats tsi ngul.

Kaŋal-uncaam

³ Uci ñaan ci tsi pëjukan bulon bëjukan, uci na mobats tsi irim Ajug nja Yeesu Këristu, yul irim iwar, uci na mobats tsi bëjukan ba yuk bi tsi pëlënk Nasien-batsi,

⁴ ñaan namënts un aci ni mguukandër kuelëtsani, a te meets ko. Yësats koon këyës, par mantotëlër ni mŋom mi na ciina mun. Ci wun ko wi kan tsiji wi karí-ko, pëŋom, ikar, ma njafar ma waraatsa mi,

⁵ ni mŋom man dits mi ka ba, mi bawaraats ngëwejats a bu katse me ucär, a ba ja ne pëlënk Nasien-batsi ka tsiji pëka bëka.

⁶ A te aci ucär: Pëlënk Nasien-batsi ka tsiji ñaan pëka bëka mak, uci na liing tsi ko wi na ka wi.

⁷ Par, kaats ko wi ngë tsiji wi tsi umundu, unk buts ngë yëlanats pëtsëpand ko.

⁸ Bi u ci bank, uci ngë ka bariala ni iŋi-bëtiem, u liing inja.

⁹ Maa baŋal pëci barëmb, bu ka ci tsi mteen-teenana, bu ka moba tsi pëgungan, ni tsi përi ngëko ngëcumal ngi kakaats-ibats a nguu tsiji ujuatsal, ngi kan cok ngi bañaan a nguu niaman bukul.

¹⁰ Par, kaŋal-uncaam ka tsiji kun ngëjuatsal bëlieng; aka ba mob biki tsi pëtsas wul aa ba pën alawan uwak, a ba tsu iyeen bukul tsi ngënoor ngëcumal.

Ngëlon tsi ngi Pol ja ngi Timoteu na ro

¹¹ Maa wi, ñaan Nasien-batsi, túkan ngëmënts ngun; moban tsi bëmabal, ni tsi pëlënk Nasien-batsi, ni tsi uwak, ni tsi bëŋal, ni tsi umiira, ni tsi kajuab-uwaas.

¹² Kamani ukam u wara wi, wi uwak; moban liincan ubiira un dits wi ka ba, wi m duuree wi, a m leents uwar uleka uwaku, tsi bërun bacumal ba maatir biki.

¹³ Tsi bërun Nasien-batsi, nawël ngëko bëlieng uyafënts, ni tsi bërun Këristu Yeesu, na leentsi uwar tsi bërun Ponsiu Pilaatus uleka uwakul, ko wi n du n tsuu wi përo ci wun wi:

¹⁴ Moban tsi utsua, wul un tsopats wi, a kaats ulaci; moban tsi wul aa upibandari Ajugnja Yeesu Këristu.

¹⁵ Pëpibandariul, aci Nanaakal ka pibani un pul, uband uwal un yecisa wi, nul baŋ Na tsijëna-pëyëlan, Nasien basien, Ajug bajug.

¹⁶ Nul baŋ ci-un nan kaani karika-cats; aciina di ufac un tsënkanaatsa wi pëwokan; ñaan winats wul, a te ñaan yëlanats pëwin wul. Urispiitu, ni pëyëlan pan dits pi ka ba, aci pa nul. Ameen!

¹⁷ Tsuun barëmb umundu wi përits guukandër, ni përits tsu uwats bukul tsi bëka ban dits bi ka fiaara; maa ba tsuun uwats bukul tsi Nasien-batsi, nul na njai na roon nuu wël nja ngë ko bëlieng, ngan kës ngi, pa n ja pëlilanaan.

¹⁸ Jaan bukul ba ci tsi puu ro uwar; ba ciin barëmb tsi karo ngëwar, batseend ni ibats in fac yi, bu ka ciind ban yecis biki puu faar ni bañaan.

¹⁹ Unk di bu kuu jukëlën dun bëka buwar, bëliincal, pa tsi bërun, pa bukul pii tsënkan ubiira un ci wi ubiira ucär.

²⁰ Wi, Timoteu! Gaangan uwar ko wi m tananaa wi, kuu rand ngëñakan karika-rispitaar Nasien-batsi, ni irim mantotëlër in ci yi kafal maa a i jaka aci ume;

²¹ aka ba nja biki, bu mob tsi ume umënts wan, maa tsi përo ank bu pën alawan uwak. Bëtseend ba ciin ni ind.