1 TIMOTEU 5 - KARÚK-PËRIM KAWALU Nouveau Testament

Tsi uleka batsafal, ni bacätsëndan-bayën bukul

¹ Cats leentsar natsafal ni irim itambal, maa tseendanul ibats, pi aci asinu. Moban ipaas pi nda tsaar,

² ŋaats natsafal pi aci aninu, ŋaats nan tsafatsi pi nda tsaar; kuu ro ank tsi ko un jënts wi cës.

³ Ban cätsëndan biki bayën bukul a ba baaraan përuka unk, këmandi bukul.

⁴ Maa uci nan catsëndani ayënul ka upäts oo batiemi, ba pibani bërun ba lënk Nasien-batsi, tsi ngi ba ka ngi puu roor bañaan kato bukul, pa pëlukëna ban buk biki bukul, ni batiem bukul; par ko umënts wun aci u líl wi tsi bërun Nasien-batsi.

⁵ Nan catsëndani ayënul a na baaraan përuka unk, a na ci koorul baŋ, namënts un atsu uwatsul tsi Nasien-batsi, a bërëm ni pënak nuu tambandar tsi pëyep bëtsënk, ni tsi bëñaan.

⁶ Maa nan catsëndani ayënul a na mob tsi ngëko umundu wi, a cäts, ŋal bi na wama bi ka yafënts.

⁷ Tsuun bañaan ngëmënts ngun, pa bu ka ci ban kaats biki ulaci.

⁸ Uci ñaan dits ka këmand bayëtsul, andes bañaan katoul, namënts un awëtan uwak, a na pe ñaan na wakatsi pëwaraatsa.

⁹ Pa nan catsëndani ayënul pëpicana katimul, kaats pëci na netsee ka ngëwaanu ngëntaaja paaj; a te aka pëci na nimee uyaas uloole;

¹⁰ aka pëmeanda karo ngëwar: Uci na kus upätsul uwar, a na ci nawelan bañaan, a nuu ñaw bayëman itsiim, a nuu tsënk ban juatsan biki, a na ci na mobi tsi puu ro ko u wara wi-ba këwara përo.

¹¹ Maa ba netse biki ka ngëwaanu ngëmënts ngun a ba cätsëndan bayën bukul, pokan itim bukul pëpicanaa. Par, ibats pëlofënts bayënts bi ka pënan bukul tsi Këristu, din bu ka ŋal pënima;

¹² Unk, u tsu bukul pëlacana, uleka bu wëtan uwak bukul ucak;

¹³ a bu kë tsuunkand karo-ko, a ba ja ba roon bu kë yaana ito. A te bë cits batsuunk rin, maa bu buer uñakan, a bu kë tsu mtum bukul tsi ngëko bañaan, bu kë ja ngi ba kaats ngi pëja.

¹⁴ Wul ka wun, ma ŋal ba nima, bukul ban kaats biki ngëwaanu ngëmënts ngun; ba nimaan, bu ka buk, bu kë këmand ito bukul. Unk, nabër dits wëla bëga bujaani ngëwutsëtsuel.

¹⁵ Par, balon tsi ban cätsëndan biki bayën bukul pën bikink ba tsi bëga bucol, a bu kë fets Useetaani.

¹⁶ Uci ŋaats na waki ka ban cätsëndan biki bayën bukul tsi bañaan katoul, na këmandi bukul; kaats pëci pëyunts pi Ngëriisia kë yuntsl pi. Unk, Ngëriisia ka yëlan pëkëmand ban cätsëndan biki bayën bukul a bu kaats nakëmand bukul.

Tsi uleka ban tsua biki bajëŋal di Ngëriisia

¹⁷ Ban tsua biki bajëŋal di Ngëriisia a bu kë leemp uwar uleemp kayër-bërun, bu tsënkan puu wëla urispiitu un kës wi mak, andes bajëŋal ban ci biki tsi unoor kaleents-përim, ni bëjukan.

¹⁸ Par, Bëpican aja: “M di kë tan mtum uyët-ukas un ci wi tsi uleemp kapoos;” a ba kaka ja: “Naleemp, aka pëyank bëlukul.”

¹⁹ Cats niiran pëtsupara pi nan tsuee najëŋal tsupara pi; m duka ba ka niiran, batëb ba maatir biki, oo bawaants, ka bof përim.

²⁰ Ban ci biki tsi përo ujuban, leentsari bukul tsi bërun bañaan bëlieng, pa ban duka bukunk ka lënk.

²¹ A te nji ka n leentsu ank tsi bërun Nasien-batsi ni Këristu Yeesu, ni ngëwaanju ngan data ngi: Moban tsi puu ro ngëmënts ngun; cats lacan ñaan te m meets bërun uwar bi u ci bi, a te cats cikara uleka ñaan.

²² Cats cësara pëpaf iñan tsi ñaan, cats bofa tsi ngëjuban ñaan. Te wi bërieru, moban tsi pëci najëntsal.

²³ Cats katse raan mlik rin, maa raanan pëwat ko uties, undo ipësu, ni mmaak mi m ja mi ucar kë maak.

²⁴ Balon, ngëjuban bukul ka wina iink te bu netse ka wata pëleents; maa balon buts, ngëjuban bukul kee nga wina tsi bërun.

²⁵ Unk buts, ngëwar ngandola ngi, aja nga roon ngë wina; ŋal nga winaatsa ngi di ka baan tsi pëbekar.