1 TIMOTEU 4 - KARÚK-PËRIM KAWALU Nouveau Testament

Bajukan bëjukan ban cits bi bucär

¹ Uwejats aja ko un jënts wi; ko wi u ja wi ci wun wi: Tsi ngëwal ngëtuami, balon ka wëtan uwak, bu ka mob tsi ngëwejats kafal ni bëjukan ngëcaay;

² kanguungu batsup ka niaman bawëtan uwak; batsup bamënts, ume-kabats bukul atël, pi pëfeeru pa n jankana pi di bërua tër pun wul.

³ Bu ka pok bañaan bënim, bu kë ja bañaan ba wët përe ngëlon ngëko, tsi ngi Nasien-batsi leemp ngi aatsum pa ba uwak biki tsi nul puu baranul, bu kë re ngul, bukul ba me biki ucär.

⁴ Par, ko wi Nasien-batsi leemp wi ba këleemp awara, kaats ko wi kan pokaa wi, maa aci pëyank wul kë ja baran;

⁵ par përim Nasien-batsi ni bëñaan, ka tsu ko un ci wi-ba këci, u ci-un patsana wi.

Naleemp na mabi tsi uleemp

⁶ Uci m jukan ngul batsaar ni wi tsi Këristu, kë ci naleempar Këristu Yeesu, naleemp nawar na mobi tsi puu rialaan irim uwak, ni yi bëjukan buwar bi m fets bi uwar.

⁷ Randan itëtan karika-rispitaar Nasien-batsi, ngëñakan bakaats batsafal; maa moban tsi pëliincandër tsi puu lënk Nasien-batsi.

⁸ Par, puu liinc-liincan uliaf aka bëkat tsi ngëko ngan cumats ngi, maa puu lënk Nasien-batsi aka bëkat tsi ngëko bëlieng, par awatsan ñaan ubiira inkri, ni ubiira wi kan bi wi.

⁹ Përim pi, aci pan waka pi, a pa ka pëniiranaa bëlieng:

¹⁰ Nja ka cib tsi uleemp, a nja kë kaman, par ngë tsu uwats nja tsi Nasien-batsi nayësal, nul nan ci Nabueran bañaan bëlieng, andes ba uwak biki tsi nul.

¹¹ Tsuun bukul ngëmënts ngun, kuu jukan ngul.

¹² Ñaan tsë tienkëtsanu, tsi undo m wam upaas, maa ciin ñaan ni m mei, ba uwak biki koo teenënu tsi irim, ni tsi karo-ko, ni tsi bëŋal, ni tsi uwak, ni tsi bëjëntsal.

¹³ Tsini ubaandi nji, moban tsi puu layir Bëpican tsi pëncuaf bañaan, ni pëliinc-liincan bañaan, ni bëjukan.

¹⁴ Cats tienkëtsan bëtseend ban ci bi tsi wi, ba wëlau bi, bi përim bayëlia leentsa bi, a bëjúk ban tsua biki bajëŋal pafu iñan.

¹⁵ Moban uwar tsi puu ro ngëmënts ngun, kë baar ibatsu tsi ngul, pa bañaan bëlieng pëwin m ci tsi puu ya bërun.

¹⁶ Rukan ibats uwar tsi wi, ni tsi bëjukanu, kuu tambandar tsi ko wan. Par, uci kë ro ank, kii bueran beenu, ni bacikëndënu.