1 TIMOTEU 3 - KARÚK-PËRIM KAWALU Nouveau Testament

Bawaay bañaan Ngëriisia

¹ Përim pi, aci pan waka pi: Uci ñaan tsu ibats pii ci nawaay-bañaan, në me, aŋal uleemp u wara wi.

² Bi u ci bank, iink di nawaay-bañaan ka run pëci: ka ci nan kaatsi ulaci, niints na nimëni ŋaats naloole, naliingëlan-ko, natsëkal, ñaan-urispiitu, nawelan-batsooŋ, në ci na yëli bëjukan.

³ Nul tsë tsu ibatsul tsi karaan-pëwat, nul tsë ci nakaman-bañaan, maa na ciin najuab-uwaas, narika-kaman, narika-tsu ibatsul tsi kaŋal-uncaam.

⁴ Aka pëtsij katoul uwar, në tsu upätsul ba mob tsi përimul ni urispiitu bëlieng.

⁵ Par, na meetsi bi nuu tsij bi katoul, um bi nuu tsij bun Ngëriisia Nasien-batsi uwar?

⁶ Kaats pëci nandu jot pëci nafets Këristu, pa pëlënk pëjaa kee ru gúukandar, u tsuul pëlacana, bi Ujabël lacana bi.

⁷ A na ka pëciind ñaan ni bañaan utsand rëmbani, pa na rits kawarana, na rits yër tsi pëgungan pi Ujabël gúngan pi.

Batsënk tsi Ngëriisia

⁸ Batsënk buts, bu ka pëci bañaan-urispiitu, bamob tsi përim pëloole, barika-tsu ibats bukul tsi karaan-pëwat mak, barika-tsu ibats bukul tsi pëka bëka ba mabats bi.

⁹ Ba moban ba liincan undoots wunk mea, wi uwak; ba moban tsi wul ni ume-kabats un jënts wi.

¹⁰ Bë ka pëteenamana bërun; a uci ba kaats ko wi bu kë leentsara wi, bu ka mob uleemp bëtsënk.

¹¹ A bakaats buts, bu ka pëci bañaan-urispiitu, barika-ja ko u waraatsa wi tsi uleka ñaan; bu ka pëci baliingëlën-ko, bamab tsi ngëko bëlieng.

¹² Natsënk, aka pëci na nimëni ŋaats naloole, aka pëtsij katoul ni upätsul uwar.

¹³ Par, ba mob biki tsi uleemp bëtsënk uwar, bu ka wëla urispiitu, bu ka kaand uwats uwiak, tsi uwak wi ba uwak wi tsi Këristu Yeesu.

Ko un ci wi Ngëriisia Nasien-batsi, nul Ajug uyafënts

¹⁴ Man picandëriu ko wi, par man tsu ibats pëbi tsi wi, tsi ko un car wi;

¹⁵ maa uci n bi n faatsan pëbi, kë me bi bañaan ka bi përo di kato Nasien-batsi, un ci wi, Ngëriisia Nasien-batsi nayësal; ngul Ngëriisia ci ngun pëcap ni ujuundi ucär.

¹⁶ Tsi ucär, undoots wunk mea, wi kalënk-Nasien-batsi, arëmb: Nan pibandarii ni uliaf, Uwejats apiban na ci namabal; ngëwaanju awinul; aleentsaa tsi ban cits biki Bajudeu; bañaan awak tsi nul di umundu; atsëpanda përëmb batsi.