1 TIMOTEU 2 - KARÚK-PËRIM KAWALU Nouveau Testament

Pëñaandar bañaan bëlieng

¹ Bi u ci bank, ko wi n du n ja wi, tsi ucak ko, ci wun wi: Pëmob tsi puu yep, puu ñaan, puu ñaandar, puu baran, pa bañaan bëlieng;

² pa basien, ni ban tsua biki bëlieng pëci bañaan bawiak. Unk, nja ka fac nja ka tsëk, tsi pëlënk Nasien-batsi pan ci ba këci, ni tsi urispiitu.

³ Umënts wun aci ko u wara wi a u líl tsi bërun Nasien-batsi, Nabueran n ja,

⁴ nul na ŋali bañaan bëlieng buer, bu ka tsënkan pëme ucär.

⁵ Par, Nasien-batsi naloole baŋ ci-un, a natsu-manteelar tsi Nasien-batsi ni bañaan-bajin ci buts naloole baŋ, ci-un Këristu Yeesu, nul ñaan-najin;

⁶ nul wël un ubiiraul bërierul pa pëlukëna pëbuer bañaan bëlieng: Ci wun ko u leentsa wi tsi uwal un do wi yecisa ba;

⁷ undo un pibana wink, ka wun n tsua pëci naleents përim ni Napostolu – nji n tsupats, man leents ucär – a n tsuunda pëci najukan bañaan ban cits biki Bajudeu ko un ci wi uwak, ni ucär.

Ko wi bayënts ni bakaats ka wi puu ro

⁸ Bi u ci bank, ko wi n ŋal wi ci wun wi: Kara tsëko, bayënts kë katar iñan ijënts ruets, bu kë ñaan; uriab tsë ci, mantotëlër tsë ci.

⁹ Unk buts, bakaats ba tiemaan bëtiem ba yuk bi, bi urispiitu ni karika-pibandar. Bukul tsë tsu ibats bukul tsi banëmb, nin tsi mko-uwëru, nin tsi ilaants, nin tsi iŋi-bëtiem iñatsal;

¹⁰ maa ba tsuun ibats bukul tsi karo ngëwar, bi bakaats ba nja biki bërier bukul bu lënk Nasien-batsi ja bi ba roon bu kë ro.

¹¹ Ŋaats, na tsëkandari nuu juk, në mob tsi puu ro nga jaka ngi bëlieng.

¹² Nji n niiraants ŋaats pëjukan, a te di ka mandaar tsi niints, maa na tsëkandari.

¹³ Par, Adam ci-un nacak na leempee, a u ru ci Eewa;

¹⁴ a te cits Adam raaca un tsi kafal, maa aci ŋaats raaca un tsi kafal a na ro ko wi ulua Nasien-batsi pok wi.

¹⁵ Maa kee na buerana uciul nambukari, uci tsi karika-pibandar a na mob tsi uwak, ni tsi bëŋal, ni tsi bëjëntsal.