1 TIMOTEU 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Pol, Napostolu Këristu Yeesu, tsi utsua Nasien-batsi, Nabueran nja ni Këristu Yeesu, uwats nja;

² pa Timoteu, napäts nji nacär tsi uwak: Bëtseend ba wëlaanu, ni kayëk-ipës, ni pëfac, pëpën-ni tsi Nasien-batsi, Asin nja ni tsi Këristu Yeesu, Ajug nja.

Përuk ibats tsi bëjukan ban cits bi bucär

³ Bi ndu n pën bi pëtsëp Masedoonia a njau, rukaan tsi Efeesu, pa kë tsu bajukan bëjukan ban cits bi bucär ba tsañan pëjukan bul;

⁴ kë tsuund bukul ba wëtan itëtan, ni kapini itim bañaan pëbuka kan dits ki ka ba; par ngëmënts ngun di ka tsiji pëleempar Nasien-batsi tsi uwak, maa ka tsiji mantotëlër.

⁵ Ko un ka wi n tsuu përo ank, aci pa pëpiban bëŋal ban pëni bi di uwaas un jënts wi, ni di ume-kabats un fac wi, ni di uwak un kaats wi kanguungu.

⁶ Aka ban pën biki tsi ngëmënts ngun, a ba niam koo ja irim in kaats yi bëkat.

⁷ Bë ŋal pëci bajukan-ulua Nasien-batsi, maa bë meets ko wi ba ci wi tsi puu ja, ni irim i ba mob yi liincan.

⁸ Ngë me, ulua awara, uci uu leempëna uwar.

⁹ A ngë ka pëme ne, ulua tsuaatsa pa namabal, maa pa baro ko wi ulua pok wi, barika-ro ko wi ba jaka wi, balënkats-Nasien-batsi, bajuban, barispitaarats ngëyëman, barispitaarats Nasien-batsi, bafiŋ basin bukul, bafiŋ banin bukul, bafiŋ-bañaan,

¹⁰ bamob tsi ngëko katúk-ufuts, bayënts bapiintsanda, bajulats bañaan, batsup, bawëtan përim pi ba baaja pi, ni ko un ci wi-ba këci u yukats wi tsi bëjukan bëwar.

¹¹ Ci wun ko u yuk wi ni Upetsan-uwar përëmb Nasien-batsi, nul nanaakal; wul wi n tergaara wun.

Pol abaran Ajug nja Yeesu Këristu

¹² Man baran na wëlini uyëlan, nul Këristu Yeesu, Ajug nja bi na wejats bink n ci ñaan nan wakee, bi na tsuin bink tsi uleempul,

¹³ nji nandoi ci nakarul, nakaman bafetsul, nacar-uriab. Maa a n yëkara ipës, par mando ka ndoona tsi kameets-ko, tsi kakaats-uwak.

¹⁴ A te bëtseend Ajug nja awatsësar tsi nji apar-paran, ni uwak, ni bëŋal ban ci bi tsi Këristu Yeesu.

¹⁵ Përim pi, aci pan waka pi, a pa ciind pi ka niirana pi pul bëlieng; iink di pa ja run: Këristu Yeesu abi tsi umundu pa pëbueran bajuban, a te nji n pe un pëci najuban.

¹⁶ Maa wul ka wun n yëkara ipës, pa Këristu Yeesu ka piban umiiraul bëlieng tsi nji nan pei pëci najuban, u ci upibanaani pa biki kee wak biki tsi nul, din bu ka ka pëyës pan dits pi ka ba.

¹⁷ Unk nul Nasien tsi ngëwal bëlieng, nan ditsi ka cäts, nan ditsi ka winaa, nul Nasien-batsi koorul, na wëlaan urispiitu ni përëmb pa sandëndën! Ameen!

¹⁸ Timoteu, napäts nji! Përim pi n du n tsuu pi pëmob, bi u jaka bi tsi irim in car yi aleentsa tsi ulekau, aci wi pëkaman ukam u wara wi, bi irim imënts ja bi;

¹⁹ kë moband tsi uwak, ni tsi uwejats un fac wi. Uwejats umënts wun, balon awëtan wul, din a ba niaman uwak.

²⁰ Imeneu, ni Aleksandër, bu bof tsi bamënts bakan. Man gutsar bukul Useetaani, pa ba juk pëkatse pëkar Nasien-batsi.