1 TESALONIKA 3 - KARÚK-PËRIM KAWALU Nouveau Testament

¹ Unk, bi wund katse bi yëlan pëmiira, a wund ja tsi ibats wund, ape pëwara wund përuka koor wund di Ateenas.

² A wund yëli Timoteu, nul natsaar ni njaa na ci naleemp ni Nasien-batsi tsi pëleents Upetsan-uwar Këristu. Wund ayëliul pa pëliincan ind, ni pëliinc-liincan ind ngëwaas tsi uwak ind,

³ pa mteenamana mmënts mi tsë lëg-lëgan ñaan. Par ind bërier ind, nda me umënts wun ci wun wi ngë yecendëra wi pëpar-na.

⁴ Par, uwal wi wund ro wunk ci ni ind, a wund ro car aleents ind ja kë noor-noorana. A wul baandi wun, a nda me.

⁵ Wul ka wun, bi katse bi yëlan pëmiira, a n yëli Timoteu pa pëme uleka uwak ind. Man lënkar pëjaa Nateen-teenan a bi teen-teenan ind, a mcibi wund ka ruka ci man kaats mi bëkat.

⁶ Maa Timoteu ru baandi iink tsi wund, apëni di ind. Atsiji upetsan uwar tsi uleka uwak ind ni bëŋal ind. A na jaand nda ci tsi pëles wund uwar, ngëwal bëlieng, a nda rí pëwin wund, bi wund rí bi buts pëwin ind.

⁷ Wul ka wun, ind batsaar ni wund, tsi unoor wi wund ciina wi ba këciina, ni tsi pënoor-noorana pi wund ciina pi ba këciina, wund aliinc liincana ngëwaas tsi uleka ind, undo uwak ind.

⁸ Inkri wund ate wund yafënts, undo nda liincandar tsi Ajug.

⁹ Par, pëom pëbaran pi wund yëlan pun pëbaran Nasien-batsi tsi uleka ind, pa ulílan bëlieng wi wund lílan wi tsi undo ind, tsi bërun Nasien-batsi inja?

¹⁰ Bërëm ni pënak, wund kë pe këpe pëñaan pa pëkaka win ind, din wund ka kësës ngan kats ngi uwak ind.

¹¹ Inkri, Nasien-batsi nja nul Asini njabërierul, ni Ajugnja Yeesu, ka waants wund bëga pëbi di ind.

¹² Bëŋal bi nda ŋalëlar bi, a nda ŋaland bañaan bëlieng, Ajug na tsuun bul pëwatsësar, bu pelëk, pi bëŋal bi wund ŋal ind bi.

¹³ Na liinc-liincani ngëwaas ind, pa ndë ci ban kaats biki ulaci tsi bëjëntsal, tsi bërun Asini nja Nasien-batsi, ubi Ajug nja Yeesu ni bayiicul bëlieng bayëman.