1 TESALONIKA 2 - KARÚK-PËRIM KAWALU Nouveau Testament

Uleemp Nasien-batsi di Tesalonika

¹ Batsaar ni wund, ind bërier ind nda me pëbaandi pi wund baandi pi tsi ind, cits pan kaats pi bëkat.

² Wund aro ci tsi unoor a wund tsijaa pëtsija pa waraatsa pi di Filiipus, bi nda me bunk. Maa ŋal bi ukam ci bi uwiak, wund aliincan ngëwaas tsi Nasien-batsi wund, pëleents ind Upetsan-uwar Nasien-batsi.

³ Par, pëliincan pi wund kë liincan pi ngëwaas bañaan, pënënatsi nin tsi pëfäl ñaan, nin tsi ngëwejats ngëtsopal, nin tsi pëlipëna ñaan.

⁴ Maa bi Nasien-batsi teenaman wund bunk, a na tanan wund Upetsan-uwar, unk di wund kë leents run përim; cits pa bañaan pëlilandër wund, maa Nasien-batsi pëlilandër wund, nul nateenaman ngëwaas wund.

⁵ Nda me koon, yaas a përim wund ka ci pan bëndan pi ñaan tsi kafäl, nin wund pëtsij ngëwejatskariisan-ko; Nasien-batsi aci na maatir.

⁶ Te wund tsasats bañaan pëbëndan wund, nin ind, nin balon.

⁷ Bi wund ci bink bapostolu Këristu, wund aro yëlan aatsum pëci pëyunts pa ind. Maa wund ajuab ngëwaas mak tsi pëncuaf ind, bi ŋaats-nambukari ja bunk na roon nuu këmand upätsul.

⁸ Tsi kajuab-ngëwaas wund pa ind, wund aro ŋal pëwël ind Upetsan-uwar Nasien-batsi; te cits wul rin, maa buts ngëbiira wund bërier ngul. Par nda ruka ci biki wund ŋal biki mak.

⁹ Batsaar ni wund, nda lesan-e uleemp wund uñatsal, ni unoor wund, bi wund kë leents ind bi Upetsan-uwar Nasien-batsi, a wund ja wund roon wund kë leemp bërëm ni pënak, pa përits ci pëyunts pa nin nalon tsi ind.

¹⁰ Ind nda ci bamaatir, a Nasien-batsi win wund ci ni ko u yëman wi, ni u mab wi, un kaats wi ulaci, tsi pëncuaf ind ba uwak biki.

¹¹ A bi nda me bunk, bi wund ro bi tsi uleka kara ñaan tsi ind, aci bi niints kë ro bunk tsi uleka upätsul.

¹² A wund ci tsi pëtseend ind ibats, ni pëliinc-liincan ind ngëwaas, ni pëja ind nda yandaari bëyandaar ba mab bi tsi Nasien-batsi, nul nanduuri indi pësienul ni përëmbul.

¹³ A wul ka wun buts wund wëtaants puu baran Nasien-batsi; par uwal wi nda yank wunk përim Nasien-batsi, pul pi nda te pi wund leents ind, nda niiran pul bi pa baaraan bi pëci. Cits pëjaa aci përim bañaan-bajin, maa aci përim Nasien-batsi, a puu leemp uleemp tsi ind ba uwak biki.

¹⁴ Par, ind batsaar ni wund, nda ruka ci bateenëna iriisia Nasien-batsi i ci yi di Judeeya, yul i ci yi tsi Këristu Yeesu; par, unoor wi bañaan-ucaak ind tsu ind wi a nda par-na buts, wul wi Bajudeu tsu wun iriisia imënts yun a i par-na.

¹⁵ Bukul ban fiŋ biki Yeesu, Ajug, ni bayëlia, a ba noor-nooran wund buts. Bë roots ko u líl wi Nasien-batsi, bë ci bañaas bañaan bëlieng,

¹⁶ a bu kë laaŋ wund pëñakanaan ban cits biki Bajudeu pa ba buer. Unk, tsi ngëwal bëlieng, bu kë watsës ngëjuban bukul, a ba par-paran. Maa tsi utuami, uriab Nasien-batsi ayërëna bukul.

Pol aŋal pëwin bañaan Tesalonika

¹⁷ Maa, batsaar ni wund, bi wund patsësa ind bunk tsi ko un dits wi ka jon, a ngë lawëlar ngëliaf, maa cits ngëwaas. Wund aro uyëlan pa pëwin ind, undo aci ko wi wund rí wi mak.

¹⁸ Par wund aro ŋal pëbi tsi ind, iji Pol bërierin, uyaas ucak ni utëbantsan, maa a Useetaani laaŋ wund bëga.

¹⁹ Par, yën ci-un uwats wund, oo ulílan wund, oo bëluk wund gi wund kii pícëna gi tsi bërun Ajug nja Yeesu, uwal wi nuu witsee wi? Cits ink ind-a?

²⁰ Ee-e, nda ci përëmb wund, ni ulílan wund.