1 PER 4 - KARÚK-PËRIM KAWALU Nouveau Testament

Ubiira uwalu

¹ A bi Këristu noor bunk tsi uliaf, ind buts nda yëlan pëtsij uwejats umënts wun. Par na noori tsi uliaf apatsësar ni ujuban.

² Unk tsi ngënu ngi nda rukanda ngi pëka tsi uliaf, nda katse ka ci tsi karí-ko ñaan-najin, maa tsi uŋal Nasien-batsi.

³ Par, uwal wi nda paran wi tsi karo uŋal ban cits biki Bajudeu, aliing; bi nda ro bi wëtandar tsi ngëko katúk-ufuts, ni tsi kari-ngëko, ni tsi ukuj, ni tsi buwaamal, ni pëbaar tsi përaan, ni tsi kajintëla-icap kañutsanuel.

⁴ A ba pikra undo bi nda katse bi ci ni bukul tsi pëwëtandar tsi ngëko katúk-ufuts, a bu kë kar ind.

⁵ Maa bu kee piban ngëko ngi ba ro ngi tsi bërun ñaan nan yëlani pëwat bayësal pëleents ni bacäts.

⁶ A wul ka wun, ŋal bacäts aleentsa Upetsan-uwar pa bukul pëwataa pëleents tsi uliaf, tsi uŋal bañaan-bajin; a tsi uwejats, bu ka kak koo yafënts tsi uŋal Nasien-batsi.

⁷ Inkri utuami ngëko bëlieng awokani. Nda pibani kameko, ndë lesar tsi bëñaan.

⁸ A tsi ruets ngëko ngan bëlieng, nda tambandari bërier ind pëŋalëlar, par bëŋal ka kund ngëjuban ngëcumal mak.

⁹ Nda ru kaan ka welan batsooŋ tsi nda ci tsi, te nda rits ru ŋëmŋëm.

¹⁰ Uja nan ci, në ci tsi pëleempar bacintsul ni utseend wi na yank wi; unk ri ndu ci run ba tsijëna bëtseend Nasien-batsi bawar, bul ban patsëlar bi.

¹¹ Uci ñaan kë ñakan, na ñakani pi aci irim Nasien-batsi i nu leents yun; a uci ñaan kë ro uleemp, na roan uleemp ni uyëlan wi Nasien-batsi wëlul wi, pa Nasien-batsi përëmbana tsi Yeesu Këristu tsi ngëko bëlieng, nul nan kai përëmb ni pëyëlan pa sandëndën. Ameen!

Pëtsua tsi unoor undo m ci Ñaan-këristu

¹² Ind ba ŋala biki, ind tsë pikra tsi mteenamana myëkanuel mi kan bi mi tsi ind, mul cits ko ulon un pats wi.

¹³ Maa nda lílani bi nda bofana bi tsi unoor Këristu, pa upibandari përëmbul ind buts ndë juc ni ulílan.

¹⁴ A uci nda karaa tsi undo katim Këristu, nda ci ba naak biki, par Uwejats përëmb, un ci wi Uwejats Nasien-batsi, aci tsi ind.

¹⁵ Nin ñaan tsë ci tsi unoor tsi ind, pi nafiŋ-bañaan, oo nakiej, oo naro-ngëko-kawaraatsa, oo natsu mtumul di ngëko bañaan.

¹⁶ Maa uci na ci tsi unoor pi Ñaan-këristu, nul tsë kawara ko wan, maa na rëmbani Nasien-batsi tsi undo katim ki.

¹⁷ Par aband uwal wi kawat-pëleents kë juundëna wi di Kato Nasien-batsi. A uci kawat-pëleents kë juundëna tsinja we ka ci wun utuami ban pok biki pëwak tsi Upetsan-uwar Nasien-batsi?

¹⁸ A uci namabal kë buerëna tsi ko u ñats wi, tsum tsi na wakatsi tsi Nasien-batsi ni najuban kii ci tsun?

¹⁹ Wul ka wun, biki kan do biki uwar, a bu kë noor tsi undo uŋal Nasien-batsi, ba tsuun ngëwaas bukul tsi Naleemp ngëko bëlieng, nul namob tsi përim.