1 PER 3 - KARÚK-PËRIM KAWALU Nouveau Testament

Bakaats ni bayën bukul

¹ Ind bakaats buts, nda welani iyeen ind tsi bayën ind. Unk uci balon tsi bukul pok pëniiran përim, bu ka gaañaara tsi undo bëci baar bukul, te u rits ci ni përim.

² Par bu ka win bëci ind bujënts, ba rispitaara bi.

³ Kawarandan ngëliaf ind tsë ci ki batsandu, pi kanëmb uweel, katsu uwëru, oo katiema iŋi iwar;

⁴ maa ka ciin kan beka ki di uwaas ñaan, kan dits ki ka coka, ki uwejats mbëla, ni butsëkal. Wul ci wun ko un ka wi bëkat tsi bërun Nasien-batsi.

⁵ Par tsi uwal ujon, unk di bakaats bayëman ba watsar biki tsi Nasien-batsi kë warandandun ngëliaf bukul, a ba welan iyeen bukul tsi bërun bayën bukul.

⁶ Unk di Saara mob run tsi përim Abraam, a nuu ruul ajug. A tsi Saara, nda ruka ci upätsul tsi uroor ind uwar, a nda lënkats ko wi ka lalan ind wi.

⁷ Ind bayën bukul buts, nda ciin tsi manteelar ni baar ind, ndë me ba ci pi kaŋí kan daf ki. Nda rëmbani bukul, par ind ni bukul ka rukanda bukun bëtseend ban tsij bi ubiira; ko tsë ci wi ka laaŋ wi bëñaan ind.

Pëtambandar tsi karo-uwar

⁸ Pa pëtuamës, nda kaan bëlieng ngëtsaag ngëloole, ni katúkëlar pëñaak, ni pëŋalëlar tsi nda tsaar tsi, ni kayëk-ipës, ni kawelan-been.

⁹ Ñaan nando indi uwutsëtsuel, ind tsë lukanaanul uwutsëtsuel, oo kakar tsë lukanaana kakar, maa u wara wi. Nda ru kë ja ngëwar par umënts wan wi nda ruuree wun, pa ind pëyank uwar wi nda ka wi përukanda.

¹⁰ Par ñaan na ŋali ubiira ni pëwin ngënu pënaakësa, na randani pëndiamëntul ko u waraatsa wi, në randan irujul pëja ngëko maniamëlan;

¹¹ na lawani ko u waraatsa wi, në ro uwar; na moban tsi pëtsas pëfac, në fets pul.

¹² Par Ajug atsu këkësul tsi ruets bamabal, a ibatsul kë cikëndën bëñaan bukul, uwar; maa Ajug ka natsara baro ngëko ngan waraatsa ngi.

¹³ A uci nda piban nda tsij uŋal pa përo uwar, naom ka ro ind un ko u waraatsa wi?

¹⁴ Maa uci buts ndee tsua tsi unoor undo bëmabal, ndë ci ba naak biki. Ind tsë lal bukul nin ind tsë lënk;

¹⁵ maa nda yëmani Këristu di ngëwaas ind, nul nan ci Ajug. Nda ciin ban bayecisër ngënu bëlieng, pa pëyankës na yepar indi ba këyepar, uleka uwats un ci wi tsi ind.

¹⁶ Maa, nda roan ko wan tsi kajuab-ngëwaas, ni urispiitu. Ndë tsijand ngëwejats ngëwar, pa tsi ko wi bu kë karëni ind wi, bu ka kawa, bukul biki ka nja biki ngan waraatsa ngi tsi bëci ind bëwar tsi Këristu.

¹⁷ Par ape pëwara pënoor tsi karo-uwar, uci u ci uŋal Nasien-batsi, ni pëjaa përo ko u waraatsa wi.

¹⁸ Këristu, nul anoor bëyaas bëloole baŋ pa ngëjuban, pa sandëndën, nul namabal pa bamabats, pa pëtsëpand ind di Nasien-batsi. Nul tsi uliaf, afiŋa; maa tsi Uwejats Nasien-batsi a na kak nayësal.

¹⁹ A unk di na tsëp run ee leents ngëlugum përim di ukalabus,

²⁰ ngul ngan mobats ngi tsi përim uwal wi Nasien-batsi ci wi tsi umiira tsi pëlip ngënu Noe, bi nu yecis bi bëntsian. A bañaan ban cumats biki, un ci wi-bañaan këwas, ci bukun ban bueranaana biki mlik.

²¹ A mlik mmënts mi ci mun ulimënts bëmijan ban bueran ind bink inkri, cits pa pëjëntsan mtsopi ngëliaf, maa pëjaankëma Nasien-batsi ni utsaag uwar tsi undo bi Yeesu natsee bi di pëcäts.

²² Nul apaiya batsi ee ci di kariir Nasien-batsi, a ngëwaanju, ni msien, ni myëlan tienkëtsar tsi bërunul.