1 PER 1 - KARÚK-PËRIM KAWALU Nouveau Testament

Kawël-mboos kajuundë-ni

¹ Per, Napostolu Yeesu Këristu, pa biki Nasien-batsi rat biki, bukul ban garandar biki ee ci batsooŋ di Pontus, ni di Galaasia, ni di Kapadoosia, ni di Aasia, ni di Bitíinia.

² Bukul ban data biki tsi kacär-ume Nasien-batsi Asin, tsi bi Uwejats jëntsan bi bukul pa pëmob tsi përim Yeesu Këristu, ni pëlicara pëñaakul. Bëtseend ba watsësaan ind ni pëfac.

Uwats pëbuer

³ Nasien-batsi na bundanaan, nul Asin Yeesu Këristu Ajug inja. Atsu nja ngë bëka uyaas ucints undo kayëk-ipësul mak, pa ja pëka uwats un tsij wi ubiira, tsi bi Yeesu Këristu natsee bi di bacäts;

⁴ ninja pëka bërukanda ban dits bi ka coka, ban kaats bi mtsopi, ban dits bi ka rots, ban gaangara ind bi di batsi.

⁵ A tsi undo uwak ind, nda gaanga tsi pëyëlan Nasien-batsi, pa pëbuer pan yecisa pi pëpibana tsi uwal utuami.

⁶ Bi u ci bank, nda jucan ni ulílan inkri, ŋal bi ufiera bi ind pëjuatsan tsi ko un dits wi ka jon, undo mteenamana mcumal.

⁷ Mteenamana mmënts mi apiban uwak ind ka bëkat, pa wul pëtsënkan ubundan, ni përëmb, ni urispiitu, upibandari Yeesu Këristu. A wul uwak ind ape mak uwëru uni coka wi pëka bëkat, ŋal bi uwëru teenamana bi di bërua.

⁸ Nul ni nda winatsi, maa nda ŋalul; ni nda winatsi inkri, maa nda wak tsi nul. Nda jucan ni ulílan u yëlaatsa wi bëleents, ni përëmb,

⁹ ndë tsënkan utuami uwak ind, un ci wi pëbuer ngëwaas ind.

¹⁰ Aci-undo pëbuer pëmënts pi, pi bayëlia tsas pun pëme a bu kë teen uwar, a ba leents umeaatsa wi uleka bëtseend ba n jaakara ind bi;

¹¹ bu tsas pëme uwar uwal umënts, ni ngëko ngi kan piban ngi ko wan kë ci, bi Uwejats Këristu un ci wi di bukul, leents bi ki këlum ngënoor ngi Këristu kë par-na ngi, ni përëmb pan ka pi pii fets ngul.

¹² Bukul bu pibana u cits pa bukul bërier bukul, maa ind biki ba leempar bukun ngëko ngi nda leentsa ngi inkri; a baleents Upetsan-uwar leentsëna ind ngul tsi pëyëlan Uwejats-ujënts u wëtanee wi di batsi. Ngëko ngëmënts ngi, ngi ngëwaanju ŋal ngun pëjuunkats.

Pëyandaar tsi ubiira uyëman

¹³ Wul ka wun, nda yecisëri tsi ume ind, ndë ci baliingëlën-ko, ndë baar uwats tsi bëtseend bi nda ka bi pëtsijee upibandari Yeesu Këristu.

¹⁴ A bi nda ci bi upäts ba mob biki tsi përim, ind tsë naam bi nda ro bi ci uwal ujon tsi karí-ko, uwal wi nda ro wi ci tsi kameets-ko ind.

¹⁵ Maa bi nandui ind unk ci bunk nayëman, ind buts bërier ind, nda ciin bayëman tsi ko wi ndu ro wi ba këro.

¹⁶ Par apicana aja: “Nda ciin bayëman, par nji man ci nayëman.”

¹⁷ A ni ka wat unk kara ñaan pëleents tsi ko wi na ro wi, nul nan ditsi ka kicës bañaan, uci nduu ruul koo jaul Asin, nda yandaari tsi pëlënk Nasien-batsi tsi uwal pëtsooŋ ind tsi utsia tsi.

¹⁸ Nda mean u cits ngëko ngi kan coka ngi, pi uncaam, oo uwëru, ngi Nasien-batsi lukëna ngun pëbuer ind, tsi bëci ind ban katats bi, bi nda yank bi di basin ind;

¹⁹ maa aci pëñaak Këristu pëñatsal, pi pëñaak unkaanel un kaats wi basal, a kaats mtsopi.

²⁰ Nul nan yecisee ki umundu netse ki leempa, maa na pibanaa tsi ngëwal ngëtuami ngi, pa undo ind.

²¹ A tsi nul, tsi nda wakëna tsun Nasien-batsi, nul na natsaniuli di bacäts, a na wëlul përëmb, pa uwak ind ni uwats ind pëciina tsi Nasien-batsi.

²² Bi nda jëntsan bink ngëwaas ind, tsi undo bi nda mob bi tsi ucär, pa ind pëka bëŋal ban kaats bi kanguungu tsi nda tsaar tsi, nda tambandari pëŋalëlar ni ngëwaas ngan jënts ngi.

²³ Par nda bukënaatsa uyaas ucints tsi ucapi wi kan coka wi, maa un dits wi ka coka; tsi përim Nasien-batsi pëyësal, a pa ci pa sandëndën.

²⁴ Par ñaan nan ci ba këci, aci pi pëtsats, a përëmbul ci pi pëtsiañ pëtsats; pëtsats ka kay, pëtsiañ ka yër,

²⁵ maa përim Ajug, amob tsi pëci sandëndën. A përim pëmënts pi ci pun Upetsan-uwar wi nda leentsa wi.