1 KORINTU 9 - KARÚK-PËRIM KAWALU Nouveau Testament

Ko wi Napostolu ka wi përo

¹ Nji, in facäts-a? Nji, in cits napostolu-a? Nji, in winats Yeesu Ajug inja-a? Ane nda cits mbuk uleemp nji tsi Ajug-a?

² Uci n cits Napostolu pa balon, maa pa ind man ci Napostolu; par ind ci bukun umarëka un piban wi nci Napostolu tsi Ajug.

³ Ko wi ndu n pokëna wi tsi bërun batumtsarin, ci wun wi:

⁴ Wund kaats puu riala, ni puu raan-a?

⁵ Wund kaats pëjej ŋaats ni wund tsaari pëtsëpand, bi balon bapostolu ro bi, ni Seefas, ni ban tsaar bukunk ni Ajug-a?

⁶ Oo nji ni Barnabas rin kaats bukun pëwët uleemp-a?

⁷ Naom nasondaari ka kaman un, a nuu luk beenul? Yën ka yiir un uwoorta mbiiñu, a rits na re mbuk wël? Oo Yën ka yafan un pëtan, a rits na raan mtaw pëtan pëmënts?

⁸ Ane man nja ko wan bi ñaan-najin kë ja bi, oo ulua jaats buts ko wan-a?

⁹ Par, iink picana run di ulua-Moises: “M di kë tan mtum uyët-ukas un ci wi tsi pëtët.” Ane Nasien-batsi ka wejatsar uleka ngëyët-ngëkas-a?

¹⁰ Oo aci wund biki na ñakandar bukun? Man niiran u ci wund picara bukun ko wan; par najaar ka jaar ni uwats; a ni kan tëti kë wats pëka ulon ko tsi ko wi nu tët wi.

¹¹ Uci wund saal ngëko ngëcar ngi Uwejats tsi ind, ariis wund pëjaa wund ayank ngëko bañaan-bajin tsi iñan ind-a?

¹² Uci balon ka puu yank ngul tsi ind, a wund, wund kaats pëpe këpe pëyank-a? Maa, wund ŋalats pëyank ko wi wund ka wi pëyank. Maa wund amiira ngëko bëlieng, pa wund përits tsu ulon ko u wocan Upetsan-uwar Këristu.

¹³ Ind nda meets biki ka leemp biki uleemp uyëman kë rialaan tsi kato-kayëman a? A ni ka leempi di bëgij, cits di bëgij di nuu pënanaandun barialaul-a?

¹⁴ Unk buts di Ajug tsu run, pa biki ka leents biki Upetsan-uwar puu rialaan tsi Upetsan-uwar.

¹⁵ Maa nji n ŋalats pëyank nin ulon ko tsi ngëko ngëmënts ngi, a nji n picandarats ndoon ka wëla ngul. Par amat nji pëcäts, ni pëjaa ñaan tsuuts upíc nji wi ko.

¹⁶ Uci ndu n leents Upetsan-uwar, nji n kaats puu píc, par aci ko wi n tsua wi. Cay nji, uci n leentsats Upetsan-uwar!

¹⁷ Wul ka wun, uci ndu ndo wul tsi uŋal nji, ka ka bëluk; maa uci ndoots wul tsi uŋal nji, u ci uleemp wi n wëla wi përo.

¹⁸ Inkri buom ci bun bëluk nji? Upetsan-uwar wi ndu n leents wink aci bëtseend, nji n ŋalats pëyank ko wi n ka wi pëwëlaa pi naleents Upetsan-uwar.

¹⁹ Par man ci ñaan nan faci tsi bañaan bëlieng, a n tsu been nji pëci naluek bañaan bëlieng, pa pëgaañaar ban pe biki pëcum.

²⁰ Bi ndu n leemp bi tsi Bajudeu, a nduka n ci pi Najudeu, pa pëgaañaar Bajudeu. Pa ba mob bukun aliincan tsi ngëko ulua, ŋal bi n bofats bi tsi ngëko ulua, a nduka n ci pi bukul, pa pëgaañaar ba mob bukun tsi ngëko ulua.

²¹ Pa ban kaats bukun ulua, a nduka n ci pi bukul, pa pëgaañaar ban kaats bukun ulua; cits pëjaa nji n mobats tsi ulua Nasien-batsi, maa man mob tsi ulua Këristu.

²² Pa barafal, a nduka n ci pi narafal, pa pëgaañaar barafal. Mando ngëko bëlieng pa bañaan bëlieng, pa undo pëbueran balon.

²³ Mando ko wi bëlieng, undo Upetsan-uwar, pa undo nji pëbof tsi wul.

Ubíira natúk tsi Këristu

²⁴ Nda meets biki kan túk biki di unkampu ja ba roon bu kë túk bëlieng, maa naloole rin ka yank un bëluk a? Nda túkan bi u ka bi pëtukaa pa pëtsënkan bul.

²⁵ Nakaman nan ci ba këci, aja na roon në yëlan uliaful tsi ko un ci wi-ba këci, pa pëyank ungaañu wi kan coka wi; maa n ja, nja ka kamandar un dits wi ka coka.

²⁶ Wul ka wun ndu n túk buts, maa cits pi na meetsi tsi nu túkar tsi; a ndu n kaman, maa cits ufuts wi ndu n suk wun.

²⁷ Maa man nja ndoon ka pikaar uliaf nji, ka tsijëna wul bërierin, pa nji përits leents balon përim uu ba, nji bërierin ka pënanaa.