1 KORINTU 8 - KARÚK-PËRIM KAWALU Nouveau Testament

Uyamats bëjakan

¹ Tsi uleka ngëko nga n jakana ngi tsi icap, ngë me ne n ja bëlieng ngë ci bajug-ume. Ume ka tsiji kariang-been, maa bëŋal ka natsan bun.

² Uci ñaan wejats pëja ne ame ulon ko, netse me bi nu ro bi a në me wul.

³ Maa uci ñaan ŋal Nasien-batsi, Nasien-batsi ka meul.

⁴ Tsi uleka kare ngëko nga n jakana ngi tsi icap, ngë me ne, pëcap bërier pul cits ko tsi umundu, a ngë me Nasien-batsi nalon cits, ucits ba naloole rin.

⁵ Par ŋal bi balon kë ruaa bi basien-batsi, uci ank di batsi oo tsi utsia, bi u ka bank basien-batsi bacumal ni bajug bacumal,

⁶ maa pa n ja, naloole rin ci-un Nasien-batsi, un ci wi Asin; nan kaanee ngëko bëlieng, a ngë ci ban ci biki pa nul. A naloole rin ci-un Ajug, un ci wi Yeesu Këristu nul nan kaanee ngëko bëlieng, a ngë ci buts pa nul.

⁷ Maa cits bañaan bëlieng me bukun ko wan; par balon awama wakëtsa icap, te inkri a ba wama ka re ngëko nga n jakana ngi, pi awëlaa icap tsi ucär. Undo bi ba raf bi ngëwejats, a ba ruka ka tsopandar.

⁸ Cits kare-ko ka bandani nja kun di Nasien-batsi, par uci ngë rialaats, kaats ko wnja kë piirir wi, a uci ngë riala, kaats ko wnja kë gaañaar wi.

⁹ Maa nda roon bëtsaag, pa pëfacana ind përits tsu barafal ba yër tsi ujuban.

¹⁰ Par uci ñaan winu wi nan kai ume, tsi bariala di bametsu karum icap, uwejats nan daf unk, di ka tsuul puu re ngëko nga n jakana ngi tsi icap-a?

¹¹ Unk undo umeu, narafal ni nda tsaari ka niam, nul ni Këristu cätsari.

¹² Bi u ci bank, m juban tsi uleka ni nda tsaari, a m cok uwejatsul urafal; m juban tsi uleka Këristu.

¹³ Wul ka wun, uci kare-ko ka tsu kun ni wund tsaari na yër tsi ujuban, in katse ka n de uyamats yaas, pa nji përits ci ni kan tsui ni wund tsaari na yër tsi ujuban.