1 KORINTU 7 - KARÚK-PËRIM KAWALU Nouveau Testament

Katseend-ibats uleka bënim

¹ Inkri, tsi uleka ngëko ngi nda picandëriin ngi, awara niints përits kërara ŋaats;

² maa undo ngëko katúk-ufuts, kara niints na kaan aarul, a kara ŋaats na kaan ayënul.

³ Niints na roori aarul ko wi na ka wi përo, ŋaats ka roor buts ayënul ko wi na ka wi përo.

⁴ Ŋaats kaanats uliaful, maa ayënul kaan un wul. Niints buts kaanats uliaful, maa aarul kaan un wul.

⁵ Ind tsë laaŋëlar, ucits ba pëjaa nda baar pëloole ulon uwal, pa pëmob tsi bëñaan, a uu ba, ndë kak ka bof; pa Useetaani përits teen-teenan ind, undo kayëlaants pëmob ngëliaf ind.

⁶ Man ja ind ko wi tsi katseend-ibats, njnjaats ind aci utsua.

⁷ Mando ŋal bañaan bëlieng pëci pi nji, maa kara ñaan aka utseend wi Nasien-batsi wëlul wi bërierul; nalon ka ka wi, nacints ka ka wun.

⁸ A ndu nja buts ban cits biki tsi bënim, ni bacätsëndan-bayën bukul, aro wara bukul përuka unk pi nji.

⁹ Maa, uci ba ri ka yëlan pëmob ngëliaf bukul, ba nimaan; par un pe wi pëwara aci pënima, ni pëjaa m ci tsi përi.

¹⁰ Mán wël utsua pa banimar, cits umíñ, maa aci wi Ajug: Ŋaats tsë bër ayënul.

¹¹ Maa uci nee bër ayënul, nul tsë kaka nima, oo në witsa na teelar ni ayënul. Niints tsë ruak buts aarul.

¹² A ndu nja buts banduka bukunk, maa cits Ajug ja un, aci nji bërierin: uci na waki tsi Këristu tsij ŋaats na wakatsi, maa ŋaats niiran pëtsoar ni nul, nul tsë ruakul.

¹³ A uci ŋaats tsij niints na wakatsi, maa niints niiran pëtsoar ni nul, nul tsë bërul.

¹⁴ Par niints na wakats unk, ayëmana tsi undo aarul; a ŋaats na wakats unk yëmana buts, tsi undo ayënul. Uroots ci unk, upäts ind ka ro ci ba yëmanats biki, maa inkri bë ci bayëman.

¹⁵ Maa uci na wakats unk ŋal pëbër na wak unk, në bërul. Tsi ngëmënts ngi, niints na wak unk, oo ŋaats na wak unk, tanaatsa; par pëfac pi Nasien-batsi ruur ind pun.

¹⁶ Um bi m me bun wi ŋaats ne kii bueran ayënu? Oo um bi m me bun wi niints ne kii bueran aaru?

¹⁷ Kara ñaan na ciin bi Ajug wëlul bi pëci, kara ñaan na ciin bi Nasien-batsi ruiul bi. Ci wun utsua wi n tsu wi di iriisia bëlieng.

¹⁸ Ñaan ka ruee a na wela ba kambac-a? Na ciin bi na ci bunk. Ñaan ka ruee a roots wela kambac-a? Nul tsë wela.

¹⁹ Kambac bërier kul cits ulon ko, maa ko u wara wi, aci pëmob tsi utsua Nasien-batsi.

²⁰ Kara ñaan na liincandari tsi bi na ro bi ci, uwal wi na ruee wi.

²¹ Kë ruee a m do ci naluek-a? Kaatsu pëwejats ko wan. Maa uci m ka bi kë ro a kë ci nafacal, doon koon.

²² Par ni Ajug rui a na ci naluek, në ruka ci ni Ajug buerani. Unk buts nan ci nafacal a na ruee, në ruka ci naluek Këristu.

²³ Nda weelara përes pëñatsal; ind tsë ci baluek bañaan.

²⁴ Batsaar ni nji, kara ñaan aka pëliincandër tsi bërun Nasien-batsi, bi na ro bi ci, uwal wi na ruee wi.

²⁵ Tsi uleka ba meets biki niints, nji n kaats utsua Ajug, maa mán wël ind ko wi n wejats wi nji bërierin, pi ñaan nan waaki tsi kayëk-ipës Ajug.

²⁶ Undo unoor wi ngë ciina wi ntsari, ma win uwara ñaan përuka bi na ci bunk.

²⁷ M mobëlar ni ŋaats-a? Cats tsas pëpatsësa. M mobëlarats ni ŋaats-a? Cats tsas ŋaats.

²⁸ Maa uci m nim, m doots ujuban; a uci na meetsi niints nima, roots ujuban. Maa ba nimar biki, bu ka unoor tsi uliaf, a ŋal pënaakës ind.

²⁹ Maa ko wi, wi ndu nja ind wun batsaar ni nji: uwal arungët. Ko unduka wi inkri, cits pëjaa rin ba nimar biki pëci pi bu nimarats;

³⁰ maa biki kandug biki buts, ba ciin pi bu rugats; ba lílan biki, ba ciin pi bu lílaants; biki kan weel biki, ba ciin pi bë kaats ko;

³¹ biki ka leempëna biki ngëko umundu, ba ciin pi bë leempënats ngul; par bënaam umundu wi ka par.

³² Ko wi n ŋal wi, aci ind përits ci tsi puu wejats. Ñaan na nimatsi ka wejats ngëko Ajug, nuu tsas bi në ro bi a Ajug ka lílandërul.

³³ Maa ñaan na nimi ka wejats ngëko umundu, nuu tsas bi në ro bi a aarul ka lílandërul.

³⁴ Unk, në tsij ngëwejats ngëtëb. Unk buts, ŋaats-nacätsëndan-ayënul, oo na meetsi niints, bu ka wejats ngëko Ajug, pa ba ci bajëntsal tsi uliaf ni tsi uwejats. Maa ŋaats na nimee ka wejats ngëko umundu, nuu tsas bi në ro bi a ayënul ka lílandërul.

³⁵ Man ja ko wan, pa undo bëkat ind; cits pëjaa ma ŋal pëtsu ind nda yër, maa pa ind puu ro ngëko nga wara ngi a nga jënts, ndë ci baloole tsi uleemp Ajug, te nda rits tankëlaand ulon ko.

³⁶ Bi u ci bank, uci ñaan ka nampëliul na meetsi niints, a na win ngëwaanul kë par, te ŋalats pëtsuul na ci tsi mkaw, na win na fier pënimul, na roon bi na ŋal bi; roots ujuban; ba nimari.

³⁷ Maa, niints nan baaraani pëliincandër tsi uwaasul, a na win na fieranaatsa përo ank, maa a na yëlan pëtsijëna uŋalul bërierul, a na baaraan pëwët unk nampëliul na meetsi niints, aro uwar.

³⁸ Unk, na nimi nampëliul na meetsi niints aro uwar; a na nimatsi nampëliul na meetsi niints, ape përo uwar.

³⁹ Ŋaats atana, uwal wi ayënul wama wi ci nayësal; maa uci ayënul cäts, në fac pënimar ni ni na ŋali, maa u ciinaan tsi Ajug rin.

⁴⁰ Maa tsi bëwinar nji, uci na ruka unk, në pe këpe pënaak; te man fiaar n tsij buts Uwejats Nasien-batsi.