1 KORINTU 5 - KARÚK-PËRIM KAWALU Nouveau Testament

Mtsopi bañaan Ngëriisia Korintu

¹ Atea di ngëleka bëlieng u jaka, tsi pëncuaf ind, aka ban ci biki tsi ngëko katúk-ufuts; katúk-ufuts ki m me ki, ŋal ban cits biki Bajudeu di ka ro; un ci wi, aka nalon tsi ind, nan jeji aar asinul.

² Nda ci tsi mguukandar a nda juatsanats! Ñaan nando ank ko wan na pënanaan tsi pëncuaf ind.

³ Tsi mpats nji, nji n cits ni ind tsi uliaf, maa man ci ni ind tsi uwejats; man lacan ba ñaan nan do ank ko wan, pi man ci rul.

⁴ Nda ka pëbof tsi katim Yeesu Ajug, ind ni uwejats nji, ni pëyëlan Yeesu Ajug nja

⁵ ndë gutsar Useetaani ñaan namëntsan, u gar uliaful, pa uwejatsul ka buer tsi Unu Ajug.

⁶ Upíc ind waraatsa. Nda meets bëko-bëlëtsatsaani bëties kë lëntsëntsan ifar bëlieng-a?

⁷ Nda gutsari bëko-bëlëtsatsaani bëjon bun utsand, pa ndë ci ifar iwalu, bi nda tsijats bink bëko-bëlëtsatsaani. Par Këristu, nul unkaanel nja wi Ufesta-pëbuer, ajakana ba pa nja.

⁸ Wul ka wun, cits bëko-bëlëtsatsaani bëjon bi nja kë roona bun ufesta, nin cits bëko-bëlëtsatsaani kawaraatsa ni bi bëjuats; maa nja ka ro ufesta ni upom un tsijats wi bëko-bëlëtsatsaani; un pënë-ni wi tsi bëmabal ni tsi ucär.

⁹ Man picandar ind ba uletar a nja ind, ind tsuuts bofëlar ni baro ngëko katúk-ufuts.

¹⁰ Njnjaats ind nda patsësar ni bañaan biki kan do biki ngëko katúk-ufuts tsi umundu wi, oo baŋal-uncaam, oo bakiej, oo bajintëla-icap; par uro uci ank, mat ndë pën tsi umundu.

¹¹ Maa inkri, mán picandar ind n ja ind, ind tsuuts bofëlar ni ñaan na njai na roon nuu ja atsaar ni ind tsi uwak, a na ciind naro ngëko katúk-ufuts, oo naŋal-uncaam, oo najintëla-icap, oo naja ko u waraatsa wi tsi uleka ñaan, oo nakuj, oo nakiej; ñaan pi namëntsnan, ind tsë riala kon këriala ni nul.

¹² Par, pëom pëyëlan pi n ka pun pa pëwat ban ci biki di utsand pëleents? A ban ci biki di bametsu, cits ind ka wat bukun bukul pëleents-a?

¹³ Maa ban ci biki di utsand, Nasien-batsi ka wat un bukul pëleents. Nda ruakan naro-ngëko-kawaraatsa tsi pëncuaf ind.