1 KORINTU 4 - KARÚK-PËRIM KAWALU Nouveau Testament

Biki Nasien-batsi tsu biki uleemp

¹ Unk, bañaan aka pëtsu nja pëci baleemp Këristu, ni pëci ban gaangana biki ngi Nasien-batsi ngandoots ngi meaa.

² Inkri, ko wi kan tsasa wi, tsi ban gaangana biki ko, aci nan ci, në ci na mob bi tsi përim.

³ Uci nda watin pëleents ind bërier ind, oo di kato kawat-pëleents bañaan-bajin kan ci ki ba këci, ko wan ka warain ko uties. In di ka n wat been nji pëleents bërierin.

⁴ Uwejats nji pibanatsin ne man lac, maa cits pëjaa nji n kaats ulaci; par ni ka watini pëleents, aci Ajug.

⁵ Bi u ci bank, ind tsë wat pëleents te uwal netse band, aa Ajug ka tsënkëna ka baandi; ngëko nga beka ngi, ngi karëm, nul ka pënani un ngul tsi pënak ndakaŋ, në piban buts ngëtsaag ngan ci ngi di ngëwaas bañaan. Din, kara ñaan, Nasien-batsi ka bëndanul bi na ka bi pëbëndana.

Upíc bañaan Ngëriisia Korintu; pëyëlan pi bapostolu ka pi

⁶ Batsaar ni nji, pa pëtsu ind pëme ngëko ngi uwar, a n pibanaan ngul tsi nji bërierin ni Apolos, pa undo ind pëme uwar ko un picana wi, aja: “Cats paran ko un picana wi;” pa ñaan tsë riang ñaan, në welan nacints.

⁷ Yën tsuu un pëpe balon? Wee m ka wun kalon, wi m wëlaatsa wi këwëla? A uci m wëla këwëla, we ka wun a kë riang beenu, pi m wëlaatsa këwëla?

⁸ Nda suets ba! Nda ruka ci barëmb! Nda ci ba basien, maa wund, nin a! Mando ŋal ind pëci basien bacar, pa wund pëyëlan pësien ni ind tsëloole.

⁹ Par pa nji, anaam ne Nasien-batsi atsu wund pëci bapostolu tsi pëlas pëtuami, pi wund aci ba lacandara biki pëcäts; par wund aruka ci ujiaraani pa umundu, pa ngëwaanju, ni pa bañaan-bajin.

¹⁰ Wund aci bafuur tsi undo Këristu, maa ind nda ci bameko tsi Këristu; wund aci barafal, maa ind nda ci baka-uyëlan. Ind nda rispitaara, maa wund wund tsuaatsa ko.

¹¹ Te inkri, wund awama ka rea ubon ni ulof përaan; wund ranj iŋi bëtiem, a wund kobaa ngësuk, a wund kaats tsëko tsë ci.

¹² Wund aleemp mak ni iñan wund aa wund noor. Wund aja wund kë karaa, wund kë ja ngëwar; wund kë noor-noorana, wund kë miira;

¹³ wund kë jaara ko u waraatsa wi, wund kë yank ni përim pëwar; te inkri wund atsua pëci iwetar umundu, irukësar bañaan bëlieng.

¹⁴ Nji n picandarats ind ngëko ngi pa pëkawaran ind; maa pa pëtseend ind ibats, bi nda ci bi upäts nji ba ŋala biki.

¹⁵ Ŋal ndë ruka tsij bajukan ngëmiil untaaja (10.000) tsi Këristu, maa nda cumats basin; par nji, Upetsan-uwar wi n bukëni ind wun, tsi Këristu Yeesu.

¹⁶ Wul ka wun ndu n tseend ind ibats koo nja ind, nda ciin bateenënin.

¹⁷ Undo ko wi ka wun n wëtandari ind Timoteu, napäts nji ni n ŋali, namob-tsi-përim tsi Ajug; nul ka lesan ind bëga nji bi n yandaaraan bi tsi Këristu Yeesu, ni bëjukan nji, bi n ja bi ndoon koo jukan di kara Ngëriisia di ngëbuuru bulieng.

¹⁸ Balon tsi ind bë ci tsi mguukandar, ba ja ne in di ka n bi pëwin ind.

¹⁹ Maa mán bi pëwin ind tsi ko un car wi, uci Ajug ja; unk, ka me ban ci bukun tsi mguukandar; in di ka meena bukul përim din, maa ka me pëyëlan pi ba ka pi.

²⁰ Par, pësien Nasien-batsi cits tsi irim, maa tsi pëyëlan.

²¹ Wee nda ŋal wun? Nji pëbi di ind ni pëlumbaj, oo ni bëŋal ni uwejats kajuab-uwaas?