1 KORINTU 3 - KARÚK-PËRIM KAWALU Nouveau Testament

Mankicësar tsi Ngëriisia

¹ Tsi ucär batsaar ni nji, nji n doots n yëlan pëñakanaan ind, bi nja bi n doon koo ñakanaan bañaan ban tsij biki Uwejats Nasien-batsi, maa man ka pëñakanaan ind pi bañaan biki kan do biki uŋal uyamats, oo pi upäts tsi Këristu.

² Mtaw mi ndu n wël ind mun nda raan; in di ka n wël ind bariala bëtamb, par nda netse yëlan bul. Maa ŋal te inkri nda yëlaants,

³ par nda wama ci pi bañaan umundu. Bi nda wama bink a tsij mankocëlar ni pëŋom tsi pëncuaf ind, pibanats nda wama ci pi bañaan umundu, a nduu yandaar pi bañaan-bajin kë yandaar pi-a?

⁴ Par uwal wi ñaa n ja wi: “Nji man ci ni Pol,” a nacints ja: “Nji man ci ni Apolos,” nda cits tsi përo pi bañaan-bajin kë ro pi-a?

⁵ Bi u ci bank, yën ci-un Apolos? A yën ci-un Pol? Baleemp ban tsiji ind biki tsi uwak; bu ro ank bi Ajug wël bi kara ñaan na ro.

⁶ Nji man wayan, a Apolos tulan, maa aci Nasien-batsi ka wiakëndan un.

⁷ Bi u ci bank, na wayani cits ulon ko, ŋal nan tulani, maa ni ka wiakëndani aci Nasien-batsi.

⁸ Na wayani ni nan tulani bë ci baloole; kara ñaan ka yank bëlukul, bi na leemp bi uleempul aja.

⁹ Par wund aci ban bof biki tsi uleemp Nasien-batsi; a ind nda ci bërig uleemp Nasien-batsi, a nda ci kato ki Nasien-batsi leemp ki.

¹⁰ Tsi bëtseend bi Nasien-batsi wëlin bi, a n tsu ujuundi pi naniew nameko, a nalon niew tsi ruets dul. Maa kara ñaan në teen bi nu niew bi.

¹¹ Par, ñaan yëlanëts përo ujuundi ulon ucits ba dan tsua rink ba, un ci wi Yeesu Këristu.

¹² A uci ko wi ñaan niew tsi ruets ujuundi ci uwëru, oo mtsak uncaam, oo ilaak iñatsal, oo pëmul oo pëtsats pëkay, oo pëkaaw,

¹³ uleemp kara ñaan kee winaa; Unu kawat-pëleents kee piban wul, par bërua ka piban bun wul; uleemp kara ñaan, bërua bërier bul kee teenaman bun wul.

¹⁴ Uci uleemp wi ñaan leemp wi tsi ruets ujuundi wam, ñaan namënts un ka yank bëluk.

¹⁵ A uci uleemp wi ñaan leemp wi tëra, në piirir bëluk; maa nul bërierul ka buer pi ñaan nan par-nii di bërua.

¹⁶ Nda meets nda ci kato-kayëman Nasien-batsi, a Uwejats Nasien-batsi ci di ind-a?

¹⁷ Uci ñaan gar kato-kayëman Nasien-batsi, Nasien-batsi ka gar buts ñaan namënts un. Par kato-kayëman Nasien-batsi, ayëman; a ind ci bukun kul.

¹⁸ Ñaan tsë fal beenul. Tsi pëncuaf ind, uci nalon ñaan tsu beenul pëci nameko tsi umundu wi, na ciin nafuur, pa na kak na ci nameko.

¹⁹ Par kameko umundu wi aci bëfuur tsi bërun Nasien-batsi, bi u picana bi aja: “Nasien-batsi ka mobuna bameko tsi karo-bëlipal bukul.”

²⁰ A ba kaka ja: “Ajug ame ngëwejats bameko; ame nga kaats bëkat.”

²¹ Bi u ci bank, ñaan tsë pícëna bañaan; par ngëko bëlieng aci ngiic ind:

²² U ru ci ank Pol uu, uci ank Apolos uu, uci ank Seefas uu, uci ank umundu uu, uci ank ubiira uu, uci ank pëcäts uu, uci ank inkri uu, uci ank uwal wi kan bi wi uu, ngëko bëlieng aci ngiic ind.

²³ Ind, nda ci biki Këristu, a Këristu ci ni Nasien-batsi.