1 KORINTU 2 - KARÚK-PËRIM KAWALU Nouveau Testament

Përim pi Pol leents pi

¹ Batsaar ni nji, bi n bi bi pëleents ind uleka ko Nasien-batsi un doots wi mea, nji leentsats ind wul tsi irim in dits yi, oo tsi kameko;

² par man baaraan përits me nin ulon ko tsi pëncuaf ind, ucits ba Yeesu Këristu, nul nan dieŋee di kruus.

³ Bi n ci bi tsi pëncuaf ind, a n ci ni bërafal, ni bëlal a ndu n lënk mak.

⁴ Bëñakan nji ni irim i n du n leents yi, biinats tsi kameko ñaan-najin, maa apibanaana tsi Uwejats ni tsi pëyëlan,

⁵ pa uwak ind përits ciina tsi kameko ñaan-najin, maa u ciina tsi pëyëlan Nasien-batsi.

Kameko Nasien-batsi

⁶ Ucar, wund ka ñakanaan kameko tsi bajëŋal, maa cits kameko umundu wi, nin cits kameko babuk basien umundu wi, ki kan ba ki.

⁷ Maa, wund añakanaan kameko Nasien-batsi kan doots ki mea, a ka beka, ki Nasien-batsi rat ki pa përëmb nja ki umundu netse ki leempa.

⁸ Kameko kamënts ki, nin nalon tsi bajug pëyëlan tsi umundu wi meets kul; par uci ba ro me kul, bu bitse ka ro rieŋ Ajug përëmb di kruus.

⁹ Maa iink picana run: “Ngëko ngi këkës winats ngi, ngi ibats teets ngi, ngan niajats ngi yaas di ngëwaas bañaan-bajin, ngul ngi Nasien-batsi yecis ngun pa ba ŋalul biki.”

¹⁰ Maa, wund biki Nasien-batsi piban bukun ngul tsi Uwejatsul; par Uwejats ka piban te ŋal ngi Nasien-batsi bek ngi.

¹¹ Naom tsi bañaan-bajin, me un ngëko ñaan-najin, ucits ba uwejats un ci wi di nul bërierul? Unk buts ngëko Nasien-batsi, nin ñaan meets ngul ucits ba Uwejats Nasien-batsi.

¹² Wund, wund yankats uwejats umundu, maa wund yank Uwejats un pënë-ni wi di Nasien-batsi, pa wund pëme ngëko ngi Nasien-batsi wël wund ngi bëlukats.

¹³ Ngëmënts ngi buts, wund añakanaan uleka ngul; cits tsi irim bëjukan kameko ñaan-najin, maa i bëjukan Uwejats. Wund kë leents ngëko ngëcär ngi Uwejats, pa biki Uwejats.

¹⁴ Maa, ñaan-najin di ka niiran ngëko Uwejats Nasien-batsi, par ngul aci bëfuur pa nul; di ka yëlan pëme ngul, par Uwejats ka piban wun ngul.

¹⁵ Ñaan nan tsiji Uwejats Nasien-batsi ka yëkëran ngëko bëlieng uwar, maa nul, ñaan di ka yëkëran bi na ci bi ja.

¹⁶ Par yën me un utsaag Ajug, pa na jukanul? Maa wund, wund a tsij utsaag Këristu.