1 KORINTU 15 - KARÚK-PËRIM KAWALU Nouveau Testament

Kanatsee-di-pëcäts

¹ Batsaar ni nji, mán lesan ind Upetsan-uwar wi n leents ind wi, wi nda niiran wi, a nda wama liincandar tsi wul;

² tsi wul buts tsi nda buerëna tsun, uci nda gaang wul bi n leents ind bi wul; uci nda roots unk ba, uwak ind di ka ka bëkat.

³ Tsi ucak ko, nji ma wël ind ko wi n yanki wi buts, un ci wi: Këristu acäts undo ngëjuban nja bi Bëpica n ja bi,

⁴ a na mooya, tsi unu uwaajantsan a na natsee di pëcäts, bi Bëpica n ja bi.

⁵ A na pibandar tsi Seefas, a uu ba, na pibandar tsi bafetsul untaaja bukun ni batëb.

⁶ A uu ba, a na kaka pibandar tsi batsaar ni nja tsi uwak, bukul ban pe biki bañaan ngëseent kañan; ban pe biki pëcum tsi bukul awama ka yafënts te pënak pëntsa. Maa balon cäts ba.

⁷ A uu ba, a na pibandar tsi Jakob, a uu ba, na ru pibandar tsi bapostolu bëlieng.

⁸ Tsi utuami, a na pibandari buts tsi nji, pi ñaan nan bukee bëbandats.

⁹ Par nji man ci nan pei pëtiesëts tsi bapostolu, te nji n tsënkaants pëjaa mandua katim Apostolu, par man noor-nooran Ngëriisia Nasien-batsi.

¹⁰ Maa tsi bëtseend Nasien-batsi, man ci ko wi n ci wi. A bëtseendul bi wëla bi, cits ko un kaats wi bëkat, maa man leemp a n pean bukul bëlieng, maa cits nji; aci bëtseend Nasien-batsi ka leemp bun ni nji.

¹¹ Bi u ci bank, uci ank nji, oo uci bukul, unk di wund leents run përim, a unk di nda wak run.

¹² Uci përim leentsa ajaka Këristu anatsee di pëcäts, um di balon kë ja run tsi pëncuaf ind, kanatsee-di-pëcäts cits?

¹³ A uci kanatsee-di-pëcäts cits, Këristu buts natsaatsee di pëcäts.

¹⁴ A uci Këristu natsaatsee di pëcäts, kaleents-përim wund kaats bëkat, uwak ind buts kaats bëkat;

¹⁵ unk buts, wund ka tsua pëci batsupar Nasien-batsi, par wund aja, Nasien-batsi anatsani Këristu di pëcäts. Maa tsi ucär, uci bacäts di ka natsee di pëcäts, Nasien-batsi buts natsanatsi Këristu di pëcäts.

¹⁶ Par, uci bacäts di ka natsee di pëcäts, Këristu buts natsaatsee di pëcäts.

¹⁷ A uci Këristu natsaatsee di pëcäts, uwak ind kaats bëkat, a nda wama liincandar tsi ngëjuban ind.

¹⁸ Unk buts, ban cäts bukun tsi Këristu bu niam.

¹⁹ Uci uwats nja tsi Këristu tsañ tsi ubiira wi rin, ngë ci ban pe biki pëjampësan tsi bañaan bëlieng.

²⁰ Maa tsi ucär, Këristu anatsee di pëcäts, a nul ci-un nacäk tsi ban cäts biki.

²¹ Par bi pëcäts biini bunk tsi niints naloole, unk buts di kanatsee-di-pëcäts biini run tsi niints naloole.

²² Par, bi bañaan kë cäts bunk bëlieng tsi undo Adam, unk buts di bañaan bëlieng kë ka run ubiira tsi undo Këristu.

²³ Maa kara ñaan tsi bëyaasul: Këristu ci-un nacäk; a uu ba, ban ci biki bañaan Këristu, uwal wi nu bi wi.

²⁴ Din, utuami ka baandi, wi nu wël wi Nasien-batsi pësien, nul Asin; wi nu ba wi ni msien man ci mi ba këci, ni uyëlan, ni pëyëlan pan ci ba këci.

²⁵ Par Këristu aka na roon në sien, te babërul ka tsënkëna ka tsua bëlieng tsi utsia iyotsul.

²⁶ Nabër natuami ni ka niamanee, aci pëcäts.

²⁷ Par atsua ngëko bëlieng tsi utsia iyotsul. Tsi ucär, uwal wi u jaka wi, ngëko bëlieng atsua tsi utsia iyots, nan tsu unk ngëko bëlieng tsi utsia iyotsul bofanaatsa.

²⁸ Maa uwal wi ngëko bëlieng tsua wi tsi utsia iyots Këristu, nul bërierul në ci buts di utsia nan tsuuli ngëko bëlieng tsi utsia iyots; pa Nasien-batsi pëci bëlieng, tsi ngëko bëlieng.

²⁹ Ucits ank, ba n ja bukunk ba roon bu kë mijana tsi undo bacäts, bu ka ro ba ja um? Uci bacäts di ka natsee di pëcäts; we ka wun a bu kë mijana tsi undo bukul?

³⁰ A nja buts, we ka wun a uja kara uler nja ka ci tsi bëjuats?

³¹ Man ci tsi pëcäts kara unu un ci wi. Man leents ind wul, batsaar ni nji, undo upíc wi n kaana wi tsi ind, tsi Këristu Yeesu, Ajug nja.

³² Uci u ci tsi buwin bañaan-bajin ka wun n kaman ngë n jar di Efeesu, we wi umënts wun kaarin wun bëkat? Uci bacäts di ka natsee di pëcäts, “mat nja kë riala, nja kë raan, par faan nja ka cäts.”

³³ Ind tsë fal iyeen ind: Mandunandar ma waraatsa mi, ka cok bëci ñaan bëwar.

³⁴ Nda kakari ngëwejats butsëkal, ind tsë juban. Par balon netse ka ume Nasien-batsi; ma nja ko wan pa pëkawaran ind.

Uliaf wi nja kë natsandee wi di pëcäts

³⁵ Maa ñaan ka ja: “Um di bacäts kë natsee run? Wom uliaf wi bu kë natsandee wun?”

³⁶ Nafuur! Ko wi m saal wi di ka ka ubiira, uci u cätsats bërun.

³⁷ A ko wi m saal wi, cits bëko bi ka n jabi bi, maa aci pëbuk rin pi m saal pun, pi ucapi wi kan gura wi, oo ulon ukoraar ucapi.

³⁸ Maa ucapi umënts wun, Nasien-batsi ka wël un wul uliaf, bi na ŋal bi; kara ukoraar ucapi ni uliaf wul bërier wul.

³⁹ Uyamats bëlieng naamats kënaam. Maa ulon ka ci uyamats bañaan, ucints ka ci uyamats ngëcaam, ulon ka ci uyamats ngëko-ngëyits, ucints ka ci uyamats ngëtsëb.

⁴⁰ Aka buts ngëliaf batsi, ni ngëliaf umundu wi. Maa ulon aci përëmb ngëko batsi, a ucints ci përëmb ngëko umundu wi.

⁴¹ Ulon aci përëmb unu, a ucints ci përëmb pëli, a ulon ci përëmb ngëpesaj. Par ŋal ngëpesaj apatsëlar uyëkar ngul.

⁴² Unk buts di kanatsee-di-pëcäts ci run. Uliaf aja u saala, u nooy, maa uwal wi u natsee wi, di ka coka.

⁴³ Ka saala tsi mkaw, u natsee tsi përëmb; u saala tsi bërafal, u natsee tsi pëyëlan.

⁴⁴ Uliaf umundu wi ka saala, uliaf batsi kee natsee. Uci uliaf umundu wi ci, uliaf batsi aci buts.

⁴⁵ Par iink picana run: “Ñaan nacäk, un ci wi Adam, awula ubiira.” Maa Adam natuami aci uwejats wi ka wël wi ubiira.

⁴⁶ Nacäk nun cits ni batsi, maa aci ni umundu wi; a uu ba, a u ru ci ni batsi.

⁴⁷ Ñaan nacäk na leempënee mboos, aci ni utsia. Ñaan natëbantsan apënë-ni batsi.

⁴⁸ Bi ñaan nacäk, natsia ci bunk, unk buts di bañaan utsia ci run; a bi ñaan batsi ci bunk, unk buts di bañaan batsi ci run.

⁴⁹ Bi ngë tsij bink bënaam na leempënee utsia, ngë ka pëtsij buts bënaam ñaan batsi.

⁵⁰ Ko wi, wi n du n ja wun batsaar ni nji: uyamats ni pëñaak yëlants përukanda Pësien Nasien-batsi, nin ko wi kan coka wi, yëlants përukanda un dits wi ka coka.

⁵¹ Nda teenan-e, má leents ind ulon ko un doots wi meaa: Cits n ja bëlieng ka cäts bukun, maa n ja bëlieng nja ka witsësaa bënaam,

⁵² tsi uyaas uloole, tsi uŋoompës uloole, tsi uleentsar uluur utuami. Par, uluur ka leentsi, bacäts ka natsee ni ngëliaf ngan dits ngi ka coka, n ja, nja ka witsësaa bënaam.

⁵³ Par uliaf wi kan coka wi aka pëtiema karika-coka, uliaf wi kan cäts wi, ka tiema karika-cäts.

⁵⁴ Maa uwal wi uliaf wi kan coka wi tiema wi karika-coka, a wi kan cäts wi tiema karika-cäts, din, përim pan picana pi ka ba përolaa; iink picana run: “Pëcäts ayoora tsi kape!”

⁵⁵ “Oo pëcäts, kapeu kuu kun-i? Oo pëcäts, katapu kuu kun-i?”

⁵⁶ Katap pëcäts aci ujuban, a uyëlan ujuban ci ulua.

⁵⁷ Maa Nasien-batsi na baranaan, nul ni ka wël njai kape tsi Yeesu Këristu, Ajug nja.

⁵⁸ Bi u ci bank batsaar ni nji ba ŋala biki, nda liincandari ndë ci ban dits biki ka siintsar, ndë cum ni uŋal tsi uleemp Ajug, ndë me ne, uleemp ind tsi Ajug, cits un kaats wi bëkat.