1 KORINTU 13 - KARÚK-PËRIM KAWALU Nouveau Testament

Bëŋal

¹ Ŋal koo n ñakan mleents bañaan-bajin, ni ngi ngëwaanju, maa uci n kaats bëŋal ka ci pi pëfeeru ka cajës pun, oo pi usiinu ka las wun.

² Ŋal ka tsij utseend pa pëleents u meaatsa wi, a me bëlieng ngëtsaag ngan doots ngi meaa, a meend ngëko bëlieng; ŋal ka tsij uwak awiak pa pëkikës ngëntunda, maa uci n kaats bëŋal, in di ka n ci ko.

³ Ŋal ka fa baranj bëka nji bëlieng; ŋal ka wël uliaf nji bërierin pa u tëraa, maa uci n kaats bëŋal, ko wan di ka kaarin bëkat.

⁴ Bëŋal aci umiira, aci uwar. Bëŋal di ka koc, di ka píc, di ka rëmbandar,

⁵ di ka tsu përo u waraatsa wi, di ka tsas ufier bul, di ka riabats, di ka gaang uriab,

⁶ di ka lílandër ko un cika wi, maa aja ba roon bu lílandër ko un ci wi ucär.

⁷ Bul ka miira ko un ci wi-ba këci, bu fiaar ko un ci wi-ba këci, bu wats ko un ci wi-ba këci, bu yëlan ko un ci wi-ba këci.

⁸ Bëŋal di ka ba yaas. Maa uci kaleents nga meaatsa ngi ci, kee ka ba. Uci mleents ci, kee nga paaraar. A uci ume ci, kee u ba,

⁹ par ume nja kësats buko, a nginja kë leents ngi nga meaatsa ngi, kësats buko.

¹⁰ Maa, uwal wi un kës wunk bi wi, din un kësats wunk ka ba.

¹¹ Uwal wi n do wi nci napäts, man do ka ñakan pi napäts, a n do ka wejats pi napäts, a ndu n tsaag pi napäts; maa bi n duka bi n ci nawiak, a n wëtan ngëko këpats.

¹² Par inkrinja ka teen tsi kateenaraani pi arëmënts, maa tsi uwal wi kan bi wi, ka ci këkës ni këkës. Ko wi n me wi inkri, kësats buko, maa mee n me uwar, bi n mea bi uwar buts.

¹³ Par inkri ngëko ngëwaants ngi ruka ngun: uwak, uwats, ni bëŋal; maa un pe wi pëci uwiak tsi ngul, aci bëŋal.