1 KORINTU 12 - KARÚK-PËRIM KAWALU Nouveau Testament

Ngëkoraar ngëtseend Uwejats-ujënts

¹ Batsaar ni nji, tsi uleka ngëtseend Uwejats-ujënts, nji n ŋalats ind pëci tsi kameets.

² Nda me ne, uwal wi nda roots wunk me Nasien-batsi, a nda ro ja nda roon ndu tsëpanda di icap in dits yi ka ñakan; bi nda ja bi nda roon ndu ŋaayandaa.

³ Wul ka wun ndu n tsu ind pëme ne, kaats ñaan ni ka ñakani tsi pëyëlan Uwejats Nasien-batsi, na ja: “Yeesu aci Anaatema;” a ñaan yëlants pëja kak: “Yeesu aci Ajug,” ucits ba tsi pëyëlan Uwejats ujënts.

⁴ Aka ngëkoraar ngëtseend, maa Uwejats aci uloole wun.

⁵ A u ka buts ngëkoraar ngëleemp, maa Ajug aci naloole nun.

⁶ A u ka ngëkoraar uleempar, maa Nasien-batsi naloole nun ci-un ni ka leempi ngëko bëlieng, di bañaan bëlieng.

⁷ Maa upibanaani Uwejats awëla kara ñaan, pa ko un ka wi bëkat.

⁸ Par Uwejats, ka wël nalon përim kameko; Uwejats uloole umënts wun ka wël nacints përim ume;

⁹ nalon, Uwejats uloole umënts wun ka wëlul uwak; u wël nacints ngëtseend pëyësan;

¹⁰ u wël nalon përo ngëko bawitsa; u wël nacints pëleents nga meaatsa ngi; u wël nalon kak pëyëkëran ngëkoraar ngëwejats; u wël nacints kak pëñakan ngëkoraar mleents; a nalon, u wëlul pëpaci ko wi mleents ja wi.

¹¹ Maa aci Uwejats uloole umënts wun din, ka ro wun ngëko ngi bëlieng; ka wël wun kara ñaan bi u ŋal bi.

Uliaf uloole, ni incimëntsu icumal

¹² Par, bi uliaf ci bunk uloole a u tsij incimëntsu icumal, a ŋal bi incimëntsu cum bunk, a i ci aatsum uliaf uloole, unk buts di Këristu ci run.

¹³ Par nja bëlieng ngë mijana tsi Uwejats uloole, pa pëci uliaf uloole rin; uru ci ank Bajudeu uu, oo Bagërek uu, baluek uu, oo bafacal. A nja bëlieng, Uwejats uloole umënts wun din wi ngë wëlaa wun përaan.

¹⁴ Unk, uliaf buts cits kancimëntsu kaloole rin, maa icumal.

¹⁵ Uci pëtsiim ja: “Bi n cits bink kañan, nji n bofats tsi uliaf;” ko wan di ka laaŋ pul pëbof tsi uliaf.

¹⁶ A uci kabats ja: “Bi n cits bink pëkës, nji n bofats tsi uliaf;” ko wan di ka laaŋ kul pëbof tsi uliaf.

¹⁷ Uci uliaf ci bëlieng pëkës, kabats ka ro ciina tsum? A uci uliaf ci bëlieng kabats, bíis ka ro ciina tsum?

¹⁸ Maa tsi uliaf, Nasien-batsi atsu kara kancimëntsu tsi pëlas kul, bi na ŋal bi.

¹⁹ Uci i ro ci bëlieng kancímëntsu kaloole rin, uliaf ka ro ciina tsum?

²⁰ Tsi ucär, incimëntsu acum, maa uliaf aci uloole rin.

²¹ Pëkës kats pëja kañan: “Nji n fieratsu.” Ŋal been di ka ja itsiim: “Nji n fierats ind.”

²² Maa ŋal incimëntsu i naam yunk ape përaf, afiera.

²³ A incimëntsu i naamnjayunk kaats bëkat mak tsi uliaf, yul i ngë pe yun pëwël. Incímëntsu in dëmbanatsa yunk tsinjayul i ngë pe yun pëwël përëmban.

²⁴ Incímëntsu nja iwar fierarats ko wan. Maa Nasien-batsi aleemp uliaf, a na pe përëmban incimëntsu in kaats yunk bëkat mak,

²⁵ pa u rits ka mankicësar tsi uliaf, maa pa incimëntsu pëci iloole, uja kandoon ki, kuu këmand kacints kul.

²⁶ Unk, uci kalon kancímëntsu ci tsi unoor, icínts ka ci bëlieng tsi unoor ni kul. A uci kalon kancímëntsu rëmbana tsi yul, icínts yun ka ci bëlieng tsi ulílan ni kul.

²⁷ Ind ci bukun uliaf Këristu; kara ñaan aci kancimëntsu uliaf umënts wi.

²⁸ Di Ngëriisia, Nasien-batsi atsu balon pëci bapostolu ucak; utëbantsan, bayëlia; uwaajantsan, bajukan; a uu ba, baro bawitsa; a uu ba, ban ka biki ngëtseend pa pëyësan, ni batsënk, ni ba tsijëna, ni bañakan mleents ngëtsooŋ.

²⁹ Ane bukul bëlieng, bë ci bapostolu-a? Oo bë ci bëlieng bayëlia-a? Bu ci bëlieng bajukan-a? Oo bë ci baro bawitsa-a?

³⁰ Bu tsij bëlieng utseend pa puu yësan-a? Bu ka ñakan bëlieng mleents ngëtsooŋ-a? Bë ci bëlieng bapac ko wi mleents ja wi-a?

³¹ Bi u ci bank, nda liincandari tsi pëtsas ngëtseend ngan pe ngunk pëwara. Inkri, mán piban ind bëga ban pe bi pëwara.