1 KORINTU 11 - KARÚK-PËRIM KAWALU Nouveau Testament

¹ Nda ciin bateenënin, bi n ci bi nateenëna Këristu.

Uleka kakúl been

² Tsi ucär, man bëndan ind, par nda ja nda roon ndu lesin tsi ko un ci wi-ba këci, a nda mob tsi ngëdiimaan ngi n wël ind ngi.

³ Maa ma ŋal ind pëme u ci Këristu ci-un been niints nan ci ba këci, a niints, ci-un been ŋaats, a Nasien-batsi ci-un been Këristu.

⁴ Niints nan ci ba këci tsi bëñaan, oo tsi pëleents ngi keen ci ngi, a na kul been, në kawaran nan ci-unk beenul.

⁵ Maa ŋaats nan ci ba këci tsi bëñaan, oo tsi pëleents ngi keen ci ngi, a kulats been, në kawaran nan ci-unk beenul; par aci pi atie been.

⁶ Bi u ci bank, uci ŋaats kulats ulec tsi been, mat në manc uweel. Maa uci pëmanc oo pëtie ci mkaw pa nul, na moban tsi pëkula ulec.

⁷ Niints kaats pëkul been, undo bi na ci bi bënaam Nasien-batsi, ni përëmbul; maa ŋaats ci-un përëmb niints.

⁸ Par niints pënënatsi tsi ŋaats, maa ŋaats apënë-ni tsi niints.

⁹ Te niints leempaatsa undo ŋaats, maa ŋaats leempa un undo niints.

¹⁰ Wul ka wun, undo ngëwaanju, ŋaats aka na roon në kul ulec tsi been, u ci upibanaani pëyëlan.

¹¹ Maa tsi bërun Ajug, niints afier ŋaats, a ŋaats fier niints buts.

¹² Par, bi ŋaats pënë-ni bunk tsi niints, unk buts di niints kë bukee run tsi ŋaats; maa umënts wan bëlieng apënë-ni tsi Nasien-batsi.

¹³ Nda wejatsi-e ind bërier ind, awara ŋaats puu ñaan Nasien-batsi te kulaatsa ulec-a?

¹⁴ Oo bëci ñaan bërier bul jukanats ind u ci mkaw, niints pëtíj uweel uyampal-a?

¹⁵ Maa uweel uyampal aci përëmb ŋaats; par awëlaa wul pa u ci ulec.

¹⁶ Maa, uci ñaan ŋal pëtamb ulats, na mean ngë kaats bëro bëmënts ban, nin iriisia Nasien-batsi kaats bul.

Ufëri Ajug

¹⁷ Maa nji, in di ka n bëndan ind tsi ko wi ndu nja ind wink, par bëjúk ind cits pa un pe wi pëwara, maa aci pa un pe wi pëwaraatsa.

¹⁸ Par tsi ucak ko, man leentsa uja nda júk di Ngëriisia, u ka mankicësar tsi pëncuaf ind. Nji bërierin ma wak.

¹⁹ Te mantotëlër aka pëci tsi pëncuaf ind, pa u meaa ban ci biki tsi ucär, tsi pëncuaf.

²⁰ Maa, nda ja nda júk tsëloole, cits ufëri Ajug wi ndu re wun.

²¹ Par nda ja nduu riala, kara ñaan në cakës pëjej ufëriul bërierul në re; nalon ka bonats, unk nacints ka kuj.

²² Ane nda kaats ito pa nda riala rul ndë raan dul a? Oo nda tienkëtsan Ngëriisia Nasien-batsi, a nda ŋal pëkawaran ban kaats bukun ko-a? We wi n du n ja ind wun? Mán bëndan ind-a? Tsi ucär, in di ka n bëndan ind tsi ko wi.

²³ Par nji man yankëni di Ajug, ko wi n parandar ind wi; aja: tsi bërëm bi Yeesu Ajug yaa bi ufets, a na jej pëpom,

²⁴ a na baran, a na tawës pul, na ja: “Ko wi, aci uliaf nji u wëla wi pa ind. Nda roan unk pa puu lesënin.”

²⁵ Unk, bi ba ba bi kare ufëri, a na kaka jej buts karaani, a na ja: “Karaani ki, aci karo-pëloole kawalu tsi pëñaak nji. Ndu ja nduu raan tsi kul, ndë ro unk pa puu lesënin.”

²⁶ Par ndu ja nduu re pëpom pi, nduu raan tsi karaani ki, ndë ci këci tsi pëleents pëcäts Ajug te në tsënkëna ka bi.

²⁷ Wul ka wun, nan dei pëpom, oo nan daani tsi karaani Ajug, te tsënkaants pëjaa aro ko wan, në ci na laci tsi uleka uliaf Ajug ni tsi pëñaakul.

²⁸ Unk, kara ñaan në wejatsar bërierul a uu ba, në re upom, në raan tsi karaani;

²⁹ par nan dei, a na raan, te yëkëranats uliaf Ajug, are, a na raan ulaciul bërierul.

³⁰ Undo ko umënts wi, ka wun bacumal tsi ind ci barafal ni bamoj, a bacumal cäts ba.

³¹ Par uci ngë ro ka wejatsar bërier nja ngë bitse ka lacana.

³² Maa uwal wi Ajug kë lacan nja wi, ka kus nja pa n ja përitsii lacana ni bañaan umundu.

³³ Bi u ci bank batsaar ni nji, uwal wi nda júk wi pa bariala, nda lipëlari tsi nda ci tsi.

³⁴ Uci ñaan bonats, na rialaan di katoul, pa bëjúk ind përits lacana. Tsi uleka nganduka ngi, uwal wi n bi n baandi di ind, kee tsu ngul bi nga ka bi pëci.