1 KORINTU 10 - KARÚK-PËRIM KAWALU Nouveau Testament

Katseend-ibats pa përits jintëla icap

¹ Batsaar ni nji, nji n ŋats ind pëpaaŋ basini njaro ci bëlieng di utsia kasa, a ba par-na bëlieng tsi bërëk.

² Tsi uleka Moises, a ba mijanaa bëlieng di kasa, ni di bërëk.

³ A ba re bëlieng bariala bëloole ban pëni bi di Nasien-batsi.

⁴ A ba raan bulieng përaan pëloole pan pëni pi di Nasien-batsi, par bë raan tsi pëlaak pan pëni pi di Nasien-batsi, pandunan pi bukul. A pëlaak pëmënts pun ci Këristu.

⁵ Maa Nasien-batsi lílandërats ban pe biki pëcum tsi bukul. Wul ka wun, a muum bukul gara ajëk ulaalats.

⁶ Ngëko ngi arolaa pa nga ci upibanaani pa n ja, pa n ja përits rí ngëko nga waraatsa ngi, pi ba rí pi.

⁷ Ind tsë ci bajintëla-icap pi balon tsi bukul; bi u picana bi aja: “Bañaan atsoarar bariala ni përaan, a ba natsa bënoonts.”

⁸ Nja tsë ro katúk-ufuts, pi balon do pi tsi bukul; a ba yër acäts bañaan ngëmiil ngëntaaja ngëtëb ni ngëmiil ngëwaants (23.000), tsi unu uloole.

⁹ Nja tsë teenaman Këristu, pi balon do pi ba tsi bukul; a ngëko-pëtsats ba ni bukul.

¹⁰ Ind tsë kuetar, pi balon kuetar pi tsi bukul, a nacok bi ee ba ni bukul.

¹¹ Ngëko ngi abaandë-ni bukul, pa nga ci upibanaani inkri; a nga picana, pa pëcar pëleentsi nja nja biki uwal utuami kë tsënki biki.

¹² Unk, na wini na nats aliinc, na rukan ibats pa na rits yër.

¹³ Mteen-teenana di ka baandë-ni ind, ucits ba mi kan baandë-ni mi bañaan-bajin; maa Nasien-batsi aci na mobi tsi përim, a di ka niiran ind pëteen-teenana pëpean ko wi nda yëlan wi. Maa tsi uwal mteen-teenana, në wël buts bëga bëbuërëni, pa ind pëyëlan mul.

Ngëko nga n jakandara ngi ngëcaay

¹⁴ Bi u ci bank, bamiñ ba ŋala biki, nda túkan kajintëla-icap.

¹⁵ Man ñakanaan ind pi bameko. Nda wejatsi-e ko winja wank, ind bërier ind.

¹⁶ Ane karaani bëbeenir ki ngë beenir ki, cits kambof tsi pëñaak Këristu-a? A upom wi ngë tawës wi, cits kambof tsi uliaf Këristu-a?

¹⁷ Par ŋal bi ngë cum bi, ngë ci pëpom pëloole, ni uliaf uloole rin; par n ja bëlieng nja ka bofara pëpom pëloole rin.

¹⁸ Nda teenan-e Israel tsi uliaf: Bare ngëko bëjakan, cits ba nja biki ba roon bu kë leemp di bëgij-a?

¹⁹ We wi n du n ja wun kalon? Ko un jakana wi tsi icap aci ulon ko-a? Oo pul pëcap bërier pul aka bëlon bëkat-a?

²⁰ Nin-a! Maa ngëko ngi bu kë jakan ngi, aci ngëcaay ngi ba jakandar ngun, cits pa Nasien-batsi. Nji n ŋalats ind pëbof di ngëcaay.

²¹ Nda yëlants përaan tsi karaani Ajug, ndë kaka raan tsi karaani ngëcaay. Nda yëlants pëci ban bof biki tsi bariala Ajug, ndë bofand tsi bariala ngëcaay.

²² Oo nja ka tsu Ajug na riabats-a? Ane ngë peanul uyëlan-a?

Ko wi bawak tsi Yeesu fac wi përo

²³ Ngëko bëlieng aniirana përolaa, maa cits ngëko bëlieng wara ngun përola; ngëko bëlieng aniirana përolaa, maa cits ngëko bëlieng ka ngun bëkat.

²⁴ Ñaan tsë tsas uwar pa beenul bërierul, maa na tsasan uwar pa acintsul.

²⁵ Nda yëlan përe ko wi ka waapa wi ba këwaapa di kanëm, te ind tsë yepar ko, undo uwejats;

²⁶ par utsia aci wi Ajug, ni ko un ci wi-ba këci tsi wul.

²⁷ Uci nalon tsi bawakats ruur ind bariala, a nda ŋal pëtsëp, nda rean ko un tsua wi ba këtsua tsi bërun ind, te ind tsë yepar ko, undo uwejats.

²⁸ Maa, uci ñaa n ja ind: “Bariala aci bi bëjakan,” ind tsë re, undo na leents ind unk, ni undo uwejats buts.

²⁹ Njinjaats uwejatsu bërieru, maa wi nalon. Par we ka wun a pëfacana nji kë wejatsaa di ngëwejats balon?

³⁰ Uci n baran Nasien-batsi undo bariala, we ka wun a ndu n karaa tsi undo ko wi n baran wi?

³¹ Bi u ci bank, uwal wi ndu riala wi oo ndu raan, oo ndu ro ko un ci wi-ba këci, nda roan bëlieng pa përëmb Nasien-batsi.

³² Ind tsë ci ko wi kan tsu wi Najudeu na yër, nin nagërek, nin Ngëriisia Nasien-batsi.

³³ Unk nji buts, ma nja n doon ka tsas pëlilan bañaan ngëwaas bëlieng, tsi ko un ci wi-ba këci. In di ka n tsas uwar pa nji bërierin, maa mán tsas uwar pa bacumal, pa ba yëlan pëbuer.