1 JOŊ 4 - KARÚK-PËRIM KAWALU Nouveau Testament

Bayëlia batsup

¹ Bamiñ ba ŋala biki, ind tsë wak uwejats un ci wi-ba këci; maa nda teenamani ngëwejats, ne aci ank ngi Nasien-batsi; par bayëlia batsup bacumal agara jëk umundu.

² Tsi ko wi tsi ndu yëkëraan tsun Uwejats Nasien-batsi: uwejats un pets wi ja, Yeesu Këristu abi tsi uyamats, aci Uwejats Nasien-batsi.

³ A uwejats un petsats wi ja Yeesu Këristu abi tsi uyamats, cits wi Nasien-batsi, maa aci uwejats nanatsara-Këristu wi nda te wunk ujaka ka bi; wul aci ba tsi umundu.

⁴ Upats uties, ind nda ci biki Nasien-batsi, a nda gaañaar bayëlia batsup bamënts biki, par nan ci di ind, ape nan ci wunk di umundu.

⁵ Bukul bë ci biki umundu; wul ka wun bu kë ñakan ngëko umundu, umundu ka te bukul.

⁶ Nja ngë ci biki Nasien-batsi. Na mei Nasien-batsi, ka cikëndën inja. Nan citsi ni Nasien-batsi, di ka cikëndën inja. Tsi ko wi, tsi ngë yëkëraan tsun uwejats ucär, ni uwejats kaguus-ko.

Nasien-batsi aci bëŋal

⁷ Bamiñ ba ŋala biki, nda ju ngë ŋalëlar tsi ngë ci tsi, par bëŋal aci bi Nasien-batsi. Ñaan nan kai ba këka bëŋal, abukënaa tsi Nasien-batsi, a na me Nasien-batsi.

⁸ Ñaan nan kaatsi bëŋal, meets Nasien-batsi, par Nasien-batsi aci bëŋal.

⁹ Tsi ko wi, tsi bëŋal Nasien-batsi pibanaana tsun di nja: bi na yëli bi Abukul naloole baŋ tsi umundu, pa n ja pëkaana ubiira tsi undoul.

¹⁰ Tsi ko wi, tsi bëŋal ciina tsun: cits pëjaa n ja ŋal bukun Nasien-batsi, maa nul ŋal nja un a na yëli Abukul, pa na ci bëjakan bi kan pënan bi ngëjuban inja.

¹¹ Bamiñ ba ŋala biki, uci u ci iink di Nasien-batsi ŋal nja run, ngë ka buts ngë roon nja ka ŋalëlar tsi ngë ci tsi.

¹² Ñaan winats Nasien-batsi yaas; uci ngë ŋalëlar tsi ngë ci tsi, Nasien-batsi ka mob tsi pëci di nja bëŋalul ka ci ban kës bi di nja.

¹³ Tsi ko wi, tsi ngë meena tsun ngë mob tsi pëci di Nasien-batsi, a nul na mob tsi pëci di nja: bi na wël nja bi Uwejatsul.

¹⁴ Wund awin, a wund leents Asin yëli Abukul pa pëci Nabueran umundu.

¹⁵ Ñaan na niirani ba Yeesu ci-un Abuk Nasien-batsi, Nasien-batsi amob tsi pëci di nul, a nul na mob tsi pëci di Nasien-batsi.

¹⁶ Nja ngë me bëŋal bi Nasien-batsi ŋal nja bi, a ngë wak tsi bul. Nasien-batsi aci bëŋal. Ñaan na mobi tsi pëci tsi bëŋal, amob tsi pëci di Nasien-batsi, a Nasien-batsi mob tsi pëci di nul.

¹⁷ Tsi ko wi, tsi bëŋal baaraan tsun pëci bucar tsi nja pa tsi Unu kawat-pëleents, nja ka ci ni uwatsar: par bi Këristu ci bunk, unk buts di ngë ci run tsi umundu wi.

¹⁸ Bëlal cits di bëŋal, maa bëŋal ban kës bi, ka gutsar bëlal utsand, par bëlal a tsij unoor. Na lali, bëŋalul cits ban kës bi.

¹⁹ Nja ngë ka bëŋal, par Nasien-batsi ŋal nja un bërun.

²⁰ Uci ñaa n ja: “Nji ma ŋal Nasien-batsi;” a na ñaas ni ba tsaari, aci natsup; par na ŋalatsi ni ba tsaari, ni na wini, yëlanats pëŋal Nasien-batsi ni na winatsi.

²¹ Këristu awël nja utsua wi: Ñaan na ŋali Nasien-batsi, na ŋalan buts ni ba tsaari.