1 JOŊ 3 - KARÚK-PËRIM KAWALU Nouveau Testament

Upats Nasien-batsi

¹ Nda teenan bëŋal bëwiak bi Asin wël nja bi, a u tsënkëna‎ tsu nja puu jakaa upäts Nasien-batsi. Tsi ucär ngë ci upäts Nasien-batsi. Wul ka wun bañaan umundu meetsi nja par bu meetsul.

² Bamiñ ba ŋala biki, ngë ci upäts Nasien-batsi inkri; ko wi nja kii ci wi netse pibana. Ngë me, uwal wi Këristu pibandari wi, nja ka naam ni nul, par nja ka winul bi na ci bi ja.

³ A nan kai ba këka uwats umënts wi, na jëntsandari bërierul, bi Këristu ci bi najënts.

⁴ Ñaan nandoi ba këro ujuban, aro buts ko wi ulua Nasien-batsi pok wi; par ujuban, aci uwal wi m do wi ko wi ulua Nasien-batsi pok wi.

⁵ Nda me Këristu bi, pa pëñau ngëjubani njaa ujuban cits tsi nul.

⁶ Ñaan na mobi ba këmob tsi pëci di nul, di ka ro ujuban; nan ci ba këci tsi ujuban, winatsul; meetsul koon këmeul.

⁷ Upats uties, ñaan tsë fal ind. Na mobi tsi përo ko u mab wi, aci namabal, bi Këristu ci bi namabal.

⁸ Ñaan na mobi tsi përo ujuban, aci ni Ujabël, par Ujabël ajuban ki ujuundi. Ko umënts wun ka wun Abuk Nasien-batsi bi, pa pëcok uleemp Ujabël.

⁹ Ñaan nan bukee ba këbuka tsi Nasien-batsi, di ka mob tsi përo ujuban, par pëcapi Nasien-batsi amob tsi pëci di nul; di ka yëlan pëci tsi ujuban, par abëka tsi Nasien-batsi.

¹⁰ Tsi ko wi, tsi upäts Nasien-batsi kë yëkëraana tsun, ni upäts Ujabël: nan ditsi ba ka ro ko u mab wi, cits napäts Nasien-batsi, nin na ŋalatsi ba ni ba tsaari.

Pëŋalëlar tsi ngë ci tsi

¹¹ Par përim pi nda te pi ki ujuundi ci pun pi: n ja pëŋalëlar tsi ngë ci tsi.

¹² Cits pi Kain, nan pënë-nii tsi Naro-ngëko-kawaraatsa, a na fiŋ ni ba tsaari. A we ka wun a na fiŋul? Par ngëko ngi Kain kë ro ngi waraatsa, a ngi ni ba tsaari ci ngëmabal.

¹³ Batsaar ni nji, ind tsë pikra, uci bañaan umundu ñaas ind.

¹⁴ Nja ngë me ngë par tsi pëcäts pa ubiira, par ngë ŋal biki ngë tsaar biki. Na ŋalatsi ni ba tsaari, aci di pëcäts.

¹⁵ Ñaan na ñaasi ba këñaas ni ba tsaari, aci nafiŋ-bañaan. A nda me ne, nan ci ba këci nafiŋ-bañaan, kaats ubiira un dits wi ka ba tsi nul.

¹⁶ Tsi ko wi, tsi ngë meena tsun bëŋal: Këristu awël ubiiraul pa inja; a ngë ka buts pëwël ngëbiira nja pa biki ngë tsaar biki.

¹⁷ Nan kai bëka umundu wi, a na win ni ba tsaari ci tsi ufier, a na ríc uwaas pa nul, um bi bëŋal Nasien-batsi kë mob bun tsi pëci di nul?

¹⁸ Upats uties, n ja tsuuts ŋalëna përim ni pëndiamënt rin, maa ngë ŋalëna karo-ko, ni ucär.

Uwatsar tsi Nasien-batsi

¹⁹ Tsi ko wi, tsinja kë meena tsun ngë ci biki ucär: nja ka welan ngëwaas nja tsi bërun Nasien-batsi.

²⁰ Par uci ngëwaas nja lacani nja, ngë me ne, Nasien-batsi ape ngëwaas nja a na me ngëko bëlieng.

²¹ Bamiñ ba ŋala biki, uci ngëwaas nja lacana tsi nja ngë ka uwatsar tsi bërun Nasien-batsi.

²² A ko wi ngë ñaan wi ba këñaan, nja ka yank tsi nul. Par ngë mob tsi ngëtsuaul, a tsi bërunul nja kë ro ko u lílul wi.

²³ A utsuaul ci wun wi: n ja pëwak tsi katim Abukul Yeesu Këristu, nja ka ŋalëlar tsi ngë ci tsi, bi na tsu bi di utsua.

²⁴ Ñaan na mobi tsi ngëtsuaul, amob tsi pëci di Nasien-batsi, Nasien-batsi mob tsi pëci di nul. Tsi ko wi, tsi ngë meena tsun na mob tsi pëci di nja: undo Uwejats wi na wël nja wi.