1 JOŊ 2 - KARÚK-PËRIM KAWALU Nouveau Testament

Këristu nanatsarnja

¹ Upats nji baties, mán picari ind ngëko ngi, pa ind përits juban. Maa uci ñaan bi juban, ngë ka na natsar nja tsi bërun Asin, un ci wi Yeesu Këristu, namabal.

² Nul ci-un bëjakan bi kan pënan bi ngëjuban nja a cits ngëjuban nja rin, maa ngi bañaan umundu bëlieng.

³ A tsi ko wi tsi nja kë meena tsun ngë meul: uci ngë mob tsi ngëtsuaul.

⁴ Ñaan na njai: “Nji man meul,” a mobats tsi ngëtsuaul, aci natsup; ubaaraari cits tsi nul.

⁵ Maa, na mobi tsi përimul, tsi ucär, bëŋal Nasien-batsi acum tsi nul. Unk, nja ka me ngë ci tsi Nasien-batsi.

⁶ Ñaan na njai amob tsi pëci di nul, aka pëyandaar bi Yeesu Këristu yandaar bi.

Utsua uwalu

⁷ Ind ba ŋala biki, in di ka n picari ind utsua uwalu, maa aci utsua ujon wi nda tsij wunk ki ujuundi. Utsua ujon umënts wi, aci përim pi nda te pi ba.

⁸ Maa, mán kaka n picari ind utsua uwalu, wul aci ubaaraari un ci wi tsi Këristu, a u ci buts tsi ind; par karëm aci tsi pëpar, a ufac ubaaraari ci wink ba tsi pëfiets.

⁹ Ñaan na njai aci tsi ufac a na ñaas ni ba tsaari, te inkri awama wam tsi karëm.

¹⁰ Ñaan na ŋali ni ba tsaari, amob tsi pëci tsi ufac, a kaats ko tsi nul wi kan tsu wi ñaan na yër.

¹¹ Maa, ñaan na ñaasi ni ba tsaari, aci tsi karëm, a nuu yandaar tsi karëm, a meets tsi nuu ya tsi, par karëm akuelëtsanul këkës.

¹² Upats uties, mán picari ind, par ngëjuban ind ajampësaa, tsi undo katim Këristu.

¹³ Basin upäts, mán picari ind, par nda me na ci wunk ki ujuundi. Batsasa, mán picari ind, par nda gaañaar Naro-ngëko-kawaraatsa.

¹⁴ Upats uties, man picari ind, par nda me Asin. Basin upäts, man picari ind, par nda me na ci wunk ki ujuundi. Batsasa, man picari ind, par nda tsij uyëlan, a përim Nasien-batsi mob tsi pëci di ind, a nda gaañaar Naro-ngëko-kawaraatsa.

¹⁵ Ind tsë ŋal umundu, nin ngëko ngan ci ngi tsi wul. Uci ñaan ŋal umundu, bëŋal Asin cits tsi nul;

¹⁶ par, ko un ci wi-ba këci tsi umundu, un ci wi karí-ko uliaf, karí-ko këkës, ni mguukandër tsi uleka ngëko ubiira, ngul bëlieng cits ngan pënë-ni ngi di Asin, maa aci ngan pënë-ni ngi tsi umundu.

¹⁷ Te umundu ka par bëlieng ni karí-ko wul; maa ñaan nan ci tsi përo uŋal Nasien-batsi, ka mob tsi pëci pa sandëndën.

Banatsara-këristu

¹⁸ Upats uties, aci ba uler utuami; bi nda te bi u jaka nanatsara-këristu ka bi, inkri banatsara-këstu bacumal apëni ba. Wul ka wun ngë me u ci ba uler utuami.

¹⁹ Bukul bë pënëna tsi pëncuaf nja maa bë cits bayiic inja; par uci ba ro ci bayiic nja bu ka ro mob tsi pëci ni inja. Maa bë pën atsëp, a u piban, bukul bëlieng bë cits bayiic inja.

²⁰ Maa ind, Nasien-batsi atular ind Uwejats-ujënts, a nda me bëlieng.

²¹ Cits pëjaa nda meets ucär ka wun n picari ind, maa man picari par nda me wul; a nda me buts, yaas a bëtsup ka pënë-ni tsi ucär.

²² Naom ci-un natsup, ucits ba nan poki ja Yeesu cits Këristu? Namëntsi ci-un nanatsara-Këristu nan bëri Asin ni Abuk.

²³ Ñaan nan bëri ba këbër Abuk, kaats Asin. Na niirani Abuk, aka buts Asin.

²⁴ Ko wi nda te wunk ki ujuundi, u moban tsi pëci di ind. Uci ko wi nda te wunk ki ujuundi mob tsi pëci di ind, ndë mob buts tsi pëci di Abuk ni di Asin.

²⁵ Wi ci-un uwatsan wi na watsán nja wi: ubiira un dits wi ka ba.

²⁶ Man picari ind ngëko ngi, uleka ba n ja bukunk ba roon bu ka ŋal puu fal ind.

²⁷ Maa ind, Uwejats ujënts wi Këristu tular ind wi, amob tsi pëci di ind, unk nda katse fier ñaan pëjukan ind; maa bi Uwejats jukan ind bunk uleka ngëko bëlieng, aci ucär, cits butsup. Nda moban tsi nul, bi na jukan ind bi.

²⁸ A inkri upäts uties, nda moban tsi pëci di nul, pa uwal wi nu pibandari wi, nja ka ka uwatsar, pa ngë rits pëni ri nul ni mkaw, uwitseeul.

²⁹ Uci nda me na ci namabal, ndë niiran buts ne, ñaan nandoi ba këro ko u mab wi, abukënaa tsi nul.