1 JOŊ 1 - KARÚK-PËRIM KAWALU Nouveau Testament

Përim ubiira

¹ Wund aci tsi pëpicari ind uleka përim pan tsij pi ubiira, pul pando pi ci ba ki ujuundi. Wund ate pul, a wund win pul ni këkës wund bërier wund; wund ateen pul, a wund laakats pul ni iñan wund bërier wund.

² Ubiira apibandari, a wund win wul, wund leents uleka wul, aleents ind ubiira un dits wi ka ba; wul aro ci ni Asin, a wund pibana wul.

³ Ko wi wund win wi a wund teend, wul wi wund ci wun tsi pëleents ind buts, pa ind pëbof tsi manteelar ni wund. Te manteelar wund aci ni Asin, ni Yeesu Këristu Abukul.

⁴ Wund apicari ind ngëko ngi, pa ulílan nja pëci-un kës wi.

Nasien-batsi aci ufac

⁵ Përim pi wund te pi tsi ulekaul a wund leents ind, ci pun pi: Nasien-batsi aci ufac, a nin karëm cits tsi nul.

⁶ Uci ngë ja ngë ci tsi manteelar ni nul, a nja kë yandaar tsi karëm, ngë tsup, a ngë mobats tsi ucär.

⁷ Maa uci ngë yandaar tsi ufac bi na ci bi tsi ufac, nja ka ci tsi manteelar tsi ngë ci tsi, din pëñaak Yeesu, Abukul, ka jëntsan nja ujuban un ci wi-ba këci.

⁸ Uci ngë ja ngë kaats ujuban, ngë fal iyeen nja bërier inja; ubaaraari cits dinja.

⁹ Uci ngë pets ngëjuban nja nul aci na mobi tsi përim, a na ci namabal; në jampësa nja ngë juban, në jëntsan nja tsi kamabats kan ci ki-ba këci.

¹⁰ Uci ngë ja ngë roots ujuban, ngë tsuul pëci natsup; përimul cits di nja.