Zaki 5 - Kota Kiwoyeti (koq) NT Portions

Masicɛ na mekumani

¹ Nde bihi menkumani biyoka mɛ osatɛ: ngweyaka buce bosina bwa malɛbu mehulangaka ukwa bihi!

² Bokumani bwa bihi bwebɔ, na mekanda mya bihi mehɔngɔbila myeja.

³ Usɛ lɔli wa bihi na balɔlɔ ba bihi membamingali myejibɛ, membamingali mɛnɛ myejaka akɔbɛ ehacɛcɛ bihi. Myehemaka ɔbɛ nyo nda weya. Yɛ bokumani bwa byamusojɛ bwa minyan ma ihiye.

⁴ Yɛnɛcɛ mahuta ma menjazi myajaza o makuba ma bihi: byebena iwɛcɛ bango mango. Yajɛ emba ya inɛnɛ ya bobe, byoce bya menjazi myɛ byepunda ngu o malɔ ma Zambe Ku wa tuma ya buce.

⁵ Nde bihi byamuja o mɔngɔ mutɛ ukwa bokumani na ibekaka nda byanɔnɔ. Byeja obweji na ihusaka, nda basito babalwa ibomaka.

⁶ Byehujɛ o nyanwu, na ibomaka bato ba hongololo, bango bibeka mosungu na bihi.

Ilengwɛcɛ na ibɔndɔkɔ

⁷ Bana nyangwɛ bamɛ, lengwɛcɛ ngu na elɔmɔ ya Ku wa mini elumyaka. Yɛnɛcɛ nda nkone mwalengwɛ elɔmɔ ya mambolo meji ma bongɔndɔ ma hehe, imanyaka usiya ango ebuna ma boho, ngu na isiya ango abuna ma nkola mwa mambiya

⁸ Na bihi lengwɛcɛ! Jakayi na melema mya kanganga na bosina te Ku aya kuna iye!

⁹ Bana nyangwɛ bamɛ, byakohɔkɔnece na banɛ, bosina Zambe atokopaba bihi. Ngwɛnɛ mpabe mwangutɛ o itulu!

¹⁰ Bana nyangwɛ bamɛ, o mezuku na ilengwɛcɛ, mina hinjɛce etɛ ya mentɔci myasɔhɔkɔsɔ na jinɔ ja Ku.

¹¹ Bɛhɛ basɔhɔ te bato bakangama bajɛ o mana. Byajasa byeyoka te Jɔbi ajasa ekangama, usɛ byango ayeba emba ya Ku awɛsɛ ango o ihiye. Bosina te Ku aje humɔn na bokungu na cɛyi ya inɛnɛ.

¹² Nde boho na bemba byahajɛ, bihi bana nyangwɛ bamɛ, teka beka nseka, teka kana iko, na hehe, na iyate etɛ ya ntula. Sɔhɔkɔ okayi te «yajace nɛ» usiya yango yaji nɛ, «yajace hamama» usiya yango yaji hamama, ibenaka te bya tokotuwa ukwa mpabo mwa Zambe.

¹³ Wɛnɛ moto opanga bihi aje o mezuku? Abɔndɔce. Wɛnɛ moto aje o mana? Ayembace beboka.

¹⁴ Wɛnɛ opanga bihi yajɛ na moto aponga? Abangace bakombo ba buka bwa babukwɛ ibɔndɔkɔ bosina bweji na ihowaka ango maji na jinɔ ja Ku.

¹⁵ Membɔndu mya ibukwɛ mweyonjɛkɛcɛ mbɛlu. Ku etɛmɛcɛ ango ntɛtɛ, ici ebeka mesɛmbɛ, eyɛnɛcɛ cɛyi ya mesɛmbɛ mweji.

¹⁶ Tandaka mesɛmbɛ mwa bihi bimɛnɛ na bimɛnɛ, na ibɔndɔngɔkɔ bimɛnɛ na bimɛnɛ, na bosina bwa byeyongaka. Mbɔndu mwa moto wa hongololo abɔndɔ mwajɛ na pizo.

¹⁷ Eli ajasa moto nda mini, abɔndɔngɔkɔsɔ na hun te mbuwa akonɔce, okate mbowa mumakasanɔ o hehe o menkola mehanto na bangɔndɛ ntoba.

¹⁸ Ya ango hunwanasa bobɔndɔkɔ iyate ekusi, ya iko jawɛ mbuwa, na hehe yapwɛ mambolo.

Ilumɛcɛ moto amutapa pɛyi

¹⁹ Bana nyangwɛ bamɛ, wɛnɛ opanga bihi moto atapa pɛyi ya mombo iwate alumɛce ango,

²⁰ yebakayi te alumɛ moto wa mesɛmbɛ o pɛyi ya bobe ya ango amuja, eyonjɛ ango na ilɛlɛ. Na mesɛmbɛ myeji myekungwana.