Zaki 4 - Kota Kiwoyeti (koq) NT Portions

Itɔndɔ ja mɔngɔ

¹ Mabaji na mambanda maji opanga bihi mayenga biya? Habe pimbo ya bobe yabeka mabaji o manyo ma bihi?

² Byango ahingama, nde byakume. Byajɛ membomani na moyino, byajikumɛ na emba na emba. Byango atola na ibomanaka. Byakume na emba bosina te byahimwe.

³ Usiya byahimwa bihi teka kumɛ, ate byahimwe bobe, bosina te byahake inakwɛcɛ mapimbo ma bihi ma bobe.

⁴ Bihi bato ba bokale! Byayebe te inɔnɔkɔ bemba bya mɔngɔ yajɛ ijaka pala wa Zambe? Moto aji mwanyangwɛ wa bemba bya mɔngɔ ajɛ pala wa Zambe.

⁵ Byatemanga te mangwɛli masɔhɔ njokoso? Usiya mango masɔhɔ te: «Zambe akalɛ Ekokoyi ya ango amuhujɛ mini.»

⁶ Okate, Zambe ewɛ mini ngamo a ya inɛnɛ, yango ya mangwɛli matanda te: «Zambe abena bato ba ewɛlɛ, nde akwa ngamo ya bato ba mabiya.»

⁷ Usɛ siswaka Zambe, nde benaka satan, elɔngɔkɔ bihi bopama.

⁸ Hinyanaka bya Zambe aji, neji abihinyakasa bya bihi baji. Pubɛcɛ mabɔ ma bihi ma mesɛmbɛ, na ikungwaka melema mya bihi, bihi baji na bangwanda baba

⁹ Yebakayi mezuku bya bihi, jaka o malɛbu, na ingweyaka! Becɛ bya bihi bya kalwace malɛbu na ncebo mwa bihi mwajace o bohulu!

¹⁰ Jaka na mabiya na Ku, ango ebesɛcɛ bihi.

Teka paba mwanyɔngwɛ

¹¹ Bana nyangwɛ bamɛ, teka sɔhɔ bobe bihi mɛnɛ a bihi mɛnɛ. Moto asɔhɔ bobe na mwa nyangwɛ ice ipabaka mwa nyangwɛ, asɔhe bobe na nceko mwa Zambe na ipabaka mwa ango. Usɛ, oya kombo wa nceko, nde habe minɛ moto asiwsa mwango.

¹² Zambe amɛnɛ mɔkɔ awɛ nceko, ango mɛnɛ mpabe. Amɛnɛ anyeniyonjɛ na ibomaka moto. Nde ɔbɛ opaba onɛ, ɔbɛ za?

Jikaka ewɛlɛ

¹³ Biyoka mɛ osatɛ, bihi basɔhɔ te: «Mwɛnhɛ ice yana belwaka bya betafɛlɛ, ya bejaka nkola mwa ntula, mini ebekaka mombongo, na ikumɛcɛ balɔlɔ.»

¹⁴ Nde bihi bayebe nda ndonga ya bihi yejakana yana! Byango ayeba emba yehulangaka na bihi yana! Byajɛ nda mbuji mwapunda mwa elɔmɔ bosiki onyate mɛnɛ mwalapa.

¹⁵ Nde bya nyenisɔhɔ te: «Ice Ku anɔnɔ, bɛhɛ bejaka na ndonga na ibekeka natɛ ice natɛ.»

¹⁶ Nde, byajɛ nganda-nganda na mayɔkɔ ma ewɛlɛ. Ihɛlɛcɛ nyo nɛ yajɛ bobe.

¹⁷ Usɛ wɛnɛ moto ayeba ibekaka bemba bya mbɛ, nde ango teka beka, abekɛ nsɛmbɛ.