Zaki 3 - Kota Kiwoyeti (koq) NT Portions

Pizo ya elemi

¹ Bana nyangwɛ amɛ, teka haka ijaka bato behɛlɛcɛ iyɔkɔ, bosina te bepabaka mini bahɛlɛ teka cɛcɛ.

² Mini bahajɛ bango atuwa menjanga buce. Wɛnɛ moto mwatuwe usiya ango asɔhɔ, aje jelejele, anyenilonga nyo eji yahajɛ.

³ Usiya mini kota mwa ilenga na menkɔji wa jinɔ te mɔli ukwa honko mwa bakabala, yɛ ibekaka te asiswace mini, okate mini ango abukwɛ te mini ehongɛcɛ nyo eji yahajɛ.

⁴ Yɛnɛcɛ bembongo, jaka na bonɛnɛ bwango, mengongo minɛnɛ myahizɛ byango, banguhongɛcɛ byango na mwa mope, na ilwaka bya luke mwahaka.

⁵ Etɛ mɛnɛ nda elemi, mwa ecesa wa isiki wa nyo abeka nganda-nganda ya bemba bya inɛnɛ, yɛnɛcɛ nda mwa ntɛtɛyi wa weya anyenitumba ejici ya inɛnɛ!

⁶ Na elemi yajɛ weya: mɔngɔ mwa bemba bibebe byaja okate. Yajɛ ecesa ya nyo ya mini yango yahema nyo ya mini yahajɛ, ya tumba ndonga ya mini, yamɛnɛ yahinyɛ na weya ya bototola.

⁷ Moto mboka ajɛ na pizo ya ibekaka te, basito, bonyɔji, besitoto na bafɛ, basiswace ango.

⁸ Nde elemi teka moto enyɛni beka te ya asiswace! Yajɛ emba ya bwa ya teka ja wayɔ, yajɛ humɔn na isela ja bomana.

⁹ Na yango minakumɛ Ku wa Hangwɛ wa mini, na yango okayi minasɛmɛ bato ba Zambe amuhuna nda etɛ eji.

¹⁰ O honko mɛnɛ mɔkɔ mwapwɛ iyɔkɔ ipota na ja isɛnwu. Bana nyangwɛ bamɛ, teka beka te yajace nɛ!

¹¹ Ibolo ja ndɔndɔ jɛkɔ ja nyɛnipojɛ nso mwa telele na mwa isece?

¹² Bana nyangwɛ bamɛ mwele mwa fingi mwa nyenipojɛ bebuma bya olivi, ice mwele mwa vinyi bya nyenipojɛ bebuma bya fingi? Na ibolo ja ndɔndɔ ya macemba ja kusipojɛ nso mwa teletele.

Bokombo bwa iko

¹³ Aji o panga bihi na bokombo na bocɛngu beza? Ahɛlɛce bejɛmi bya mbɛ byango abeka na bejemi byeji na bokungu na bokombo.

¹⁴ Nde wɛnɛ byajɛ na melema humɔn na moyino na ekokoyi ya bombanda, byakobekace nganda-nganda te byajɛ na bokombo byakohɔcɛce bemba bya mombo na obonda.

¹⁵ Bokombo bwa njanga mwɛ bwayenge biko, bwajɛ bwa hehe, bwajɛ bwa bato mboka, na bwa jabulu.

¹⁶ Bosina te, isi yaji na bato ba moyino na ekokoyi ya bombanda, yejaka na ntolo na bemba bibebe byahajɛ.

¹⁷ Nde bokombo bwa iko bwajɛ bohoboho pu, onyate mɛnɛ itabu, na bokungu, na ihangwɛcɛ, na cɛyi ya buce, na bebuma bya mbɛ, bwajɛ teka myalalo na ipɔpi.

¹⁸ Bosina te ombolo bya hongololo bakona bwango o itabu na bato bajaza o itabu.