Zaki 1 - Kota Kiwoyeti (koq) NT Portions

Masosa

¹ Imɛ Zaki, wa njazi mwa Zambe na Ku Zɛzi Kilisitɛ. Makwɛlɛ makana matɛ etɛ na bihi makaka jonwu na mba mamuhanga o myɔngɔ myahajɛ. Masosa bihi!

Bonyekaka na ikangamaka

² Bana nyangwɛ bamɛ, jaka na menjanga mya mezuku mya benyekakasa bihi yɛnɛcɛ myango nda etɛ ya ncebo munɛnɛ,

³ usɛ byango ayeba te, usiya banyeka ibukwɛ ja bihi byejaka kanganga.

⁴ Yanyɛ byaja kanganga ngu boluma bosina bwa byejelaka byejaka teka mbeje na ngango, teka emba yepenaka na bihi.

⁵ Wɛnɛ moto opanga bihi aje hamama bokombo, ahimwace bwango na Zambe, na Zambe ewɛcɛ ango. Bosina te Zambe awɛ na bato bahajɛ na bokɔdu teka masicɛ.

⁶ Nde ahimwace na ibukwɛ teka cɛcɛ, bosina te moto acɛcɛ aje nda ipoci ja zowa ya macemba ja ngongo mwangombɛ na ihizɛcɛ bepɛyi byahajɛ.

⁷ Moto wa njanga mwɛ teka nyeni temanga te Ku ewɛcɛ ango na emba.

⁸ Moto wɛ aje na melema memba, mwayebe emba yango anyenibeka.

Botende na bokumani

⁹ Mwana nyangwɛ aji ntende acebace bosina te Zambe ebesɛcɛ ango.

¹⁰ Nde, mwana nyangwɛ aji bokumani acebace bosina bwa Zambe ehulɛcɛ ango. Okate, nkumani mwelapaka nda ilɔngɔ ja bulu.

¹¹ Yoyi yapwa, mbabi mweji mwaya weya mwayomɛ bulu, na ilɔngɔ te matuwa na bongɔndɔ te bwahiya. Etɛ mɛnɛ, nkumani elapaka o elɔmɔ ya ango alonga bemba byeji.

Bonyekaka na bomamaka

¹² Moto akangama usiya banyeka ango aje o mana, bosina te usiya ango ahijɛ imbendebaka usiya ya banyeka ango, bewɛcɛ ango ezaza ya ndonga ya mbɛmbɛyi ya Zambe atandasa na bato bango anɔnɔ.

¹³ Usiya moto amamubwɛ, ango teka isɔhɔ te: «Yɛ Zambe amama mɛ.» Bosina te mambo ma bobe makusimama Zambe, bosina te Zambe mwakusimama moto.

¹⁴ Nde moto amamubwɛ usiya ango alambubwɛ na ihinjɛcɛ pimbo eji amɛnɛ ya mambo ma bobe.

¹⁵ Usiya ango ahinjɛ pimbo ya mambo ma bobe, yahuna nsɛmbɛ. Nde usya nsɛmbɛ mwaya buce mwahuna ilɛlɛ.

¹⁶ Bana nyangwɛ bamɛ bama manɔnɔ byako tapace:

¹⁷ Bemba bya mbɛ byahajɛ bya bawɛ mini, na lebyo jahajɛ ja teka mbɛjɛ na ngango. Byayenga bya Zambe wa Hangwɛ wa mini aji. Amuhuna yoyi ngɔndɛ na myɛsi. Zambe mwayawe, mwayombame ihunaka yɔmbɔ.

¹⁸ Amuhaka iwɛcɛ mini ndonga na iyɔkɔ jeji ja mombo, bosina bwa mini ejaka o boho bya bemba byango amuhuna byahajɛ.

Iyokaka na isiswaka

¹⁹ Bana nyangwɛ bamɛ ba manɔnɔ, yebakayi te. Moto nde moto ajace ngwɛ iyokaka, abekace elɔmɔ ya buce boho na ango isɔhɔkɔ, na ijaka teka nganya kwakwa,

²⁰ bosina te usya moto aji na ibuku, mwakusi beka mambo ma hongololo o boho bwa Zambe.

²¹ Usɛ, jikaka mambo ma ncɛti na byahajɛ byawɛ bobe. Himɛcɛ iyɔkɔ ja Zambe amuhujɛ o melema mya bihi na boyimbo, jango jaji na pizo iyonjɛcɛ bihi.

²² Usɛ siswaka iyɔkɔ ja Zambe, teka ci hucɛ oboyokaka okayi, na itapaka bihi mɛnɛ.

²³ Bosina te, moto ayoka iyɔkɔ teka siswa jango, ayuwe moto ata etɛni na iyɛcɛ nda ango aji.

²⁴ Usya ango ahijɛ itaka, ango te alwa na iyebijɛcɛ osatɛ nda ango aji.

²⁵ Nde moto asɔzɛ nceko mwa teka mbejɛ na ngango mwa pokwa, ajace kanganga na nceko mwɛ. Akoyokace okayi, ete onyate mɛnɛ ayebijɛ. Moto wɛ ejaka o mana o bemba byahajɛ bya ango abeka.

²⁶ Wɛnɛ moto ajɛ na pimbo ya ihinjɛcɛ pɛyi ya Zambe, ete ango teka nimba elemi eji, alunge nyo eji amɛnɛ, imweji njanga mwango ahinjɛ Zambe mwajɛ bezayi-bezayi.

²⁷ O minhɔ ma Zambe wa Hangwɛ wa mini, ngwɛnɛ etɛ ya mbɛ ya ihinjɛcɛ pɛyi ya Zambe yaji pu teka ncɛti yangujake: ilongaka mensice na menkuwɛ o malɛbu mango, ijaka teka hema nyo na bemba bya mɔngɔ.