Titi 3 - Kota Kiwoyeti (koq) NT Portions

Ejemi ya kelete

¹ Yebwaka babukwɛ te bahimace bakɔkɛ bango na menɛni, te basiswace bango, bajace ngwɛ ibakaka bemba bya mbɛ byahajɛ.

² Te bango teka sɔhɔ bobe na moto, te bajace bato ba itabu, bajace bɔnwu, bahɛlɛce bokungu na moto wahajɛ.

³ Bosina te na mini bajasa sondi ya boho teka bocɛngu, teka yoka, o ntapo. Mini ajasa menkoma mya pimbo na njo mwa bemba byahajɛ bya mini anɔnɔkɔsɔ. Mini ajasa bato ba bwa na mohino, mini bekakasa bemba bya banɛ banjinyɛkɛsɛ mini na mini mɛnɛ injinyɛnɛcɛ o panga mini.

⁴ Nde usiya Zambe Yonja amini ahɛlɛsɛ bondonga bweji na itɔndɔ jeji na bato,

⁵ ayonjɛ mini, habe na bosina bwa mini amubeka bemba bya hongololo, nde na bosina bwa ango amuyɛnɛ mini cɛyi. Ayonjɛ mini na iwɛcɛ mini ndonga ya ihɛnwu usiya baluba mini nso na Ekokoyi ya Pu yango awɛ mini.

⁶ Zambe ahowa Ekokoyi ya Pu buce ukwa mini na Zɛzi-Kilisitɛ Yonja mini,

⁷ Isi mɛnɛ na ngamo eji, awɛ mini ijaka hongololo o boho bweji na ibekaka te mini amyalace ndonga ya mbɛmbɛyi ya mini aji na ilela.

⁸ Iyɔkɔ jɛ ja mombo. Mahaka te okangamace buce na jango, bosina bwa bato babukwɛ Zambe bahujɛce melema ibekaka bemba bya mbɛ. Ngwɛnɛ emba ya mbɛ na bondonga ya moto wahajɛ.

⁹ Nde benaka macɛcɛ ma bezayi-bezayi, na besɔhɔsɔhɔ ukwa ilanda ja bakɔkɔ ba bihi, bombanda na betɔbɔtɔbɔ ukwa jambo ja nceko, bya nɛnɛ bya teka wɛ na emba na emba.

¹⁰ Wɛcɛ isicɛ ja boho, na jahinjɛ, na moto apatwɛ bato, onyate mɛnɛ, patwɛcɛ ango na banɛ

¹¹ Ongoyeba, usɛ, te moto wa nɛ elwa bopama na pɛyi ya hongololo ehukwa ibekaka nsɛmbɛ, epaba nyo eji amɛnɛ.

Behinda bya mbiya

¹² Usiya melomakasa ɔbɛ Atemasi ice Tysiki, besɛcɛ nyo yaka ikumɛcɛ mɛ bya etafɛlɛ ya Nikopolisi, bosina te mehimɛ iyecɛcɛ elɔmɔ ya inyenwu buce okate.

¹³ Nyamwaka Zena wa moto ayeba makana buce ma nceko bango na Apɔlɔsi ihukwanaka bocɛyi bwango, bekaka te teka emba yepenaka na bango.

¹⁴ Yanyɛ te na ba mini bayokwɛce ibekaka obwɛji bemba bya mbɛ, bosina bwa bango bejaka na mahuna ma mbɛ, na ijaka teka beka bemba bebeke-beke.

¹⁵ Ba bɛhɛ nango baji bahajɛ basoswa ɔbɛ. Soswaka bahuwa mini ba mini ango baji na ibukwɛ jɛkɔ. Te ngamo ya Zambe ya jaje na bihi bahajɛ.