Titi 2 - Kota Kiwoyeti (koq) NT Portions

Maheya ma hongololo

¹ Nde ɔbɛ, hɛlɛcɛ bemba byakoka na maheya ma pu

² Sɔhɔkɔ na mentolu te bajace na bohimbo, bajace bato ba basiswa, bato aji na bokombo, na ijaka kanganga na ibukwɛ ja mombo, na itɔndɔ na ilengwɛcɛ.

³ Etɛ mɛnɛ beboto bya bahito, bajongace nda menjazi mya Zambe. Bajikace makakuji, bakojace menkoma mya maku. Bawɛce maheya ma mbɛ,

⁴ bahɛlɛce bel oka bya bahito inɔnɔce bomi na bana bango,

⁵ bajace na bokombo, pu, te balongace matona mango, bajace mbɛ na ihimaka bomi bango, bosina te bato batokosɔhɔ bobe na iyɔkɔ ja Zambe.

⁶ Etɛ mɛnɛ, sɔhɔkɔ na waza te bajace na bokombo

⁷ o bemba byahajɛ. Ɔbɛ mɛnɛ o bemba byahajɛ bya obeka hɛlɛcɛ ehezango ya mbɛ, na maheya ma pu, ma bahima.

⁸ Te mayɔkɔ mɔbɛ majace pu, ma teka nyenicɛcɛ, bosina bwa bapala bɔbɛ bejaka o hɔyi usiya bango bejaka teka kumɛ emba ya bobe ya bango besɔhɔkɔ na mini.

⁹ Te menkoma myasiswace menlɔnji myango o bemba byahajɛ, bajace obwɛji na bango. Te bango teka beka macɛcɛ na bango,

¹⁰ teka hiba bango na emba na emba. Te bahɛlɛcɛ obwɛji bekusi byahajɛ te bajɛ mbɛ na hongololo, bosina bwa bango behimaka iheya ja Zambe Yonja mini.

¹¹ Bosina te Zambe ehɛlɛ ngamo eji, yaji sina ya ndonga ya moto mboka wahajɛ.

¹² Sina mɛnɛ yango awɛ mini maheya ma ifaka ejemi ya bobe na mapimbo ma bemba bya hɛnjɛ, ijongaka o elɔmɔ ya mini aji etɛ na bokombo, hongololo na isiswaka Zambe.

¹³ Etɛ yɛ, ya mini anyeniboka buya bwa mbɛ bwa mini aji na ilela, buya bwa kuma ya Zɛzi Kilisitɛ Zambe wa mini wa inɛnɛ wa Yonji yepwakasa.

¹⁴ Awɛ nyo eji amɛnɛ bosina bwa mini, ipokwaka mini na bemba bya ibebe, abekasa mini lupu jango amusɛmuyɛ, lupu jejaka ijeji amɛnɛ, jaji ngwɛ ibekaka bemba bya mbɛ.

¹⁵ Ngwɛnɛ emba yotandaka na pizo ɔbɛ yahajɛ, isomɛcɛ bayoka ɔbɛ na iwɛcɛ bango masicɛ. Teka jika moto ibyazaka ɔbɛ.