Titi 1 - Kota Kiwoyeti (koq) NT Portions

¹ Imɛ, Poli wa njazi mwa Zambe na ntɔtu wa Zɛzi Kilisitɛ. Zambe amutɔtɔ mɛ na bosina bwa iyaka na bato bango abɔnɔsɔ te bayebace Iyɔkɔ ja Mombo, jehɛlɛcɛ bango ijaka kanganga na bemba bya Zambe,

² bosina bwa bango bejaka na ilela jawɛ ndonga ya mbɛmbɛyi. Zambe mwahɔke, asinjɛsɛ ndonga mɛnɛ boho na ango iwunaka mɔngɔ.

³ O elɔmɔ ya ango asinjɛsɛ, Zambe Yonja mini ahɛlɛ na bato iyɔkɔ jeji jango awɛsɛ mɛ na iwɛcɛ imɛ ekana ya itandaka jango.

⁴ Makwɛlɛ ɔbɛ makana matɛ, ɔbɛ Titi mwana amɛ wa mombo o ibukwɛ ja mini bahajɛ baji na jango: Te Hangwɛ Zambe na Zɛzi Kilisitɛ Yonja mini awɛce ɔbɛ ngamo na itabu jeji.

Njonga mwa Titi bya Kɛlɛti

⁵ Mamujika ɔbɛ bya ndobe ya Kɛlɛti ihijɛcɛ ehaji ya mini bajikasa, na ibɔnɔkɔ o buka bwa babukwɛ bokajɛcɛ bakombo o betafɛlɛ byahajɛ, nda mamuloma ɔbɛ ibekaka:

⁶ Kombo akɔkɛ ajace teka masicɛ, ajace na mwaji mɔkɔ wango amukwɛlɛ, bana beji bajace babukwɛ, bajace teka hacɛ bango mabuza o bejemi bibebe na ijaka teka mabiya.

⁷ Usɛ, kombo akɔkɛ Elongwɛ ya Zambe ajace teka masicɛ: teka ewɛlɛ, teka mabuku, akonɔnɔce iyɔtwɛ, teka eciciba, akolungace bato na balɔlɔ.

⁸ Akɔlɔce obwɛji mencɛyi myaya bya ango aji, na ihimɛcɛ ibekaka bemba bya mbɛ, ajace na bokombo, hongololo, pu, na imbendebaka bato.

⁹ Ajace kanganga o Iyɔkɔ jaji ngu na ibukwɛ nda bahɛlɛsɛ ango. Okate, abijaka na pizo ya inyamwaka bato isiswaka Zambe, na ipwɛcɛ o iyɛhɛhɛ bemba bibebe bya bato baji teka nɔnɔ maheya meji.

¹⁰ Okate, yangwɛ na ba-zufi buce bakalasa ba-kelete, o panga ango yajɛ na menvu mya ilungaka banɛ na itandaka bango bemba bya bezayi-bezayi.

¹¹ Jibɛcɛ bango mehonko, bosina bwa bango bajɛ bohemaka matona ma mentula na ihɛlɛcɛ maheya ma teka nyenihɛlɛ, babeka nɛ bosina bwa bango bekumɛcɛ balɔlɔ.

¹² Ntɔci mɔkɔ o panga ango mwasɔhɔsɔ te: «Bato ba Kɛlɛti bangujaka bato ba obonda, basito ba bwa, belutu na bevanga.»

¹³ Emba ya ango atanda yɛ yajɛ mombo. Na bosina mɛnɛ nganyaka na bango buce amɛnɛ, te bajace na ibukwɛ ja mombo,

¹⁴ te bango teka hinjɛ bekɔkɔ bya bakɔkɔ bango bya ba-zufi, na ijaka teka hinjɛ mapeko ma bato bamubulɛ nkɔngɔ na bemba bya Mombo.

¹⁵ Byahajɛ byajɛ pu na bato ba pu, nde teka emba yaji pu na bato baji o ehumbe na ba teka ibukwɛ, teka emba yaji pu, usɛ, iyaba jango na matemange mango majɛ o ehumbe.

¹⁶ Bangutandaka te bango ayeba Zambe, nde bejɛmi byango byahɛle etɛ mɛnɛ. Bajɛ bato ba babena, menvu, bajɛ teka pizo ya ibekaka na emba ɛkɔ ya mbɛ